စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်သည် ၂၀၂၁ ခုနှစ်၊ မေလ ၃ ရက်နေ့၊ နံနက် ၉ နာရီတွင် Virtual စနစ်ဖြင့် ကျင်းပသည့် (၂၄) ကြိမ်မြောက် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများအစည်းအဝေးသို့ နေပြည်တော်ရှိ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနမှ ပါဝင်တက်ရောက်သည်။ ယင်းအစည်းအဝေးသည် ၃-၅-၂၀၂၁ မှ ၅-၅-၂၀၂၁ ရက်နေ့အထိ Virtual စနစ်ဖြင့် ကျင်းပလျက်ရှိသည့် (၅၄) ကြိမ်မြောက် အာရှဖွံ့ဖြိုးရေးဘဏ်နှစ်ပတ်လည်အစည်းအဝေးနှင့် ဆက်စပ်ကျင်းပခြင်းဖြစ်သည်။ ယခုနှစ်ကျင်းပသည့် အစည်းအဝေးအား     ဘရူနိုင်းဒါရူဆလမ်နိုင်ငံနှင့် ကိုရီယားသမ္မတနိုင်ငံ တို့က အလှည့်ကျ ပူးတွဲသဘာပတိများအဖြစ် တာဝန်ယူကျင်းပခြင်းဖြစ်သည်။ အစည်းအဝေးတွင် ကိုဗစ်-၁၉ ကပ်ရောဂါကြောင့် အာဆီယံ+၃ ဒေသတွင်း စီးပွားရေးတိုးတက်မှုကျဆင်းခဲ့ခြင်းနှင့် ကုစားမှုအစီအစဉ်များအပေါ် ပြန်လည်သုံးသပ်ပြီး၊ ရေရှည်တွင် ခံနိုင်ရည်ရှိသည့် စဉ်ဆက်မပြတ် တိုးတက်မှုရရှိစေရေးအတွက် အားလုံးပါဝင်ဆောင်ရွက်သွားမည့် နည်းလမ်းများအား ရှာဖွေဖော် ထုတ်နိုင်ရေးကိစ္စရပ်များ၊ ဒေသတွင်းစီးပွားရေးတိုးတက်မှုနှင့် ဘဏ္ဍာရေးကဏ္ဍတည်ငြိမ်မှုရှိလာစေ ရေးတို့အတွက် အကောင်အထည်ဖော်ဆောင်ရွက်နေမှုအခြေအနေများနှင့်စပ်လျဉ်း၍ အာဆီယံ+၃ နိုင်ငံများနှင့်အတူ IMF, ADB, AMRO တို့က အမြင်ချင်းဖလှယ် ဆွေးနွေးခဲ့ကြပါသည်။ အစည်းအဝေးအစီအစဉ်အရ ချင်းမိုင်အစီအစဉ်တွင် နိုင်ငံစုံပါဝင်လာရေးလုပ်ငန်းစဉ် (Chiang Mai Initiative Multilateralisation– CMIM) သဘောတူညီချက်ပြင်ဆင်ခြင်းကို အတည်ပြုခြင်း၊ အာဆီယံ+၃ မက်ခရိုစီးပွားရေးသုတေသနရုံး (ASEAN+3 Macroeconomic Research Office – AMRO) ၏ လုပ်ငန်းဆောင်ရွက်မှုများ၊ အာရှဒေသငွေချေးစာချုပ်ဈေးကွက်ဖွံ့ဖြိုးရေးအစီ အစဉ်များ (Asian Bond Markets Initiatives – ABMI) ၏ ဖွံ့ဖြိုးတိုးတက်မှုအခြေအနေများ၊ အာဆီယံ+၃ ဘဏ္ဍာရေးပူးပေါင်းဆောင်ရွက်ရေးလုပ်ငန်းစဉ်၏ အနာဂတ်ဦးစားပေးအစီအစဉ်များ အဖြစ် လုပ်ငန်းအဖွဲ့ (၄) ခု ဖွဲ့စည်းခြင်းအား အတည်ပြုခြင်းစသည်တို့ကို တက်ရောက်လာကြသည့် အာဆီယံ (၁၀) နိုင်ငံနှင့် အပေါင်း (၃) နိုင်ငံများဖြစ်ကြသည့် တရုတ်ပြည်သူ့သမ္မတနိုင်ငံ၊ ဂျပန်နိုင်ငံ နှင့် ကိုရီးယားသမ္မတနိုင်ငံတို့မှ ဘဏ္ဍာရေးဝန်ကြီးများနှင့်ဗဟိုဘဏ်ဥက္ကဋ္ဌများ၊ IMF, ADB နှင့် AMRO တို့မှ စီးပွားရေးပညာရှင်များက ညှိနှိုင်းဆွေးနွေးခဲ့ကြပါသည်။
