အစိုးရငွေတိုက်စာချုပ်စျေးကွက် ဖွံ့ဖြိုးတိုးတက်ရေးအတွက် Myanmar Government Bond Market Development ခေါင်းစဉ်ဖြင့် အလုပ်ရုံဆွေးနွေးပွဲကို ၂၀၁၈ ခုနှစ်၊ သြဂုတ်လ (၁၁) ရက်နေ့တွင် ရန်ကုန်မြို့  Park Royal Hotel ၌  စီမံကိန်းနှင့်ဘဏ္ဍာရေး ဝန်ကြီးဌာနနှင့် အာရှဖွံ့ဖြိုးရေးဘဏ် (ADB) တို့ ပူးပေါင်း၍ ကျင်းပခဲ့ပါသည်။ ဆွေးနွေးပွဲ သို့ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်၊ မြန်မာနိုင်ငံတော်ဗဟို ဘဏ်၊ နိုင်ငံပိုင်နှင့်ပုဂ္ဂလိကပိုင်ဘဏ်များ၊ နိုင်ငံခြားဘဏ်ခွဲများ၊ ငွေချေးသက်သေခံလက်မှတ် ကုမ္ပဏီများနှင့် အာမခံကုမ္ပဏီများမှ တာဝန်ရှိသူ စုစုပေါင်း (၁၁၀) ဦး တက်ရောက်ခဲ့ပါ သည်။ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက အဖွင့်အမှာ စကားပြောကြားခဲ့ပြီး Myanmar Government Bond Market Development နှင့် စပ်လျဉ်း၍ ဆောင်ရွက်မှုအခြေအနေများကို ငွေတိုက်ဦးစီးဌာနမှ ညွှန်ကြားရေးမှူး ဒေါ်သင်းသင်းစုက ရှင်းလင်းတင်ပြပါသည်။ ဆက်လက်၍  Thai Bond Market Association Experience ကို Thai Bond Market Association (TBMA) မှ President Mr. Tada Phutthitada ကလည်းကောင်း၊ Vietnam Bond Market Association Experience ကို Vietnam Bond Market Association (VBMA) မှ General Secretary Mr. Do Ngoc Quynh ကလည်းကောင်း ဆောင်ရွက်မှုအတွေ့အကြုံ များအား ရှင်းလင်းတင်ပြကြပါသည်။

          ထို့နောက် Panel Discussion အဖြစ် ADB Consultant to Treasury Department Mr. Ian Storkey က ဦးဆောင်၍  Mr. Tada Phutthitada, President of  TBMA, Mr. Do Ngoc Quynh, General Secretary, VBMA, Mr. Newin Sinsiri, Country Director, ADB Myanmar Resident Mission နှင့် Mr. Yasuhisa Ojima, IMF Resident Representative in Myanmar တို့က ငွေချေးစာချုပ် စျေးကွက်ဖွံ့ဖြိုး တိုးတက်ရေးဆိုင်ရာများကို ဆွေးနွေးခဲ့ကြပြီး တက်ရောက်လာသူများ၏ မေးမြန်းချက်များ အပေါ် ပြန်လည်ရှင်းလင်းဆွေးနွေးခဲ့ကြပါသည်။  မြန်မာနိုင်ငံတွင် ယခုအခါ အစိုးရငွေတိုက်စာချုပ်နှင့် ငွေတိုက်လက်မှတ်စျေးကွက်များမှာ ဖွံ့ဖြိုးလာလျက်ရှိပြီး စီမံကိန်းနှင့်ဘဏ္ဍာရေး ဝန်ကြီးဌာနက တာဝန်ယူ၍ အစိုးရငွေချေးသက်သေခံလက်မှတ်များအား စျေးပြိုင်စနစ်ဖြင့် ရောင်းချခြင်း ကို ၂၀၁၅ ခုနှစ်မှ စတင်ခဲ့ရာ  စျေးကွက်က သတ်မှတ်သည့်အတိုးနှုန်း (Market Interest Rate)  ရရှိလျက်ရှိသဖြင့် အစိုးရဘဏ်၊ ပုဂ္ဂလိကဘဏ်များနှင့် နိုင်ငံခြား ဘဏ်ခွဲများက အပြိုင်အဆိုင်ရင်းနှီးမြှုပ်နှံလျက်ရှိပါသည်။ သို့သော်လည်း မြန်မာနိုင်ငံတွင် ပြည်တွင်းငွေချေးစာချုပ်စျေးကွက် (Bond Market) မှာ Primary Market အဆင့်သာ ရှိသေးပြီး Secondary Market အဆင့် ဖွံ့ဖြိုးလာစေရေး ဆက်လက်ဆောင်ရွက်ရန် လိုအပ်ကြောင်း သိရှိရပါသည်။