ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ရေအရင်းအမြစ်နှင့်မြစ်ချောင်းများဖွံ့ဖြိုးတိုးတက်ရေးဦးစီးဌာနမှ အကောင်အထည်ဖော်   ဆောင်ရွက်မည့် တွံတေးတူးမြောင်းပြုပြင်ထိန်း သိမ်းခြင်းနှင့် ရေကြီးရေလျှံမှုကာကွယ်ရေးလုပ်ငန်းများ ဆောင်ရွက်နိုင်ရန်ရည်ရွယ်၍ ကိုရီးယားသမ္မတ နိုင်ငံမှ ပေးအပ်သည့်  Economic Development Cooperation Fund (EDCF) ချေးငွေ အမေရိကန် ဒေါ်လာ ၆၁.၃ သန်း အားရယူရန်အတွက် လက်မှတ်ရေးထိုးပွဲအခမ်းအနားကို နေပြည်တော်ရှိ ရုံးအမှတ် (၃၄)၊ ငွေတိုက်ဦးစီးဌာန ၌  ၂၀၁၇ ခုနှစ်၊  စက်တင်ဘာလ (၁၁) ရက်နေ့၊ နံနက် (၁၀:၀၀) အချိန်တွင် ကျင်းပပြုလုပ်ခဲ့ပါသည်။

အဆိုပါချေးငွေ၏ အတိုးနှုန်းမှာ ၀.၀၁% ဖြစ်ပြီး ဝန်ဆောင်ခ အဖြစ် ချေးငွေထုတ်ယူသည့် ပမာဏ၏ ၀.၁%၊ ဆိုင်းငံ့ကာလ (၁၅) နှစ်နှင့် ပြန်ဆပ်ကာလ (၂၅) နှစ်၊ စုစုပေါင်းချေးငွေ သက်တမ်း (၄၀) နှစ် ဖြစ်ပါသည်။ ယင်းချေးငွေရယူရန် ချေးငွေစာချုပ်ကို  ရုံးအမှတ် (၃၄)၊ ငွေတိုက်ဦးစီးဌာန တွင် Export-Import Bank of Korea ကိုယ်စား Mr. Lee Tae-Yong, Chief Representative of the Yangon Representative Office နှင့် မြန်မာနိုင်ငံအစိုးရကိုယ်စား စီမံကိန်းနှင့်ဘဏ္ဍာရေး ဝန်ကြီးဌာန၊ ငွေတိုက်ဦးစီးဌာန ညွှန်ကြားရေးမှူးချုပ်  ဒေါ်နွဲ့နွဲ့ဝင်းတို့က လက်မှတ်ရေးထိုးခဲ့ကြပါသည်။

အဆိုပါအခမ်းအနားသို့ မြန်မာနိုင်ငံအစိုးရကိုယ်စား စီမံကိန်းနှင့်ဘဏ္ဍာရေးဝန်ကြီးဌာနမှ တာဝန်ရှိပုဂ္ဂိုလ်များ၊ ရေအရင်းအမြစ်နှင့်မြစ်ချောင်း များဖွံ့ဖြိုးတိုးတက်ရေးဦးစီးဌာနမှ တာဝန်ရှိ ပုဂ္ဂိုလ်များ၊  Export-Import Bank of Korea ကိုယ်စား Mr. Lee Tae-Yong, Chief Representative of the Yangon Representative Office ဦးဆောင်သော တာဝန်ရှိပုဂ္ဂိုလ်များ တက်ရောက်ခဲ့ပါသည်။