အေမက်အရှေ့အနောက်စီးပွားရေးစင်္ကြံ ဖွံ့ဖြိုးတိုးတက်ရေး လုပ်ငန်းအဖွဲ့၏ (၁/၂၀၁၈) ကြိမ် မြောက် အစည်းအဝေးကို ၂၀၁၈ ခုနှစ် ဧပြီလ ၂၆ ရက်နေ့တွင် နေပြည်တော်ရှိ M Gallery ဟိုတယ်၌ ကျင်းပပြုလုပ်ပါသည်။

အစည်းအဝေးကျင်းပရခြင်း၏ ရည်ရွယ်ချက်မှာ မဲခေါင်ဒေသဖွံ့ဖြိုးတိုးတက်ရေး ပူးပေါင်း ဆောင်ရွက်မှုများနှင့် စပ်လျဉ်းသည့် ကိစ္စရပ်များ၊ မဲခေါင် စက်မှုဖွံ့ဖြိုး တိုးတက်ရေး မျှော်မှန်းချက် လုပ်ငန်းအစီအစဉ်ပါ မဏ္ဍိုင်များ၏ အကောင်အထည်ဖော်မှုနှင့် ဖြစ်ပေါ်တိုးတက်မှု အခြေအနေများ၊ မဲခေါင်ဒေသ စက်မှုကဏ္ဍဖွံ့ဖြိုး တိုးတက်စေရန် ဆောင်ရွက်လျက်ရှိသည့် ဂျပန်နိုင်ငံ၏ လုပ်ငန်း များကို တင်ပြ ဆွေးနွေးရန် ရည်ရွယ် ကျင်းပခြင်းဖြစ်ပါသည်။

အစည်းအဝေးတွင် ပူးတွဲသဘာပတိအဖြစ် စက်မှုဝန်ကြီးဌာန၊ စက်မှုပူးပေါင်းဆောင်ရွက်ရေး ဦးစီးဌာနမှ ဒုတိယညွှန်ကြားရေးမှူးချုပ် ဒေါ်တင်တင်ထူးနှင့် ဂျပန်နိုင်ငံ စီးပွားရေး၊ ကုန်သွယ်ရေး နှင့် စက်မှုဝန်ကြီးဌာနမှ ဒုတိယညွှန်ကြားရေးမှူးချုပ် Mr. Kunihiko Shinoda တို့မှ ဆောင်ရွက် ကြပြီး အစည်းအဝေးသို့ ကမ္ဘောဒီးယား၊ လာအို၊ မြန်မာ၊ ထိုင်း၊ ဗီယက်နမ်နှင့် ဂျပန်နိုင်ငံတို့မှ ဘာသာရပ်ဆိုင်ရာ ကိုယ်စားလှယ်များ၊ AMEICC၊ ADB၊ JETRO နှင့် Mekong Institute တို့မှ ကိုယ်စားလှယ်များစုစုပေါင်း (၅၂) ဦးတက်ရောက်ပါသည်။

အဆိုပါအစည်းအဝေးတွင် AMEICC၊ ADB၊ JETRO နှင့် Mekong Institute တို့မှ မဲခေါင်ဒေသ ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်လျက်ရှိသော လုပ်ငန်းများ၏ ဖြစ်ပေါ် တိုးတက်မှုအခြေအနေများ၊ ဆက်လက်ဆောင်ရွက်သွားမည့် လုပ်ငန်းများကို ရှင်းလင်းတင်ပြပြီး Mekong Industrial Development Vision အကောင်အထည်ဖော်မှု၏ ဖြစ်ပေါ်တိုးတက်မှု အခြေအနေများအပေါ် တက်ရောက်လာသည့် နိုင်ငံများမှ ဘာသာရပ်ဆိုင်ရာကိုယ်စားလှယ်များက အမြင်ချင်း ဖလှယ်ဆွေးနွေးကြပါသည်။ အေမက်အရှေ့အနောက်စီးပွားရေးစင်္ကြံ ဖွံ့ဖြိုးတိုးတက်ရေး လုပ်ငန်း အဖွဲ့၏ (၂/၂၀၁၈) ကြိမ်မြောက် အစည်းအဝေးကို ထိုင်းနိုင်ငံတွင် ၂၀၁၈ ခုနှစ် သြဂုတ်လ အစောပိုင်းတွင် ကျင်းပမည့် (၁၁) ကြိမ်မြောက် မဲခေါင်-ဂျပန် စက်မှုနှင့် အစိုးရဆွေးနွေးပွဲနှင့်အတူ ကျင်းပရန်ရည်ရွယ်ထားပြီး အဆိုပါ အစည်းအဝေးများမှ ရရှိလာသည့် ဆွေးနွေးချက်များကို (၁၀) ကြိမ်မြောက် မဲခေါင်-ဂျပန် စီးပွားရေးဝန်ကြီးများ အစည်းအဝေးသို့ တင်ပြသွားမည်ဖြစ်ပါသည်။ (၁၀) ကြိမ်မြောက် မဲခေါင်-ဂျပန် စီးပွားရေးဝန်ကြီးများအစည်းအဝေးကို စင်ကာပူနိုင်ငံတွင် ၂၀၁၈ ခုနှစ် သြဂုတ်လ၌ ကျင်းပမည့် အကြိမ်(၅၀) မြောက် အာဆီယံစီးပွားရေးဝန်ကြီးများ အစည်းအဝေး နှင့် တစ်ဆက်တည်း ကျင်းပသွားမည်ဖြစ်ပြီး မြန်မာနိုင်ငံ၊ စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးမှ ပူးတွဲသဘာပတိအဖြစ် ဆောင်ရွက်သွားရန် ရှိပါသည်။