နေပြည်တော်၊ ဖေဖော်ဝါရီ ၁၃

ဗီယက်နမ်နိုင်ငံ၊ ဒါနန်းမြို့၌ ဖွင့်လှစ်ပို့ချခဲ့သည့် Intensive English Proficiency Course သင်တန်းမှ လေ့လာခဲ့သည်များအား ဌာနတွင်း ပြန်လည်မျှဝေသည့်သင်တန်းဖွင့်ပွဲအခမ်းအနားကို ၂၀၂၄ ခုနှစ်၊ ဖေဖော်ဝါရီလ ၁၃ ရက်နေ့၊ နံနက် (၁၀:၀၀) အချိန်တွင် ရုံးအမှတ် (၃၄)၊ အပေါ်ထပ်ခန်းမ၌ ကျင်းပပြုလုပ်ခဲ့ပါသည်။

အခမ်းအနားတွင် ငွေတိုက်ဦးစီးဌာန၊ ညွှန်ကြားရေးမှူးချုပ်က ဝန်ထမ်းများ၏ လုပ်ငန်းစွမ်းဆောင်ရည်မြှင့်တင်ရေးဆောင်ရွက်ရာတွင် ဘာသာရပ်ဆိုင်ရာ လုပ်ငန်းကျွမ်းကျင်မှုသင်တန်းများအပြင် အင်္ဂလိပ်စာဘာသာရပ်ကို ကျွမ်းကျင်ပိုင်နိုင်စွာ ရေးသားပြောဆိုနိုင်ရေးသည်လည်း လုပ်ငန်းအတွက် အရေးပါပြီး မဖြစ်မနေလိုအပ်ပါကြောင်း၊ ဌာနရှိ ဝန်ထမ်းများအား အင်္ဂလိပ်စာ စွမ်းရည်မြှင့်တင်ရေးအတွက် ယခင်က Public Finance Management (PFM) Project အောက် တွင် British Council မှ ဖွင့်လှစ်သည့် အင်္ဂလိပ်စာသင်တန်းများသို့ တက်ရောက်စေခဲ့ပါကြောင်း၊ ၂၀၂၂ ခုနှစ်၊ ဇွန်လတွင် မန္တလေးနိုင်ငံခြားဘာသာတက္ကသိုလ်မှ သင်တန်းနည်းပြဆရာမ (၂) ဦးဖြင့် ဝန်ထမ်းများအတွက် ဌာနတွင်း အင်္ဂလိပ်စာသင်တန်းကို ဖွင့်လှစ်ပေးခဲ့ပါကြောင်း၊ ယခုအခါ Knowledge Sharing အနေဖြင့် ဗီယက်နမ်နိုင်ငံ၊ ဒါနန်းမြို့၌ ဖွင့်လှစ်ပို့ချခဲ့သည့် “အာဆီယံနိုင်ငံများအတွက် လုပ်ငန်းခွင်ပြောဆိုဆက်ဆံရေးစွမ်းရည်မြှင့်တင်မှုဆိုင်ရာ ဘရူနိုင်းဒါရုဆလမ်ပညာသင်ဆု (Brunei Darussalam Scholarship on Enhancing Professional Communication Skill for ASEAN) Programme 2: Intensive English Proficiency Course သင်တန်း”သို့ ၂၀၂၂ ခုနှစ်နှင့် ၂၀၂၃ ခုနှစ်တို့တွင် တက်ရောက်ခဲ့ကြသည့် အရာထမ်း(၄)ဦးက ၎င်းတို့လေ့လာသင်ယူခဲ့ရသည်များကို ပြန်လည်မျှဝေသည့်သင်တန်းဖြစ်ပါကြောင်း၊ ပုံမှန်အားဖြင့် ပြည်ပသင်တန်းတက်ရောက်ခဲ့သည့် အတွေ့အကြုံများအား ဌာနတွင်းမျှဝေမှုများပြုလုပ်ပါကြောင်း၊ (၂)နာရီ (၃)နာရီခန့်သာ ပြုလုပ်နိုင်ပါကြောင်း အင်္ဂလိပ်စာဘာသာရပ်ဖြစ်သဖြင့် ဝန်ထမ်းများလေ့လာနိုင်ရန်အတွက် သင်တန်းပုံစံမျိုး စုစုပေါင်း (၁၄)နာရီဖြင့် (၈) ရက်ကြာ ပို့ချသွားမည်ဖြစ်ပါကြောင်း၊ ဌာနတွင်း အင်္ဂလိပ်စာသင်တန်းတက်ရောက်ရန် ကျန်ရှိနေသည့် ဦးစီးအရာရှိ (၁) ဦး နှင့် အမှုထမ်း (၂၉) ဦးတို့အား ပို့ချသွားမည်ဖြစ်ပါကြောင်း၊ ယခုသင်တန်းသည် ဝန်ထမ်းများအတွက် Capacity Building အပြင် ရည်ရွယ်ချက်ကောင်းများစွာဖြင့် ပြုလုပ်ခြင်းဖြစ်သဖြင့် သင်တန်းသား၊ သင်တန်းသူများအနေဖြင့်လည်း ရရှိသည့်အချိန်တိုအတွင်း ပို့ချမှုများကို လေ့လာမှတ်သားရုံသာမက မိမိလုပ်ငန်းအတွက် အကျိုးရှိအောင် အပြန်အလှန်ဆွေးနွေးခြင်း၊ သင်တန်းတွင် မိမိတတ်ကျွမ်းနားလည်သည်များကို အချင်းချင်းပြန်လည်မျှဝေခြင်းဖြင့် အကျိုးရှိစွာ တက်ရောက်စေလိုပါကြောင်း အဖွင့်အမှာစကားပြောကြားခဲ့ပါ သည်။

အဆိုပါ အခမ်းအနားသို့ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ သင်တန်းဆရာမများနှင့် သင်တန်းသား၊ သင်တန်းသူ (၃၀)ဦးတို့ တက်ရောက်ခဲ့ပါသည်။