နေပြည်တော်၊ မတ်လ ၂၈

          စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်းသည် တရုတ်ပြည်သူ့ သမ္မတနိုင်ငံ၊ ယူနန်ပြည်နယ် ၊ ပါတီကော်မတီ အမြဲတမ်းကော်မတီဝင်၊ အမြဲတမ်း ဒုတိယပြည်နယ် အုပ်ချုပ်ရေးမှူး Mr. Zong Guo Ying  ဦးဆောင်သော ကိုယ်စားလှယ်အဖွဲ့အား ယနေ့နံနက်       (၈)နာရီခွဲအချိန်တွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၂၆)၌ လက်ခံတွေ့ဆုံခဲ့ပါသည်။

          ထိုသို့ တွေ့ဆုံရာတွင် ယူနန်ပြည်နယ်နှင့် မြန်မာနိုင်ငံအကြား စီးပွားရေး၊ ကုန်သွယ်ရေးနှင့်  ရင်းနှီးမြှုပ်နှံမှုကဏ္ဍတို့တွင် ပူးပေါင်းဆောင်ရွက်မှုများ ပိုမိုနက်ရှိုင်းစွာ ဆောင်ရွက်နိုင်ရန်၊ မြန်မာ နိုင်ငံမှ လယ်ယာထွက်ကုန်ပစ္စည်းများ ယူနန်ပြည်နယ်သို့ တင်ပို့ရာတွင် ပိုမိုလွယ်ကူချောမွေ့စေရန် နှင့် ချစ်ကြည်ရင်းနှီးသော ကူးလူးဆက်ဆံမှုကို တိုးမြှင့်နိုင်ရေးကိစ္စရပ်များနှင့် စပ်လျဉ်း၍ ဆွေးနွေး ခဲ့ကြသည်။

အဆိုပါတွေ့ဆုံပွဲသို့ စီမံကိန်းနှင့် ဘဏ္ဍာရေးဝန်ကြီးဌာန၊ အမြဲတမ်းအတွင်းဝန်၊ ညွှန်ကြား ရေးမှူးချုပ်များနှင့် ဌာနဆိုင်ရာတာဝန်ရှိသူများ တက်ရောက်ခဲ့ကြကြောင်း သတင်းရရှိသည်။

(သတင်းစဉ်)