မြန်မာနိုင်ငံ၏ ရေရှည်တည်တံ့ခိုင်မြဲပြီးဟန်ချက်ညီသော ဖွံ့ဖြိုးတိုးတက်ရေးစီမံကိန်း (Myanmar Sustainable Development Plan – MSDP) ၏ မဏ္ဍိုင် (၁)၊ ပန်းတိုင် (၂)၊ မဟာဗျူဟာ (၅) ရပ်၏ Action Plan များကို အကောင်အထည်ဖော်ဆောင်ရွက်မည့် မေခရိုစီးပွားရေး စီမံခန့်ခွဲမှု ကဏ္ဍဆိုင်ရာ ပေါင်းစပ်ညှိနှိုင်းရေးအဖွဲ့ (Macroeconomic Management Sector Coordination Group – MMSCG) ၏ လုပ်ငန်းဆောင်ရွက်တိုးတက်မှုအခြေအနေများနှင့် စပ်လျဉ်း၍ သတ္တမအကြိမ် မြောက်အစည်းအဝေးအား ၂၀၂၀ ပြည့်နှစ်၊ သြဂုတ်လ ၁၁ ရက်နေ့တွင် Virtual Platform ဖြင့် ကျင်းပ ခဲ့ပါသည်။ အဆိုပါအစည်းအဝေးကို မေခရိုစီးပွားရေးစီမံခန့်ခွဲမှုကဏ္ဍဆိုင်ရာ ပေါင်းစပ်ညှိနှိုင်းရေး အဖွဲ့၏ ဒုတိယဥက္ကဋ္ဌများဖြစ်ကြသည့် စီမံကိန်း၊ဘဏ္ဍာရေးနှင့်စက်မှုဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းနှင့် ဒုတိယဝန်ကြီး ဦးဆက်အောင်တို့ ဦးဆောင်ခဲ့ကြပြီး MMSCG အောက်ရှိ လုပ်ငန်းအဖွဲ့ (၅) ဖွဲ့မှ အဖွဲ့ ခေါင်းဆောင်များ၊ ဖိတ်ကြားထားသည့် တာဝန်ရှိပုဂ္ဂိုလ်များနှင့် ဖွံ့ဖြိုးမှု မိတ်ဖက်အဖွဲ့အစည်းများမှ ကိုယ်စားလှယ်များ တက်ရောက်ခဲ့ကြပါသည်။

အစည်းအဝေးတွင် မေခရိုစီးပွားရေး စီမံခန့်ခွဲမှုအခြေအနေများ၊ COVID-19 ကပ်ရောဂါ အတွက် မူဝါဒတုံ့ပြန်ဆောင်ရွက်ချက်များနှင့် မြန်မာနိုင်ငံ၏ ခေတ်မီဖွံ့ဖြိုးတိုးတက်သော ပြည်သူ့ ဘဏ္ဍာရေးစီမံခန့်ခွဲမှု စီမံကိန်း၏  Phase II တွင် ဆောင်ရွက်ရန်လျာထားသည့် လုပ်ငန်းများနှင့် စပ်လျဉ်း၍ ဒုတိယဝန်ကြီး ဦးမောင်မောင်ဝင်းက ရှင်းလင်းပြောကြားခဲ့ပြီး လုပ်ငန်းအဖွဲ့ (၅) ဖွဲ့ ဖြစ်သည့် မြန်မာနိုင်ငံတော်ဗဟိုဘဏ်နှင့် စီမံကိန်း၊ ဘဏ္ဍာရေးနှင့်စက်မှုဝန်ကြီးဌာနတို့ ပေါင်းစပ် ညှိနှိုင်းရေးလုပ်ငန်းအဖွဲ့၊ နှစ်လတ်ဘဏ္ဍာရေးမူဘောင်အဖွဲ့၊ ရငွေဆိုင်ရာဆန်းစစ်ရေးအဖွဲ့၊ အသုံး စရိတ်ဆိုင်ရာဆန်းစစ်ရေး အဖွဲ့နှင့် ဘဏ္ဍာငွေဖြည့်ဆည်းရေးနှင့် ဆုံးရှုံးနိုင်ခြေစီမံခန့်ခွဲရေးအဖွဲ့တို့၏ အဖွဲ့ခေါင်းဆောင်များမှ လုပ်ငန်းအဖွဲ့အလိုက် လက်ရှိဆောင်ရွက်ထားရှိမှုအခြေအနေများ၊ COVID-19 ၏ သက်ရောက်မှုများအပေါ် တုံ့ပြန်ဆောင်ရွက်မှုများ၊ ကြုံတွေ့ရသည့် စိန်ခေါ်မှုများနှင့် ရှေ့ဆက် လက်ဆောင်ရွက်မည့် ကိစ္စရပ်များကို ရှင်းလင်းတင်ပြခဲ့ရာ ဖွံ့ဖြိုးမှုမိတ်ဖက် အဖွဲ့အစည်းများမှ ကိုယ်စားလှယ်များက ဆွေးနွေးမေးမြန်းခြင်း၊ လုပ်ငန်းအဖွဲ့များ၏ လုပ်ငန်းဆောင်ရွက်မှုများနှင့် ပတ်သက်၍ အကြုံပြုဆွေးနွေးခြင်းများ ပြုလုပ်ခဲ့ကြပါသည်။ ထို့နောက် မေခရိုစီးပွားရေးစီမံခန့်ခွဲမှု ကဏ္ဍဆိုင်ရာ ပေါင်းစပ်ညှိနှိုင်းရေး အဖွဲ့ ဒုတိယဥက္ကဋ္ဌ၊ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ ဒုတိယဝန်ကြီး၊ ဦးမောင်မောင်ဝင်းက လိုအပ်သည်များ ဖြည့်စွက်ဆွေးနွေးခဲ့ပြီး ရှေ့ဆက်လက် ဆောင်ရွက်မည့်လုပ်ငန်းစဉ်များအပေါ် အားလုံးပူးပေါင်းဆောင်ရွက်ကြရန် တိုက်တွန်းပြောကြား ခဲ့ပါသည်။