အစည်းအဝေးတွင် ပြည်ထောင်စုဝန်ကြီးက ပါဝင်ဆွေးနွေးရာ၌ ကိုဗစ်-၁၉ ကပ်ရောဂါ၏ သက်ရောက်မှုကို တုံ့ပြန်ဆောင်ရွက်ရာတွင် တစ်နိုင်ငံချင်းအလိုက်သော်လည်းကောင်း၊ အာဆီယံ+၃ ဒေသအလိုက်သော်လည်းကောင်း တုံ့ပြန်ဆောင်ရွက်ကြသကဲ့သို့ မိတ်ဖက်အဖွဲ့အစည်းများဖြစ်ကြ သည့် နိုင်ငံတကာငွေရေးကြေးရေးအဖွဲ့အစည်းများနှင့်ပူးပေါင်း၍လည်း တုံ့ပြန်ဆောင်ရွက်လျက်ရှိ ကြောင်း၊ အာဆီယံ+၃ အဖွဲ့ဝင်နိုင်ငံဖြစ်သော မြန်မာနိုင်ငံတွင်လည်း ကိုဗစ်-၁၉ ရောဂါသက်ရောက် မှုကြောင့် နိုင်ငံ၏ဖွံ့ဖြိုးတိုးတက်မှုကို ထိခိုက်ခဲ့ကြောင်း၊ ကိုဗစ်-၁၉ ကပ်ရောဂါ၏စိန်ခေါ်မှုများကို ကျော်လွှားနိုင်ရေးအတွက် မြန်မာအစိုးရအနေဖြင့်  Comprehensive Economic Stimulus Plan တစ်ခုအဖြစ် COVID-19 Economic Relief Plan (CERP) ကို ချမှတ်ဆောင်ရွက်လျက်ရှိကြောင်း၊ CERP သည် ကိုဗစ်-၁၉ ကပ်ရောဂါ၏သက်ရောက်မှုကြောင့် ထိခိုက်ခဲ့သည့် စီးပွားရေးလုပ်ငန်းများ ကို ကုစားပေးနိုင်ရန်နှင့် စီးပွားရေးပြန်လည်နာလန်ထူလာမှုကို အထောက်အကူပြုရန် ရေးဆွဲထား ခြင်းဖြစ်ကြောင်း၊ ဒေသတွင်းပြန်လည်ထူထောင်ရေးနှင့် ရေရှည်ဖွံ့ဖြိုးတိုးတက်မှုရရှိရေးအတွက် မြန်မာနိုင်ငံအနေဖြင့် အာဆီယံ+၃ နိုင်ငံများနှင့် နီးကပ်စွာ ဆက်လက်ပူးပေါင်းဆောင်ရွက်သွားမည် 
ဖြစ်ကြောင်း၊ ယင်းသို့ ပူးပေါင်းဆောင်ရွက်ခြင်းဖြင့် ကိုဗစ်-၁၉ ကပ်ရောဂါ၏ သက်ရောက်မှုများကို အာဆီယံ+၃ နိုင်ငံများ၏စုပေါင်းအားဖြင့် ကျော်လွှားနိုင်မည်ဟု ယုံကြည်ပါကြောင်းနှင့် အနာဂတ် မျိုးဆက်သစ်များအတွက် ပိုမိုကောင်းမွန်သည့်အခြေအနေကောင်းများ ဖန်တီးပေးနိုင်ရေးကို ဆက်လက်ကြိုးပမ်းဆောင်ရွက်သွားကြရမည်ဖြစ်ပါကြောင်း ပါဝင်ဆွေးနွေးခဲ့ပါသည်။ ယင်းနောက် အာဆီယံ+၃ ဘဏ္ဍာရေးပူးပေါင်းဆောင်ရွက်ရေးလုပ်ငန်းစဉ်အကောင်အထည် ဖော်ဆောင်ရွက်မှုနှင့်စပ်လျဉ်း၍ တိုးတက်မှုအခြေအနေများနှင့် ရှေ့ဆက်ဆောင်ရွက်မည့် လုပ်ငန်း အစီအစဉ်များပါဝင်သည့် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများ၏ ပူးတွဲ ကြေညာချက် (Joint Statement) ကို အစည်းအဝေးမှ အတည်ပြုပါသည်။ အဆိုပါအစည်းအဝေး သို့ ပြည်ထောင်စုဝန်ကြီးနှင့်အတူ ဒုတိယဝန်ကြီး ဦးမောင်မောင်ဝင်း ပါဝင်တက်ရောက်ခဲ့ပါသည်။ ယင်းနေ့ ၁၅:၃၀ နာရီတွင် Virtual စနစ်ဖြင့် ကျင်းပသည့် Governors' Seminar on Cooperation for a Resilient Future ဆွေးနွေးပွဲသို့  စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း ပါဝင်တက်ရောက်ခဲ့ပါသည်။ ဆွေးနွေးပွဲတွင် အာရှဖွံ့ဖြိုးရေးဘဏ်၊ ဥက္ကဋ္ဌ Mr. Masatsugu Asakawa က ဦးဆောင်၍   အာရှနှင့်ပစိဖိတ်ဒေသ၌ စီးပွားရေးမူးဝါဒများ ပြုပြင်ပြောင်းလဲခြင်းနှင့် ကဏ္ဍစုံဖွံ့ဖြိုးတိုးတက်ရေးအတွက် ဒေသတွင်းပူးပေါင်းဆောင်ရွက်ရေးသည် အားကောင်းသော ဆောင်ရွက်ချက်တစ်ရပ်ဖြစ်ရာ ကိုဗစ်-၁၉ ကပ်ရောဂါ၏သက်ရောက်မှုကြောင့် ထိခိုက်မှုအများဆုံးကြုံခဲ့ရသည့် နယ်စပ်ကုန်သွယ်မှု၊ ရင်းနှီးမြှုပ်နှံမှုနှင့် ခရီးသွားလုပ်ငန်းများ ပြန်လည်ဖွံ့ဖြိုးတိုးတက်လာရေးအတွက် တုံ့ပြန်ဆောင်ရွက် နိုင်မည့်နည်းလမ်းများ၊ digitalization နှင့် innovation တို့ကို အကောင်းဆုံး ဆက်စပ်အသုံးပြုခြင်း အားဖြင့် ခံနိုင်ရည်ရှိပြီး အားလုံးပါဝင်ဆောင်ရွက်သည့် ပြန်လည်ထူထောင်ရေးလုပ်ငန်းစဉ်များ၊ ဒေသ တွင်းပူးပေါင်းဆောင်ရွက်မှုဖြင့် ကပ်ရောဂါ၏ထိခိုက်မှုများမှ ပြန်လည်ရုန်းထနိုင်မည့်အခြေအနေ များ၊ ဒေသတွင်းနှင့် နိုင်ငံတကာပူးပေါင်းဆောင်ရွက်မှုစနစ်များဖြင့် စဉ်ဆက်မပြတ်တိုးတက်မှုရရှိနိုင် ရေး ဆောင်ရွက်သွားမည့်နည်းလမ်းများအား တရုတ်၊ ဂျပန်၊ အိန္ဒိယ၊ ဖိလစ်ပိုင်၊ နယ်သာလန်၊ ဂျော်ဂျီယာနိုင်ငံတို့မှ  ဘဏ္ဍာရေးဝန်ကြီးများ၊ ဒုတိယဝန်ကြီးများနှင့် အာရှဖွံ့ဖြိုးရေးဘဏ်၊ ဥက္ကဌ တို့က အဓိကပါဝင်ဆွေးနွေးခဲ့ကြပါသည်။ ၂၀၂၂ ခုနှစ်၊ သီရိလင်္ကာနိုင်ငံ၊ ကိုလံဘိုမြို့တွင်ကျင်းပမည့် အာရှဖွံ့ဖြိုးရေးဘဏ် နှစ်ပတ်လည် အစည်းအဝေး၌ (၂၅) ကြိမ်မြောက် အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများ အစည်းအဝေးအား ကမ္ဘောဒီးယားနိုင်ငံနှင့် တရုတ်ပြည်သူ့သမ္မတနိုင်ငံတို့က အလှည့်ကျပူးတွဲသဘာပတိများအဖြစ် တာဝန်ယူကျင်းပသွားမည်ဖြစ်ကြောင်း သတင်းရရှိပါသည်။
သတင်းစဉ်