နေပြည်တော် ၊ စက်တင်ဘာ  ၁၄

အစိုးရကဏ္ဍအတွက် နိုင်ငံတကာကျင့်သုံးမည့် ဘဏ္ဍာရေးရှင်းတမ်းပုံစံများနှင့်ကိုက်ညီစေရန်၊ မြန်မာနိုင်ငံ၏ ဘဏ္ဍာရေးအစီရင်ခံစာများ ပိုမိုတိုးတက်ဖွံ့ဖြိုးလာစေရန်နှင့် စာရင်းကိုင်စနစ် ပိုမိုတိုးတက်ကောင်းမွန်စေရန်တို့အတွက် ရည်ရွယ်၍ စီမံကိန်းနှင့်ဘဏ္ဍာရေးဝန်ကြီးဌာနနှင့် ပြည်ထောင်စု စာရင်းစစ်ချုပ်ရုံးတို့က ပူးပေါင်းဖွင့်လှစ်သည့် နိုင်ငံပိုင်ကဏ္ဍအတွက် နိုင်ငံတကာ စာရင်းစံများ၊ ငွေသားအခြေခံအပိုင်း (၁) သင်တန်းဆင်းပွဲအခမ်းအနားကို ယနေ့၊ နံနက် (၉:၃၀) နာရီတွင် နေပြည်တော်ရှိ စီမံကိန်းနှင့် ဘဏ္ဍာရေးဝန်ကြီးဌာန၊ စုပေါင်းခန်းမ၌ ကျင်းပသည်။ သင်တန်းဆင်းပွဲ အခမ်းအနားသို့ စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်၊ ဥပဒေရေးရာဝန်ကြီးဌာန၊ ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦး၊ ပြည်ထောင်စုစာရင်းစစ်ချုပ် ဦးတင်ဦး၊ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းနှင့် ဒေါ်သန်းသန်းလင်း၊ ဌာနအကြီးအကဲများ၊ သင်တန်းနည်းပြများ၊ ရသုံးမှန်းခြေငွေစာရင်းဦးစီးဌာနနှင့် ငွေတိုက်ဦးစီးဌာနတို့မှ သင်တန်းသား/သင်တန်းသူများ တက်ရောက်ကြသည်။ သင်တန်းဆင်းပွဲအခမ်းအနားတွင် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်နှင့် ပြည်ထောင်စုစာရင်းစစ်ချုပ် ဦးတင်ဦးတို့က အမှာစကားများ ပြောကြားကြသည်။ ယခုသင်တန်းတွင် ပို့ချပေးခဲ့သော နိုင်ငံတကာစာရင်းကိုင်စနစ်ဖြစ်သည့် IPSAS ကို လိုက်နာဆောင်ရွက်ခြင်းဖြင့် ရသုံးခန့်မှန်းခြေစာရင်းနှင့် အမှန်စာရင်းနှိုင်းယှဉ်တင်ပြရာတွင် ရှင်းလင်းချက် (Disclosure Notes) များအား ပိုမိုအသေးစိတ်ရေးသားနိုင်ပြီး၊ ပြည့်စုံပြီးပွင့်လင်းမြင်သာမှုရှိသည့် ဘဏ္ဍာရေးရှင်းတမ်းကို ရေးဆွဲတင်ပြနိုင်မည်ဖြစ်ပါသည်။ ထို့ပြင် IPSAS ကို အပြည့်အဝ လိုက်နာကျင့်သုံးခြင်းဖြင့် ရရန်ပိုင်ခွင့် (Assets) နှင့် ပေးရန်တာဝန်များ (Liabilities)၊ ရရန်ရှိ/ပေးရန်ရှိ စာရင်း (receivable/ payable) များကိုပါ ပြုစုနိုင်မည်ဖြစ်၍ အရအသုံးခန့်မှန်းခြေငွေစာရင်းများ စိစစ်ရာတွင် ပိုမိုပြည့်စုံခိုင်မာသောအချက်အလက်များ ရရှိဆောင်ရွက်နိုင်မည်ဖြစ်ပါသည်။ ထို့အပြင် ဘတ်ဂျက်အကောင်အထည်ဖော်မှုနှင့် အစီရင်ခံတင်ပြမှု (Effective Budget Execution and Financial Report) ဆောင်ရွက်ရာတွင် အထောက်အကူပြုနိုင်မည်ဖြစ်သည့်အပြင် ပြည်ထောင်စုဘဏ္ဍာရန်ပုံငွေစာရင်းပေါင်းချုပ်နှင့် အကောင်အထည်ဖော်မှုအား စောင့်ကြည့်အစီရင်ခံတင်ပြရာတွင် ပေါင်းစည်းဘဏ္ဍာရေးရှင်းတမ်းများ (Consolidated Financial Statements) ရေးဆွဲခြင်းနှင့် ဘဏ္ဍာရေးအစီရင်ခံစာ တင်ပြခြင်းတို့၌ နိုင်ငံတကာက ကျင့်သုံးဆောင်ရွက်နေသည့် IPSAS, Cash-Basis စနစ်ဖြင့် ဆောင်ရွက်နိုင်မည့် အကျိုးရလဒ်များ ရရှိမည်ဖြစ်ပါသည်။ သင်တန်းကာလမှာ ရက်သတ္တပတ် (၁၄) ပတ်ကြာမြင့်ပြီး၊ သင်တန်းသား/သင်တန်းသူ (၁၀၀) ဦး တက်ရောက်ခဲ့ကြပါသည်။ သင်တန်းတွင် ထူးချွန်ဆုရရှိသူများအား  ပြည်ထောင်စုဝန်ကြီး ဦးဝင်းရှိန်၊ ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦးနှင့် ပြည်ထောင်စုစာရင်းစစ်ချုပ် ဦးတင်ဦးတို့က ဆုများ အသီးသီးချီးမြှင့်ကြပြီး၊ ဒုတိယဝန်ကြီး ဦးမောင်မောင်ဝင်းက သင်တန်းဆင်းလက်မှတ်များ ပေးအပ်ခဲ့ကြောင်း သတင်းရရှိသည်။(သတင်းစဉ်)