ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း စီမံခန့်ခွဲမှုအဖွဲ့၏ တတိယအကြိမ်မြောက် (၃/၂၀၂၀) အစည်းအဝေး ကျင်းပပြုလုပ်ခြင်း

(၁၈-၁၂-၂၀၂၀)

ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း စီမံခန့်ခွဲမှုအဖွဲ့၏ တတိယအကြိမ်မြောက် (၃/၂၀၂၀)အစည်းအဝေးကို ရသုံးမှန်းခြေငွေစာရင်းဦးစီးဌာန၊ ပြည်သူ့ဘဏ္ဍာရေးစီမံခန့်ခွဲမှု သင်တန်း ကျောင်းအစည်းအဝေးခန်းမ၌ ၁၈-၁၂-၂၀၂၀ရက်နေ့၊ နေ့လယ်၂:၀၀ နာရီတွင် ကျင်းပပြုလုပ်ခဲ့ပါသည်။ အဆိုပါ အစည်းအဝေးအား  ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်းစီမံခန့်ခွဲမှုအဖွဲ့ ဥက္ကဋ္ဌ၊ စီမံကိန်း၊ဘဏ္ဍာရေးနှင့်စက်မှုဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းဦးဆောင်၍ အဖွဲ့ဝင်များ ဖြစ်သော စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနနှင့် ပြည်ထောင်စုစာရင်းစစ်ချုပ်ရုံးတို့မှ အမြဲတမ်း အတွင်းဝန်များ၊ ပြည်တွင်းအခွန်များဦးစီးဌာန၊ ငွေတိုက်ဦးစီးဌာနတို့မှ ညွှန်ကြားရေးမှူးချုပ်များ၊ စီမံကိန်းရေးဆွဲရေးဦးစီးဌာန၊ ရသုံးမှန်းခြေငွေစာရင်းဦးစီးဌာန၊ ငွေတိုက်ဦးစီးဌာနတို့မှ ဒုတိယ ညွှန်ကြားရေးမှူး ချုပ်များနှင့် ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်းရုံးအဖွဲ့တို့ တက်ရောက်ခဲ့ ကြပါသည်။

အဆိုပါအစည်းအဝေး၌ ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း စီမံခန့်ခွဲမှုအဖွဲ့၏ တွဲဖက်အတွင်းရေးမှူး၊ ရသုံးမှန်းခြေငွေစာရင်းဦးစီးဌာန၊ ဒုတိယညွှန်ကြားရေးမှူးချုပ်မှ COVID 19 ကာလအတွင်းတွင် သင်တန်းများကို Online Platform ဖြင့် ဆက်လက်ပို့ချခဲ့ရာ သင်တန်းကျောင်း စတင်ဖွင့်လှစ်ခဲ့သည့် ၂၄-၂-၂၀၂၀ရက်နေ့ မှ ၂၀၂၀ ပြည့်နှစ် ဒီဇင်ဘာလအထိ အကောင်အထည်ဖော် ဆောင်ရွက်ပြီးစီးခဲ့သည့် ပြည်သူ့ဘဏ္ဍာရေးစီမံခန့်ခွဲမှု အခြေခံသင်တန်းအမှတ်စဉ်(၁)နှင့် ပြည်သူ့ ဘဏ္ဍာရေးစီမံခန့်ခွဲမှုဆိုင်ရာ ကာလတို အထူးသင်တန်း (၂၆) ခု မှနေ၍ ပြည်ထောင်စုနှင့် တိုင်းဒေသကြီး/ ပြည်နယ် ဌာနအဖွဲ့အစည်းများမှ အရာထမ်း(၉၁၀)ဦးအား သင်တန်းများ ပို့ချနိုင်ခဲ့မှုနှင့် သင်တန်းများ ဆောင်ရွက်နိုင်ရေးအတွက် ပြည်တွင်း၊ ပြည်ပ အဖွဲ့ အစည်းများဖြစ်သည့် MDI၊ World Bank၊ IMF၊ PRI (Japan)၊ NORAD၊ TAF စသည့် အဖွဲ့ အစည်းများနှင့် ပူးပေါင်းဆောင်ရွက်ခဲ့မှုများ၊ ၂၀၂၁ ခုနှစ်တွင် ဆက်လက်ဆောင်ရွက်မည့် သင်တန်းအစီအစဉ်များ စီစဉ်ထားရှိမှုများနှင့် ပတ်သက်၍ ရှင်းလင်း တင်ပြခဲ့ပါသည်။

 အတွင်းရေးမှူး၏ ရှင်းလင်းတင်ပြချက်များအပေါ် ပြည်သူ့ဘဏ္ဍာရေးစီမံခန့်ခွဲမှုသင်တန်း ကျောင်းစီမံခန့်ခွဲမှုအဖွဲ့ ဥက္ကဋ္ဌမှ Online Learning Platform ပိုမို စနစ်တကျကောင်းမွန်စေရေး၊ သင်တန်းများ၊ Seminar များ ၊ Knowledge Exchange အစီအစဉ်များမှ တစ်ဆင့် အစိုးရမှ ရေးဆွဲ ချမှတ်လိုက်သော မူဝါဒများနှင့် Action Plan များကို အကောင်အထည်ဖော်ရာတွင် ထိရောက်စွာ ပံ့ပိုးနိုင်ရေး၊ ဘတ်ဂျက်အကောင်အထည်ဖော်မှု အားကောင်းရန်နှင့် စီမံကိန်း အကောင်အထည်ဖော်မှု အားကောင်းစေရန်အတွက် လက်တွေ့ဆောင်ရွက်ရာတွင် သိရှိနားလည်ရန် လိုအပ်သည့် အမိန့်၊ စည်းမျဉ်း၊ ညွှန်ကြားချက်များ၊ Case နမူနာများနှင့် ပေါင်းစပ်သင်ကြား ပို့ချရေးတို့အား လမ်းညွှန် မှာကြားခဲ့၍ အစည်းအဝေးတက်ရောက်လာကြသည့် ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်း စီမံခန့်ခွဲမှုအဖွဲ့ ဒုတိယဥက္ကဋ္ဌနှင့် အဖွဲ့ဝင်များမှ ဝိုင်းဝန်းအကြံပြု ဆွေးနွေးခဲ့ကြပြီး အစည်းအဝေးအား ညနေ (၄:၀၀) နာရီတွင် ရုပ်သိမ်းခဲ့ပါသည်။

(ပြည်သူ့ဘဏ္ဍာရေးစီမံခန့်ခွဲမှုသင်တန်းကျောင်းရုံးအဖွဲ့)