နေပြည်တော် ၊Kempinski ဟိုတယ်တွင် ၂၀၁၇ခုနှစ် ၊ သြဂုတ်လ ၂၂ ရက်နေ့၌ စီမံကိန်းနှင့် ဘဏ္ဍာရေးဝန်ကြီးဌာနနှင့် ပါရမီစကားဝိုင်းအဖွဲ့တို့ ပူးပေါင်း၍“ အေအီးစီ၏ အတွေ့အကြုံများ အားနှီးနှောဖလှယ်ခြင်းနှင့် ရှေ့ဆက်လက်ဆောင်ရွက်မည့် ကိစ္စရပ်များ”ဆိုင်ရာအလုပ်ရုံဆွေးနွေးပွဲ ဖွင့်ပွဲအခမ်းအနားကို ကျင်းပခဲ့ရာ အေအီးစီနှင့်စပ်လျဉ်းသည့် လုပ်ငန်းများကို တာဝန်ယူဆောင်ရွက် လျက်ရှိသည့်စီမံကိန်းနှင့် ဘဏ္ဍာရေးဝန်ကြီးဌာနမှပြည်ထောင်စုဝန်ကြီး၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ၊ မန္တလေးတိုင်းဒေသကြီးနှင့် မကွေးတိုင်းဒေသကြီးမှ စီးပွားရေးဝန်ကြီးများ၊ ပြည်သူ့ လွှတ်တော်နှင့် အမျိုးသားလွှတ်တော်တို့မှ ကိုယ်စားလှယ်များ၊  အမြဲတမ်းအတွင်းဝန်များ၊ အေအီးစီနှင့်  စပ်လျဉ်းသည့် ဝန်ကြီးဌာနများမှ အရာထမ်း/ အမှုထမ်းများ ၊ ပါရမီစကားဝိုင်းအဖွဲ့မှ တာဝန်ရှိပုဂ္ဂိုလ်များ ၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်း ရှင်များအသင်းချုပ်( UMFCCI ) နှင့် စီးပွားရေးတက္ကသိုလ်တို့မှ ကိုယ်စားလှယ်များအပါအဝင် စုစုပေါင်း(၂၀၀) ဦးခန့် တက်ရောက်ခဲ့ကြပါသည်။

အဆိုပါအလုပ်ရုံဆွေးနွေးပွဲ ဖွင့်ပွဲအခမ်းအနားတွင် စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးမှ အဖွင့်အမှာစကားပြောကြားရာ၌ အာဆီယံသည် ရှည်လျားသော သမိုင်းကြောင်း တစ်လျှောက် မားမားမတ်မတ်ရပ်တည်နိုင်ခဲ့ပြီး နိုင်ငံတကာတွင်  လျင်မြန်စွာ ဖွွံ့ဖြိုး တိုးတက်လာသည့် အဖွဲ့ကြီးအဖြစ် အသိအမှတ်ပြုခံရသည့် Key Drivers များစွာရှိရာ အဓိက တစ်ချက်ကတော့ တစ်ခုတည်းသောအမြင်၊ တစ်ခုတည်းသောအသိုက်အဝန်း( One Vision One Community)အဖြစ် ဆောင်ရွက်ခဲ့တာဖြစ်ပါကြောင်း၊ အာဆီယံခေါင်းဆောင်များမှ လက်မှတ် ရေးထိုးခဲ့သည့် စီဘူးကြေညာချက်မှ အာဆီယံအသိုက်အဝန်းကြီး စတင်ဖြစ်ပေါ်လာပါကြောင်း၊ ၁၉၉၂ ခုနှစ်တွင် အာဆီယံလွတ်လပ်သော ကုန်သွယ်မှုဒေသသဘောတူညီချက် စတင်ခြင်းမှအစပြုခဲ့ ရာမှ ယနေ့တွင်အာဆီယံသည် ကမ္ဘာ့အဓိကစီးပွားရေး နိုင်ငံများနှင့်လည်းကောင်း၊ ဖွွံ့ဖြိုးပြီးနိုင်ငံများနှင့်လည်းကောင်း၊ လွတ်လပ်သောကုန်သွယ်မှု သဘောတူစာချုပ် ချုပ်ဆိုနိုင်ခဲ့ပြီးလွတ်လပ်သော ကုန်သွယ်မှုဒေသကို ထူထောင်၍ အကောင်အထည်ဖော်လျက်ရှိပါကြောင်း၊ အေအီးစီ အကောင်အထည်ဖော်မှုကြောင့် လူမှုစီးပွားကွာဟမှုလျော့နည်းရန် ဆောင်ရွက်လျက်ရှိသည့် အာဆီယံကနဦးပေါင်းစည်းမှုလုပ်ငန်းစဉ်နှင့်  စီးပွားရေးပူးပေါင်းဆောင်ရွက်မှုအစီအစဉ်များမှ တစ်ဆင့် နည်းပညာဆိုင်ရာ အကူအညီများ လက်ခံရရှိခြင်းနှင့် လူ့စွမ်းအားအရင်းအမြစ်များ ဖွွံ့ဖြိုး  တိုးတက်လာပါကြောင်း၊ အာဆီယံနိုင်ငံများ၏ စီးပွားရေးဖော်ဆောင်ရာ၌ မတူညီသောစီးပွားရေး၊ မတူညီသောအယူအဆ၊ မတူညီသောအခြေခံအဆောက်အအုံများဖြင့် ဖွဲ့စည်းထားသောအာဆီယံတွင် အားလုံးတန်းတူညီမျှ ဖြစ်စေရေး၊ သာတူညီမျှဖြစ်စေရေး ကြိုးစားနေကြသော်လည်း မတူညီသည့် အဆိုပါ အခြေခံအချက်များကြောင့် အချို့နိုင်ငံများသည် ရှေ့သို့ ရောက်ရှိနေပြီးအချို့မှာနောက်ကျ ကျန်နေဆဲဖြစ်ပါကြောင်း၊  အာဆီယံစီးပွားရေးအသိုက်အဝန်း ထူထောင်မှုသည် Event တစ်ခု မဟုတ်ဘဲ Process တစ်ခုဖြစ်ပါကြောင်း၊ ၂၀၁၅ ခုနှစ်၌ အာဆီယံအသိုက်အဝန်း ထူထောင် ပြီးနောက် ၂၀၂၅ ခုနှစ်အထိဆက်လက်လျှောက်လှမ်းသွားရန် ရည်မှန်း၍ ၂၀၁၅ ခုနှစ်၌ ကျင်းပသည့် (၂၇)ကြိမ်မြောက် အာဆီယံထိပ်သီးအစည်းအဝေး၌ ခေါင်းဆောင်ကြီးများမှ အေအီးစီ ၂၀၂၅ အတွက် လမ်းပြမြေပုံ (AEC Blueprint 2025) ကိုအတည်ပြုချမှတ်ခဲ့ကြပါကြောင်း၊ အေအီးစီ ၂၀၂၅ သည် အာဆီယံ၏ ဒုတိယမြောက်ခရီးပန်းတိုင်ဖြစ်ပါကြောင်း၊ အေအီးစီ ၂၀၂၅ တွင် ဆောင်ရွက်ရမည့်လုပ်ငန်းများသည် အေအီးစီ ၂၀၁၅ အကောင်အထည်ဖော်ရာ၌ မပြီးပြတ်သေးသည့် ကိစ္စရပ်များအားဆက်လက်ဆောင်ရွက်ခြင်း၊ ဆောင်ရွက်ဆဲကဏ္ဍများအပေါ် Upgrade ပြုလုပ် ခြင်းများ ပါဝင်ပါကြောင်း၊ အသစ်ထည့်သွင်းသောကိစ္စရပ်များပါဝင်ပြီးကဏ္ဍများကတော့ MSMEs ကိုဖွွံ့ဖြိုးတိုးတက်အောင် ဆောင်ရွက်ရန်၊ ကောင်းမွန်သောစီမံမှုလုပ်ထုံးလုပ်နည်းအလေ့အထများ (Good Regulatory Practice)အား  အားပေးမြှင့်တင်ရန်၊ သဘာဝပတ်ဝန်းကျင်အားထိခိုက်မှု မရှိသောရေရှည်ဖွံ့ဖြိုးတိုးတက်မှု (Sustainable Economic Development) ကိုအားပေးရန်နှင့်  ဒစ်ဂျစ်တယ်စနစ်စီးပွားရေးလုပ်ငန်းများ (Digital Economy)စသည်တို့ ဖြစ်ပါကြောင်း၊ အေအီးစီအောင်မြင်ရန် မြန်မာနိုင်ငံသည် အာဆီယံ၏ cell  တစ်ခုဖြစ်သည့်အတွက် Highly Integrated and Cohesive Economy ကိုဖော်ဆောင်ရမှာဖြစ်ပါကြောင်း၊ မိမိတို့အနေဖြင့်  အာဆီယံအတွက်စဉ်းစားဆောင်ရွက်ခြင်းသည် မြန်မာနိုင်ငံအတွက် စဉ်းစားဆောင်ရွက်ခြင်းပင် ဖြစ်ပါကြောင်း၊မိမိတို့နိုင်ငံကဲ့သို့ ဖွွံ့ဖြိုးဆဲနိုင်ငံများအနေဖြင့်  အေအီးစီဖော်ဆောင်ရာ၌ စိန်ခေါ်မှုများ၊ အခက်အခဲများ အများအပြားရှိနေသေးတာကို လက်ခံပါကြောင်း၊ ယခုကျင်းပသည့် အလုပ်ရုံ ဆွေးနွေးပွဲ၌ ထိုအခက်အခဲ၊ စိန်ခေါ်မှုများကိုပွင့်ပွင့်လင်းလင်းနှီးနှောဖလှယ်ဆွေးနွေးကြပြီး Cluster အသီးသီးမှ တာဝန်ရှိသူများသည် အေအီးစီကို ဆက်လက်အကောင်အထည် ဖော်ဆောင်ရွက်ခြင်း အားဖြင့် တန်ဖိုးထားမြှင့်တင်ရာရောက်သည့်အပြင် မြန်မာနိုင်ငံ၏သမိုင်းမှာလည်း မှတ်တမ်းတင်ရာ ရောက်မည် ဖြစ်ပါကြောင်း၊ ယခုအလုပ်ရုံဆွေးနွေးပွဲ၌ စိန်ခေါ်မှုများကိုပွင့်ပွင့်လင်းလင်းဆွေးနွေးပြီး မြန်မာနိုင်ငံ ဖွွံ့ဖြိုးတိုးတက်မှုအတွက် အတွေးအမြင်သစ်တွေ ၊ အခြေခံကောင်းတွေ ရရှိစေပါကြောင်း ပြောကြားခဲ့ပါသည်။
 

၂၀၁၇ ခုနှစ်၊  သြဂုတ်  ၂၂ 
(သတင်းစဉ်)