ဂျပန်နိုင်ငံအစိုးရ၏ ODA ချေးငွေ ဂျပန်ယန်း ၂၃.၉၇၉  ဘီလီယံဖြင့် မြန်မာနိုင်ငံ ၏ လူမှု-စီးပွားဖွံ့ဖြိုးတိုးတက်ရေးအတွက် ပြည်နယ်နှင့်တိုင်းဒေသကြီးများတွင် လမ်း၊ တံတား၊ လျှပ်စစ်နှင့် ရေရရှိရေးစသည့် အခြေခံအဆောက်အအုံကဏ္ဍ ဖွံ့ဖြိုးတိုးတက်ရေး နှင့် ပြန်လည်ပြုပြင်ရေးလုပ်ငန်းများ ဆောင်ရွက်နိုင်ရန် ဆင်းရဲမှု လျှော့ချရေးဆိုင်ရာ ဒေသတွင်း ဖွံ့ဖြိုးမှု စီမံကိန်း အဆင့်-၂ (Regional Development Project for Poverty Reduction - Phsase II) MY-P 17 နှင့် စပ်လျဉ်းသည့် ပထမအကြိမ် စီမံကိန်း ဦးဆောင် ကော်မတီ (Project Steering Committee-PSC) အစည်းအဝေးကို စီမံကိန်းနှင့် ဘဏ္ဍာရေးဝန်ကြီးဌာန၊ အမြဲတမ်းအတွင်းဝန်မှ ဦးဆောင်၍ ၂၂-၃-၂၀၁၈ ရက်နေ့၊ နံနက် (၁၀း၀၀) နာရီတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ် (၁)၊ နေပြည်တော်တွင် ကျင်းပပြုလုပ်ခဲ့ပါသည်။

အဆိုပါအစည်းအဝေးသို့ စီမံကိန်း အကောင်အထည်ဖော်ဆောင်ရွက်လျက်ရှိသည့် သက်ဆိုင်ရာဌာနများဖြစ်သော ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ လျှပ်စစ် ဓါတ်အားဖြန့်ဖြူးရေးလုပ်ငန်း၊ မန္တလေးလျှပ်စစ် ဓါတ်အားပေးရေး ကော်ပိုရေးရှင်း၊ လမ်းဦးစီးဌာန၊ သက်ဆိုင်ရာ ပြည်နယ်/တိုင်းဒေသကြီး စီမံကိန်းရေးဆွဲရေး ဦးစီးဌာနမှ ညွှန်ကြားရေးမှူးများ၊ JICA မှ တာဝန်ရှိ ပုဂ္ဂိုလ်များပါဝင်၍  စုစုပေါင်း(၃၅)ဦးခန့် ပါဝင် တက်ရောက်ခဲ့ကြပါသည်။

အဆိုပါ အစည်းအဝေးတွင် ဂျပန်နိုင်ငံအစိုးရ၏ ODA ချေးငွေ ဂျပန်ယန်း ၁၇  ဘီလီယံဖြင့် ဆင်းရဲမှု လျှော့ချရေးဆိုင်ရာ ဒေသတွင်းဖွံ့ဖြိုးမှုစီမံကိန်း အဆင့် - ၁ (Regional Development Project for Poverty Reduction) MY-P 1 နှင့် စပ်လျဉ်း၍ အကောင်အထည်ဖော်ဆောင်ရွက်ခဲ့သည့် သက်ဆိုင်ရာဌာနများမှ စီမံကိန်း​တိုးတက်မှုအခြေအနေများ၊ ဆောင်ရွက် ပြီးစီးမှုများနှင့် အခက်အခဲများနှင့် ရှေ့ဆက်လက် ဆောင်ရွက်မည့် စီမံကိန်း အဆင့်-၂ (MY-P 17) အတွက် လုပ်ငန်းစဉ်များ၊ ဆောင်ရွက် ရန် လျာထားမှုများကို ရှင်းလင်းဆွေးနွေး ပြောကြားခဲ့ပါသည်။