“ဝန်ထမ်းနောင်ရေး ဗဟိုရန်ပုံငွေ ဥပဒေကြမ်း ပြန်လည်စိစစ်ရေးနှင့် နည်းဥပဒေရေးဆွဲရေးဆပ် ကော်မတီ”၏ (၁/၂၀၂၄) ကြိမ်မြောက် အစည်းအဝေးအား စီမံကိန်းနှင့် ဘဏ္ဍာရေးဝန်ကြီးဌာန၊ ရုံး အမှတ်(၃၄)၊အပေါ်ထပ်အစည်းအဝေးခန်းမတွင် နံနက်(၁၀:၀၀)နာရီ၌ ကျင်းပပြုလုပ်ခဲ့ရာ ဝန်ထမ်းနောင်ရေးဗဟိုရန်ပုံငွေဥပဒေကြမ်း ပြန်လည်စိစစ်ရေးနှင့် နည်းဥပဒေရေးဆွဲရေးဆပ်ကော်မတီ ဥက္ကဋ္ဌ၊ ပင်စင်ဦးစီးဌာန၊ညွှန်ကြားရေးမှူးချုပ် ဦးရဲညွန့်နှင့် ဆပ်ကော်မတီဝင်များ ဖြစ်ကြသည့် သက်ဆိုင်ရာဌာနများမှ ညွှန်ကြားရေးမှူးများနှင့် ဒုတိယညွှန်ကြားရေးမှူးများ စုံညီစွာတက်ရောက်ကြသည်။

အစည်းအဝေးတွင် ပင်စင်ဦးစီးဌာန၊ ညွှန်ကြားရေးမှူးချုပ်က အဖွင့်အမှာစကားပြောကြားရာ၌ ဝန်ထမ်းနောင်ရေးဗဟိုရန်ပုံငွေဥပဒေကြမ်းနှင့်စပ်လျဉ်း၍ ဥပဒေကြမ်းပါပုဒ်မများနှင့် ဆက်စပ်သည့် ဌာန(၅)ခုအား ယခင်ဗဟိုကော်မတီဆုံးဖြတ်ချက်များအရ သဘောထားမှတ်ချက်များ တောင်းခံခဲ့ရာ အဆိုပါဌာနများမှ ပေးပို့သည့် သဘောထားမှတ်ချက်များအား သုံးသပ်ပြီး  အကောင်အထည်ဖော် ဆောင်ရာတွင် တွေ့ကြုံရနိုင်မည့် အခက်အခဲများနှင့် လိုအပ်သည်များကို ဆပ်ကော်မတီအတွင်း ပွင့်ပွင့်လင်းလင်း ဆွေးနွေးရန် လိုအပ်ကြောင်းနှင့် ရှေ့ဆက်လက်ဆောင်ရွက်ရမည့် Timeframeပါ လုပ်ငန်းစဉ်များအတိုင်း ဆက်လက်ဆွေးနွေးညှိနှိုင်းကြရန် ဖြစ်ပါကြောင်း ပြောကြားခဲ့ပါသည်။

ဆက်လက်၍ ပင်စင်စနစ်ပြုပြင်ပြောင်းလဲရေးဌာနခွဲ၊ ညွှန်ကြားရေးမှူး ဦးမိုးကြည်က ဝန်ထမ်းနောင်ရေးဗဟိုရန်ပုံငွေဥပဒေကြမ်းနှင့် စပ်လျဉ်း၍ ဌာန(၅)ခုမှ ပေးပို့သည့် သဘောထားမှတ်ချက်များနှင့် အကြံပြုချက်များအား သက်ဆိုင်ရာပုဒ်မတစ်ခုချင်းအလိုက် အသေးစိတ်ရှင်းလင်းတင်ပြရာ အစည်းအဝေးသို့ တက်ရောက်လာကြသည့် ‌ဆပ်ကော်မတီဝင်များမှ လိုအပ်သည်များ အကြံပြုဆွေး နွေးတင်ပြခဲ့ကြသည်။အဆိုပါအကြံပြုဆွေးနွေးချက်များအပေါ် ဆပ်ကော်မတီဥက္ကဋ္ဌက သုံးသပ်ဆွေးနွေး၍ နိဂုံးချုပ်အမှာ စကားပြောကြားပြီး အစည်းအဝေးကို အောင်မြင်စွာ ကျင်းပပြီးစီးခဲ့ပါသည်။