စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် ၂၀၁၈ ခုနှစ် ဖေဖော်ဝါရီလ ၂၈ ရက်နေ့မှ မတ်လ ၃ ရက်နေ့အထိ စင်ကာပူ နိုင်ငံ Shangri La Hotel တွင် ကျင်းပသည့် (၂၄) ကြိမ်မြောက် အာဆီယံစီးပွားရေးဝန်ကြီးများ သီးသန့်အစည်းအဝေးနှင့် ဆက်စပ်အစည်းအဝေးများသို့ ပါဝင်တက် ရောက်သည်။ အဆိုပါအစည်းအဝေးများသို့ အာဆီယံအဖွဲ့ဝင် နိုင်ငံများနှင့် ဆွေးနွေးဘက်နိုင်ငံများမှ စီးပွားရေးဝန်ကြီးများနှင့် ကိုယ်စားလှယ်အဖွဲ့များ၊ အာဆီယံ အတွင်းရေးမှူးချုပ်နှင့် ဝန်ထမ်းများ စုစုပေါင်းကိုယ်စားလှယ် (၁၀၀) ဦးခန့် ပါဝင်တက်ရောက် ကြပြီး ၂၀၁၈ ခုနှစ် အာဆီယံအလှည့်ကျ ဥက္ကဋ္ဌ စင်ကာပူနိုင်ငံ၊ ကုန်သွယ်ရေးနှင့် စက်မှုဝန်ကြီးဌာန ဝန်ကြီး Mr. Lim Hng Kiang က အစည်းအဝေးသဘာပတိအဖြစ် ဆောင်ရွက်သည်။

ပထမဦးစွာ ၂၀၁၈ ခုနှစ် ဖေဖော်ဝါရီလ ၂၈ ရက်နေ့ ညတွင် Dutch Pavilion ခန်းမ၌ ကျင်းပသည့်အလုပ်သဘောညစာစားပွဲတွင် အာဆီယံစီးပွားရေးဝန်ကြီးများမှ စင်ကာပူနိုင်ငံ အာဆီယံ အလှည့်ကျဥက္ကဋ္ဌ တာဝန်ထမ်းဆောင်စဉ်  ၂၀၁၈ ခုနှစ်အတွင်းဦးစားပေးဆောင်ရွက်မည့်စီးပွားရေးဆိုင်ရာကိစ္စရပ်များအပေါ် အတည်ပြုခြင်း၊ (၃၃) ကြိမ်မြောက် အာဆီယံစီးပွားရေးပေါင်းစည်းမှု ဆိုင်ရာ အဆင့်မြင့်လုပ်ငန်းအဖွဲ့ အစည်းအဝေးမှ စီးပွားရေးဝန်ကြီးများထံ တင်ပြသည့် အစီရင်ခံစာ အပေါ် လမ်းညွှန်မှုပေးခြင်းနှင့် မှတ်တမ်းတင်ခြင်း၊ အာဆီယံအတွင်းရေးမှူးချုပ်ရုံးမှ တင်ပြသည့် အေအီးစီလုပ်ငန်းစဉ်များ အကောင်အထည်ဖော်မှု အခြေအနေကို မှတ်တမ်းတင်ခြင်းနှင့် ဆောင်ရွက် ရန် ကျန်ရှိနေသည့် လုပ်ငန်းများကို ပြီးစီးအောင်ဆောင်ရွက်ရန် သက်ဆိုင်ရာ အေအီးစီကဏ္ဍအလိုက် လုပ်ငန်းအဖွဲ့များကို တိုက်တွန်းခြင်းတို့ကို ဆောင်ရွက်ကြသည်။

