ထိုင်းနိုင်ငံ GPF - Government Pension Fund Board ဥက္ကဋ္ဌ Mr.Prasong Poontane နှင့် မှတ်တမ်းတင်ဓာတ်ပုံရိုက်ကူးခြင်း

သတင်းထုတ်ပြန်ချက်

နေပြည်တော် ဖေဖော်ဝါရီ ၁၆ ရက်

          ဝန်ထမ်းနောင်ရေး ဗဟိုရန်ပုံငွေ အကောင်အထည်ဖော်ရေးကော်မတီ ဥက္ကဋ္ဌ၊ စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ဦးဆောင်သည့် မြန်မာကိုယ်စား လှယ်အဖွဲ့သည် ကမ္ဘာ့ဘဏ်၏ မြန်မာနိုင်ငံ ဒါရိုက်တာရုံးနှင့် ညှိနှိုင်း၍ ထိုင်းနိုင်ငံ Government Pension Fund – GPF စနစ် ဆောင်ရွက်နေမှုများကို  ဖေဖော်ဝါရီလ ၁၂ ရက်နေ့မှ ၁၄ ရက်နေ့အထိ ထိုင်းနိုင်ငံ၊ ဗန်ကောက်မြို့သို့ သွားရောက်လေ့လာခဲ့သည်။

          မြန်မာကိုယ်စားလှယ်အဖွဲ့သည် ဖေဖော်ဝါရီလ ၁၂ ရက်နေ့ နံနက်ပိုင်းတွင် ဗန်ကောက်မြို့ရှိ ကမ္ဘာ့ဘဏ်ရုံးခွဲသို့ သွားရောက်၍ ကမ္ဘာ့ဘဏ်၏ ထိုင်းနိုင်ငံ Country Manager Ms. Brigit Hansl ဦးစီးသော တာဝန်ရှိသူများနှင့်တွေ့ဆုံ၍ မြန်မာနိုင်ငံ၏ပင်စင်စနစ် ပြုပြင်ပြောင်းလဲရေး လုပ်ငန်းစဉ် များတွင် ကမ္ဘာ့ဘဏ်က ပူးပေါင်းပါဝင်ကူညီနိုင်မည့်ကိစ္စရပ်များအား ရင်းနှီးပွင့်လင်းစွာ ဆွေးနွေးကြ သည်။

          ထို့နောက် ထိုင်းနိုင်ငံ အစိုးရပင်စင်ရန်ပုံငွေ (Government Pension Fund – GPF) ရုံးချုပ်သို့ သွားရောက်၍  အထွေထွေအတွင်းရေးမှူးချုပ် Mr. Vitai Ratanakorn  ဦးဆောင်သော တာဝန်ရှိသူ များနှင့်တွေ့ဆုံ၍ မြန်မာနိုင်ငံ၏လက်ရှိပင်စင်စနစ်၊ ပြုပြင်ပြောင်းလဲဆောင်ရွက်မည့် အစီအစဉ်များ နှင့် ပူးပေါင်းဆောင်ရွက်နိုင်မည့် အခြေအနေများကို ဆွေးနွေးကြရာ ထိုင်းနိုင်ငံအစိုးရ ပင်စင်ရန်ပုံငွေ စနစ်အကြောင်း ဒုတိယအထွေထွေအတွင်းရေးမှူးချုပ်က ရှင်းလင်းတင်ပြခဲ့သည်။

ဖေဖော်ဝါရီလ ၁၃ ရက်နေ့ နံနက်ပိုင်းတွင် ထိုင်း GPF မှ တာဝန်ရှိသူများက ထိုင်းနိုင်ငံပင်စင် စနစ်ပြုပြင်ပြောင်းလဲရေးဆိုင်ရာမူဝါဒနှင့် အကောင်အထည်ဖော်မှုလုပ်ငန်းအတွေ့အကြုံများ၊ အစိုးရ ပင်စင်ရန်ပုံငွေ၏ လည်ပတ်ဆောင်ရွက်မှု၊ ရန်ပုံငွေတိုးပွားအောင် ဆောင်ရွက်နေမှုများ၊ တွေ့ကြုံရ သည့်စိန်ခေါ်မှုများနှင့် ကြိုတင်ပြင်ဆင်သင့်သည့်လုပ်ငန်းစဉ်များကို ရှင်းလင်းတင်ပြရာ ဒုတိယ ဝန်ကြီးနှင့် မြန်မာကိုယ်စားလှယ်အဖွဲ့ဝင်များက သိလိုသည်များကိုမေးမြန်းကြသည်။

