မြန်မာနိုင်ငံသည်ကမ္ဘာ့ဘဏ်နှင့်ပူးပေါင်း၍အစိုးရအသုံးစရိတ်များ၊သုံးစွဲမှုပုံစံများကိုလေ့လာဆန်းစစ်လျက်ရှိရာတတိယအကြိမ်အစိုးရအသုံးစရိတ်ပြန်လည်သုံးသပ်မှုဆိုင်ရာအစည်းအဝေးကို၂၀၁၉ခုနှစ်၊မေလ၁၆ရက်နေ့၊နေ့လည်(၁:၀၀) နာရီတွင်စီမံကိန်းနှင့်ဘဏ္ဍာရေးဝန်ကြီးဌာန၊ရုံးအမှတ် (၂၆) ၌ကျင်းပပြုလုပ်ခဲ့ပါသည်။အဆိုပါအစည်းအဝေးသို့စီမံကိန်းနှင့်ဘဏ္ဍာရေးဝန်ကြီးဌာနဒုတိယဝန်ကြီးများဖြစ်ကြသောဦးမောင်မောင်ဝင်းနှင့်ဦးဆက်အောင်၊ရန်ကုန်တိုင်းဒေသကြီးအစိုးရအဖွဲ့နှင့်မန္တလေးတိုင်းဒေသကြီးအစိုးရအဖွဲ့မှစီမံကိန်းနှင့်ဘဏ္ဍာရေးဝန်ကြီးများ၊ရန်ကုန်မြို့တော်နှင့်မန္တလေးမြို့တော်စည်ပင်သာယာရေးကော်မတီများမှတာဝန်ရှိသူများ၊ကမ္ဘာ့ဘဏ်၊Renaissance Instituteနှင့်အစိုးရအသုံးစရိတ်ပြန်လည်သုံးသပ်မှုအတွက်ကြီးကြပ်မှုကော်မတီအဖွဲ့ဝင်များတက်ရောက်ခဲ့ပါသည်။

အစည်းအဝေးတွင်ကမ္ဘာ့ဘဏ်မစ်ရှင်အဖွဲ့မှတတိယအကြိမ်အစိုးရအသုံးစရိတ်ပြန်လည်သုံးသပ်မှုဆိုင်ရာတွေ့ရှိချက်များအားတင်ပြရာတွင် MSDP ၏မဏ္ဍိုင် (၁)၊ပန်းတိုင် (၁) ၊ (၂) တို့နှင့်ချိတ်ဆက်၍ဆောင်ရွက်လျက်ရှိပါကြောင်း၊ရန်ကုန်၊မန္တလေးနှင့်ရှမ်းပြည်နယ်တို့၏ဖွံ့ဖြိုးတိုးတက်မှုအခြေအနေများ၊ပြည်ထောင်စုမှတိုင်းဒေသကြီး/ ပြည်နယ်အစိုးရသို့ဘဏ္ဍာငွေလွှဲပြောင်းပေးမှုများနှင့်၄င်းတို့၏ကိုယ်ပိုင်ဘဏ္ဍာငွေကောက်ခံရရှိမှုအခြေအနေများ၊အသုံးစရိတ်အခြေအနေများ၊ပြည်ထောင်စု၏အသုံးစရိတ်အခြေအနေများနှင့်တိုင်းဒေသကြီး / ပြည်နယ်များသို့လိုငွေဖြည့်ဆည်းခြင်းဆိုင်ရာကိစ္စရပ်များ၊လူ့စွမ်းအားအရင်းအမြစ်စီမံခန့်ခွဲမှုဆိုင်ရာကိစ္စရပ်များ၊ရင်ဆိုင်နေရသည့်အခက်အခဲများ၊ရှေ့လုပ်ငန်းစဉ်များနှင့်စပ်လျဉ်း၍ရှင်းလင်းတင်ပြခဲ့ပါသည်။