၂၀၁၈ ခုနှစ် မတ်လ ၁ ရက်နေ့တွင် (၂၄) ကြိမ်မြောက် အာဆီယံစီးပွားရေးဝန်ကြီးများ၏ သီးသန့်အစည်းအဝေးကို Tower Ballroom ၌ ကျင်းပရာ ဝန်ကြီးများမှ အာဆီယံကုန်စည် ကုန်သွယ်ရေး သဘောတူစာချုပ် အကောင်အထည်ဖော်မှု၊ အာဆီယံဝန်ဆောင်မှုဆိုင်ရာမူဘောင် သဘောတူစာချုပ်၏ဒဿမအသုတ်အတွက် ဝန်ဆောင်မှုကဏ္ဍများ ဖြေလျှော့မှုအခြေအနေ၊ အာဆီယံ ဝန်ဆောင်မှု ကုန်သွယ်ရေး သဘောတူစာချုပ် ချုပ်ဆိုရေး ဆွေးနွေးညှိနှိုင်းမှုဆိုင်ရာ ဖြစ်ပေါ်တိုးတက် မှုအခြေအနေများနှင့် ရှေ့ဆက်လက်ဆောင်ရွက်ရန်ကိစ္စများ၊ အာဆီယံနှင့် လွတ်လပ်သော ကုန်သွယ်မှု ဒေသထူထောင်ရန် အလားအလာရှိသည့်နိုင်ငံများအားလေ့လာ ထားသည့်စာတမ်း နှင့်  အာဆီယံ စီးပွားရေး​ အကြံပေး ကောင်စီမှ တင်ပြသည့်အကြံပြုချက်များအပေါ် အမြင်ချင်းဖလှယ် ဆွေးနွေး ကြသည်။

၂၀၁၈ ခုနှစ်၊ မတ်လ ၂ ရက်နေ့တွင် Tower Ballroom ကျင်းပပြုလုပ်သည့် (၁၆) ကြိမ်မြောက် အာဆီယံ စီးပွားရေးဝန်ကြီးများနှင့် အီးယူကုန်သွယ်မှုကော်မရှင်နာတို့ အစည်းအဝေး တွင် ဝန်ကြီးများမှ အာဆီယံ-အီးယူ ကုန်သွယ်မှုနှင့် ရင်းနှီးမြှုပ်နှံမှု လုပ်ငန်းအစီအစဉ် (၂၀၁၇-၂၀၁၈)၏အကောင်အထည်ဖော်မှုအခြေအနေများ အပေါ် မှတ်တမ်းတင်ပြီးနောက် အာဆီယံ-အီးယူ လွတ်လပ်သောကုန်သွယ်မှုဒေသ ထူထောင်နိုင်ရေးအတွက် မူဘောင်ရေးဆွဲနေမှုအခြေအနေအပေါ် ဆွေးနွေးခြင်းနှင့် အစည်းအဝေး၏ ပူးတွဲထုတ်ပြန်ကြေညာချက်အပေါ် အတည်ပြုခြင်းများ ပြုလုပ် သည်။

ထို့နောက် မတ်လ ၃ ရက်နေ့တွင် Island Ballromm တွင် ကျင်းပပြုလုပ်သည့် (၄) ကြိမ် မြောက် ဒေသတွင်း ဘက်စုံစီးပွားရေးပူးပေါင်းဆောင်ရွက်မှု ဝန်ကြီးအဆင့် ကြားဖြတ် ညှိနှိုင်းအစည်း အဝေးတွင် ဒေသတွင်း ဘက်စုံစီးပွားရေးပူးပေါင်းဆောင်ရွက်မှု ကုန်သွယ်ရေးညှိနှိုင်းမှုကော်မတီအစည်းအဝေးမှဝန်ကြီးများထံ တင်ပြသည့်အစီရင်ခံစာ အပေါ် ဆွေးနွေးခဲ့ကြပြီး  ဒေသတွင်း ဘက်စုံ စီးပွားရေးပူးပေါင်းဆောင်ရွက်မှုဆိုင်ရာ ညှိနှိုင်းမှုများ ၂၀၁၈ ခုနှစ်အတွင်း အပြီးသတ်နိုင်ရေးအတွက် ရှေ့ဆက်လက်ဆောင်ရွက်ရန် ကိစ္စများကို လမ်းညွှန်မှုပြုခြင်းနှင့် အစည်းအဝေး ပူးတွဲထုတ်ပြန် ကြေညာချက်ကို အတည်ပြုခြင်းများဆောင်ရွက်သည်။

(၂၄) ကြိမ်မြောက် အာဆီယံစီပွားရေးဝန်ကြီးများသီးသန့်အစည်းအဝေးမတိုင်မီ၂၇-၂-၂၀၁၈ ရက်နေ့တွင် အာဆီယံအဆင့်မြင့်စီးပွားရေးအရာရှိများ၏အကြိုညှိနှိုင်းကို အစည်းအဝေး ကျင်းပခဲ့ပြီး ယင်းအစည်းအဝေးသို့စီမံကိန်းနှင့်ဘဏ္ဍာရေးဝန်ကြီးဌာနမှ ကိုယ်စားလှယ်အဖွဲ့ပါဝင်တက်ရောက်ခဲ့သည်။