- ၂ -

မြန်မာကိုယ်စားလှယ်အဖွဲ့သည် ဖေဖော်ဝါရီလ ၁၄ ရက်နေ့၊ နံနက်ပိုင်းတွင် ကမ္ဘာ့ဘဏ်၊ ထိုင်း နိုင်ငံ၊ ဗန်ကောက်ရုံးခွဲ၌ ကမ္ဘာ့ဘဏ်တာဝန်ရှိသူများနှင့် မြန်မာနိုင်ငံ၏ ပင်စင်စနစ်ပြုပြင်ပြောင်းလဲ ရေးနှင့်စပ်လျဉ်း၍ နိုင်ငံတကာပင်စင်စနစ်ပြောင်းလဲမှုများ၊ ထိုင်းနိုင်ငံအတွေ့အကြုံများအပေါ် အခြေ ခံ၍ ဆောင်ရွက်သင့်သည့် ရှေ့လုပ်ငန်းစဉ်များကို ရင်းနှီးပွင့်လင်းစွာ ဆွေးနွေးခဲ့ကြသည်။

မြန်မာကိုယ်စားလှယ်အဖွဲ့သည် ဖေဖော်ဝါရီလ ၁၄ ရက်နေ့ ညနေပိုင်းတွင် ထိုင်းနိုင်ငံ၊ ဘဏ္ဍာရေးဝန်ကြီးဌာနသို့ သွားရောက်၍ ထိုင်းနိုင်ငံ အစိုးရပင်စင်ရန်ပုံငွေဘုတ်အဖွဲ့ ဥက္ကဋ္ဌ အမြဲတမ်းအတွင်းဝန် Mr. Prasong Poontaneat နှင့်တွေ့ဆုံ၍ ပင်စင်စနစ်ပြုပြင်ပြောင်းလဲရေး ဆိုင်ရာကိစ္စရပ်များ၊ ပင်စင်ဆိုင်ရာ ကိစ္စရပ်များတွင် နှစ်နိုင်ငံပူးပေါင်းဆောင်ရွက်နိုင်ရေးနှင့် စပ်လျဉ်း ၍ အမြင်ချင်း ဖလှယ်ဆွေးနွေးခဲ့သည်။

          မြန်မာကိုယ်စားလှယ်အဖွဲ့တွင် ဝန်ထမ်းနောင်ရေး ဗဟိုရန်ပုံငွေ အကောင်အထည်ဖော်ရေး ကော်မတီအတွင်းရေးမှူး ပင်စင်ဦးစီးဌာနညွှန်ကြားရေးမှူးချုပ်၊ ဒေါက်တာဝါဝါမောင်၊ အဖွဲ့ဝင်များ ဖြစ်ကြသော ပြည်ထောင်စုရာထူးဝန်အဖွဲ့ အမြဲတမ်းအတွင်းဝန် ဦးခင်မောင်ဝင်း၊ ပြည်ထောင်စု ရှေ့နေချုပ်ရုံး ၊ ညွှန်ကြားရေးမှူးချုပ် ဒေါက်တာဆွေဆွေအောင်၊ နိုင်ငံတော်သမ္မတရုံး ဒုတိယ ညွှန်ကြားရေးမှူးချုပ် ဦးအောင်လှိုင်မိုးနှင့် ကော်မတီ တွဲဘက်အတွင်းရေးမှူး ပင်စင်ဦးစီးဌာန ဒုတိယညွှန်ကြားရေးမှူးချုပ် ဦးကြည်ဇင်ထွန်းတို့လိုက်ပါခဲ့ကြသည်။

          မြန်မာနိုင်ငံ၏ အစိုးရပင်စင်စနစ်ပြုပြင်ပြောင်းလဲရေးလုပ်ငန်းများ ဆောင်ရွက်နိုင်ရန် စီမံကိန်း၊ ဘဏ္ဍာရေးနှင့်စက်မှုဝန်ကြီးဌာန၊ ဒုတိယဝန်ကြီးဦးမောင်မောင်ဝင်း ဥက္ကဋ္ဌအဖြစ် ဆောင်ရွက်သည့် အဖွဲ့ဝင် (၁၄) ဦးပါ ဝန်ထမ်းနောင်ရေးဗဟိုရန်ပုံငွေ အကောင်အထည်ဖော်ရေးကော်မတီကို နိုင်ငံတော်သမ္မတရုံးက ၁၉-၂-၂၀၁၉ ရက်နေ့တွင် အမိန့်ကြော်ငြာစာ ထုတ်ပြန်၍ ဖွဲ့စည်းထားရှိရာ လိုအပ်သော ဥပဒေမူကြမ်းပြုစုရေးဆွဲခြင်း၊ အခြားနိုင်ငံများ၏အတွေ့အကြုံများကိုလေ့လာခြင်း၊ ကျွမ်းကျင်သူများနှင့် တိုင်ပင်ဆွေးနွေးခြင်းတို့ကို စဉ်ဆက်မပြတ် ဆောင်ရွက်လျက်ရှိကြောင်း သိရသည်။

           သတင်းစဉ်