_0.png)
စီမံကိန်းနှင့်ဘဏ္ဍာရေးဝန်ကြီးဌာန
ပြည်တွင်းအခွန်များဦးစီးဌာန
နိုင်ငံတော်၏ဘဏ္ဍာရေးနှစ်နှင့်အညီ သမဝါယမနှင့် ပုဂ္ဂလိကကဏ္ဍမှ အခွန်ထမ်းများ လိုက်နာဆောင်ရွက်ရန် အသိပေးနှိုးဆော်ချက်
၁။ နိုင်ငံတော်၏ ဘဏ္ဍာရေးနှစ်အား ၂၀၁၈ - ၂၀၁၉ ဘဏ္ဍာရေးနှစ်မှစတင်၍ အောက်တိုဘာ လ ၁ ရက်နေ့မှ စက်တင်ဘာလ ၃၀ ရက်နေ့ထိ ပြင်ဆင်ပြောင်းလဲ သတ်မှတ်ခဲ့သော်လည်း အခွန်စီမံခန့်ခွဲမှုများ ဆောင်ရွက်ရာတွင် နိုင်ငံပိုင်စီးပွားရေးလုပ်ငန်းများကိုသာ နိုင်ငံတော်၏ ဘဏ္ဍာရေးနှစ်နှင့်အညီ ပြောင်းလဲဆောင်ရွက်ခဲ့ပြီး သမဝါယမကဏ္ဍနှင့် ပုဂ္ဂလိကကဏ္ဍလုပ်ငန်းများကိုမူ ယခင်ဘဏ္ဍာရေးနှစ်အတိုင်းသာ ဆက်လက်ဆောင်ရွက်ခဲ့ပါသည်။
၂။ သို့ရာတွင် ၂၀၁၈ - ၂၀၁၉ ခုနှစ်၊ ပြည်ထောင်စု၏အခွန်အကောက်ဥပဒေပုဒ်မ ၄၁ အရ ၂၀၁၉ ခုနှစ်၊ အောက်တိုဘာလ ၁ ရက်နေ့မှစ၍ နိုင်ငံပိုင်စီးပွားရေးလုပ်ငန်းများအပါအဝင် အခွန်ထမ်းအားလုံး နိုင်ငံတော်၏ ဘဏ္ဍာရေးနှစ်နှင့်အညီ အခွန်စီမံခန့်ခွဲမှုလုပ်ငန်းများ လိုက်ပါ ဆောင်ရွက်ရမည် ဖြစ်သည့်အတွက် သမဝါယမနှင့် ပုဂ္ဂလိကကဏ္ဍမှ အခွန်ထမ်းများအနေဖြင့် အောက်ပါအတိုင်း လိုက်နာဆောင်ရွက်ရန် အသိပေးနှိုးဆော်အပ်ပါသည် -
(က) ၁ - ၄ - ၂၀၁၈ ရက်နေ့မှ ၃၁ - ၃ - ၂၀၁၉ ရက်နေ့ အထိ ၁၂ လတာ ဝင်ငွေ ရရှိသည့် ကာလသည် ၂၀၁၈ - ၂၀၁၉ ဝင်ငွေနှစ် (သို့မဟုတ်) ရောင်းရငွေ (သို့မဟုတ်) ဝန်ဆောင်မှုရငွေ ရရှိသောနှစ် ဖြစ်ပြီး ၂၀၁၈ ခုနှစ်၊ ပြည်ထောင်စု၏အခွန်အကောက်ဥပဒေပါ ပြဋ္ဌာန်းချက်များနှင့်အညီ လိုက်နာဆောင်ရွက်ရမည် ဖြစ်ပါသည်။ အဆိုပါကာလအတွက် ဝင်ငွေကြေညာလွှာကို ၂၀၁၉ ခုနှစ်၊ ဇူလိုင်လ ၁ ရက်နေ့ နောက်ဆုံးထားတင်သွင်းရမည် ဖြစ်ပါသည်။
(ခ) ၁ - ၄ - ၂၀၁၉ ရက်နေ့ မှ ၃၀ - ၉ - ၂၀၁၉ ရက်နေ့ အထိ ၆ လတာ ဝင်ငွေရရှိသည့် ကာလသည် ၂၀၁၉ ဝင်ငွေနှစ် (သို့မဟုတ်) ရောင်းရငွေ (သို့မဟုတ်) ဝန်ဆောင်မှုရငွေ ရရှိသောနှစ် ဖြစ်ပြီး ၂၀၁၈ - ၂၀၁၉ ခုနှစ်၊ ပြည်ထောင်စု၏အခွန်အကောက်ဥပဒေပါ ပြဋ္ဌာန်းချက်များနှင့်အညီ လိုက်နာဆောင်ရွက်ရမည် ဖြစ်ပါသည်။ အဆိုပါ ကာလအတွက် ဝင်ငွေကြေညာလွှာကို ၂၀၂၀ ပြည့်နှစ်၊ ဇန်နဝါရီလ ၂ ရက် နေ့ နောက်ဆုံးထားတင်သွင်းရမည် ဖြစ်ပါသည်။
ပြည်တွင်းအခွန်များဦးစီးဌာန