စတုတ္ထအကြိမ်မြောက် Electronic Budget Submission Workshop ဖွင့်ပွဲအခမ်းအနား ကို ၂၀၁၈ ခုနှစ်၊ ဩဂုတ်လ ၂၇ ရက်နေ့၊ နံနက် (၁၀:၀၀) နာရီတွင် ရုံးအမှတ် (၃၄)၊ အစည်းအဝေး ခန်းမ၌ ကျင်းပခဲ့ပါသည်။ အဆိုပါဖွင့်ပွဲအခမ်းအနားတွင် ရသုံးမှန်းခြေငွေစာရင်းဦးစီးဌာန၏ ညွှန်ကြားရေးမှူးချုပ်၊ ဒေါ်နွဲ့နွဲ့ဝင်းမှ အဖွင့်အမှာစကားပြောကြားခဲ့ပြီး ကမ္ဘာ့ဘဏ်မှ Senior Economist ဖြစ်သူ Mr.Massimo နှင့် အကြံပေး Ms.Khin Thet Swe တို့မှ သင်တန်းတွင် ပို့ချ မည့်အကြောင်းအရာများ၊ သင်တန်းကျင်းပရသည့် ရည်ရွယ်ချက်များနှင့် ပတ်သက်၍ ရှင်းလင်း ပြောကြားခဲ့ပါသည်။ ထို့နောက် ရသုံးမှန်းခြေငွေစာရင်းဦးစီးဌာန၊ ညွှန်ကြားရေးမှူးချုပ်၊ ဒုတိယ ညွှန်ကြားရေးမှူးချုပ်နှင့် တာဝန်ရှိပုဂ္ဂိုလ်များ၊ ကမ္ဘာ့ဘဏ်မှ Trainers များ၊ သင်တန်းတက်ရောက် လာကြသော ဌာနဆိုင်ရာအသီးသီးမှ တာဝန်ရှိပုဂ္ဂိုလ်များ စုပေါင်း၍ မှတ်တမ်းတင်ဓာတ်ပုံရိုက်ကူး ခဲ့ကြပါသည်။

            Workshop ကျင်းပရခြင်း၏ ရည်ရွယ်ချက်မှာ ဗဟိုအဖွဲ့အစည်းများ၊ ဝန်ကြီးဌာနများ၊ ဦးစီးဌာနများ၊ နိုင်ငံတော်ပိုင်အဖွဲ့အစည်းများအားလုံးအနေဖြင့် ၂၀၁၉-၂၀၂၀ ခု၊ ဘဏ္ဍာရေးနှစ်တွင် အရအသုံး ခန့်မှန်းခြေငွေစာရင်းများအား Electronic Budget Template Form ကို အသုံးပြု၍ ရေးဆွဲတင်ပြနိုင်စေရန်နှင့်  ရသုံးမှန်းခြေငွေစာရင်းဦးစီးဌာနမှ ဝန်ထမ်းများအနေဖြင့်လည်း အဆိုပါ
Electronic Form များအား စုစည်းလက်ခံစိစစ်မှုများကို အဆင်ပြေချောမွေ့စွာ ပြုလုပ်နိုင်စေရန် ဖြစ်ပါသည်။ အဆိုပါ Workshop ကို ဌာနအဖွဲ့အစည်း စုစုပေါင်း (၁၈၃) ဌာနအား ဖိတ်ကြားပြီး အုပ်စုများခွဲ၍ ၂၇-၈-၂၀၁၈ ရက်နေ့မှ ၃၁-၈-၂၀၁၈ ရက်နေ့အထိ (၅) ရက်ကြာ ကျင်းပမည်ဖြစ် ပါသည်။