စီမံကိန်းနှင့်ဘဏ္ဍာရေးဝန်ကြီးဌာန၊ မြန်မာ့အာမခံလုပ်ငန်းရုံးချုပ်တွင် မြန်မာ့အာမခံလုပ်ငန်းနှင့် အိန္ဒိယနိုင်ငံအစိုးရပိုင် အထွေထွေအာမခံကော်ပိုရေးရှင်းတို့ နားလည်မှုစာချွန်လွှာ (MoU) ချုပ်ဆိုပွဲအခမ်းအနားကို ယနေ့ (၆.၆.၂၀၁၈) ရက်နေ့ ညနေ (၄:၀၀) နာရီ တွင် ကျင်းပပြုလုပ်ရာ အာမခံလုပ်ငန်းကြီးကြပ်ရေးအဖွဲ့ အတွင်းရေးမှူး ဦးဇော်နိုင်နှင့် IBRB အဖွဲ့ဝင်များ၊ မြန်မာ့အာမခံလုပ်ငန်းမှ ဦးဆောင်ညွှန်ကြားရေးမှူး ဒေါက်တာစန္ဒာဦးနှင့် ဌာနအကြီးအကဲများ၊ အရာထမ်းများ၊ အိန္ဒိယနိုင်ငံအစိုးရပိုင် အထွေထွေအာမခံကော်ပိုရေးရှင်းမှ Chairman Cum Managing Director Ms. Alice Vaidyan နှင့် အဖွဲ့ဝင်များ၊ ဖိတ်ကြားထားသော ဧည့်သည်တော်များ တက်ရောက်ကြပါသည်။

        အဆိုပါအခမ်းအနားတွင် မြန်မာ့အာမခံလုပ်ငန်း ဦးဆောင်ညွှန်ကြားရေးမှူးနှင့် အိန္ဒိယနိုင်ငံပိုင်အထွေထွေအာမခံကော်ပိုရေးရှင်း ဦးဆောင်ညွှန်ကြားရေးမှူးက အမှာစကား အသီးသီးပြောကြားရာတွင် ယခု MoU ထိုးပွဲသည် အိန္ဒိယ-မြန်မာနိုင်ငံကြား ပူးပေါင်း ဆောင်ရွက်မှု၏ရလဒ်ဖြစ်သော အိန္ဒိယနိုင်ငံအစိုးရပိုင် အထွေထွေအာမခံကော်ပိုရေးရှင်းနှင့် မြန်မာ့အာမခံလုပ်ငန်းတို့၏ လုပ်ငန်းအဖွဲ့အစည်းဖွံ့ဖြိုးတိုးတက်စေရန်နှင့် ဥပဒေများ ပြင်ဆင် ခြင်း၊ တစ်ဆင့်အာမခံလုပ်ငန်းများဆောင်ရွက်ရန်၊ မြန်မာအမျိုးသားဖွံ့ဖြိုးတိုးတက်ရေးအတွက် လူမှုရေးအရ အာမခံအကာအကွယ်ဖြင့် ဆောင်ရွက်နိုင်ရန်၊ အဖွဲ့အစည်း၊ ဝန်ထမ်းနှင့်ဥပဒေ အပါအဝင် အခြားစွမ်းဆောင်ရည်မြှင့်တင်ရေးကဏ္ဍတို့တွင် အိန္ဒိယနိုင်ငံပိုင်အထွေထွေအာမခံ ကော်ပိုရေးရှင်း၏ အတွေ့အကြုံများကို မျှဝေပေးရန်ရည်ရွယ်၍ နှစ်နိုင်ငံအစိုးရအဖွဲ့အစည်းများ အဖြစ် ပူးပေါင်းဆောင်ရွက်ခြင်းဖြစ်ပါကြောင်း ပြောကြားသွားပါသည်။

       ယင်းနောက်နားလည်မှုစာချွန်လွှာအားမြန်မာ့အာမခံလုပ်ငန်း၏ ဦးဆောင်ညွှန်ကြားရေးမှူး ဒေါက်တာစန္ဒာဦးနှင့် GIC Re မှ Chairman Cum Managing Director Ms. Alice Vaidyan တို့က လက်မှတ်ရေးထိုးလဲလှယ်ခဲ့ကြပါသည်။