၁။      စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ အမျိုးသားမှတ်တမ်းများမော်ကွန်းတိုက်ဦးစီး ဌာနတွင် မှတ်တမ်းအဖြစ် ထိန်းသိမ်းနိုင်ရန်အတွက် ကမ္ဘာ့ကျန်းမာရေးအဖွဲ့(WHO)က ကျန်းမာရေး နှင့်အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာနသို့ ချီးမြှင့်သည့် Dr. LEE Jong-Wook memorial Prize for Public Health (2019)ဆုနှင့် ပတ်သက်သည့် အဆိုပြုတင်ပြချက်စာအုပ်၊ ဆုတံဆိပ်နှင့် ဓါတ်ပုံမှတ်တမ်းများကို လွှဲပြောင်းပေးအပ်ခြင်းအခမ်းအနားကို (၁၆-၁၂-၂၀၁၉) ရက်နေ့၊ တနင်္လာနေ့၊ နေ့လည် (၁၄:၀၀)နာရီတွင် စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန၊ အမျိုးသားမှတ်တမ်းများ မော်ကွန်းတိုက်ဦးစီးဌာန(နေပြည်တော်)၌ ကျင်းပခဲ့ပါသည်။

၂။       အဆိုပါ ဂုဏ်ပြုမှတ်တမ်းပေးအပ်ခြင်း အခမ်းအနားသို့ ကျန်းမာရေးနှင့်အားကစားဝန်ကြီး ဌာနမှ တာဝန်ရှိပုဂ္ဂိုလ်များအဖြစ် တိုင်းရင်းဆေးဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာ သံလွင်ထွန်း၊ ပြည်သူ့ကျန်းမာရေးဦးစီးဌာနမှ ဒုတိယညွန်ကြားရေးမှူး ဒေါက်တာနန်းနိုင်နိုင်ရှိန်၊ ပြည်သူ့ကျန်းမာရေးဦးစီးဌာနမှ ဒုတိယညွန်ကြားရေးမှူး ဒေါက်တာငြိမ်းအေးထွန်းတို့နှင့် အမျိုးသား မှတ်တမ်းများ မော်ကွန်းတိုက်ဦးစီးဌာနမှ ညွှန်ကြားရေးမှူးချုပ်နှင့်တကွ အရာထမ်း၊ အမှုထမ်းများ မှ တက်ရောက်ခဲ့ကြပါသည်။

၃။      အခမ်းအနားတွင် အမျိုးသားမှတ်တမ်းများမော်ကွန်းတိုက်ဦးစီးဌာန၏ ညွှန်ကြားရေးမှူး ချုပ်၊ ဦးခင်မောင်ဝင်းမှ မော်ကွန်းတိုက်သည် မှတ်တမ်း၊မော်ကွန်းများကို ရယူစုဆောင်း ထိန်းသိမ်း ပြီး အစိုးရဌာနများနှင့် ပြည်သူလူထုများ လိုအပ်သည့်အခါ တည်ဆဲ အမျိုးသားမှတ်တမ်းနှင့် မော်ကွန်းဥပဒေနှင့်အညီ ပြန်လည် ဝန်ဆောင်မှုပေးသည့် ဌာနတစ်ခုဖြစ်ပါကြောင်း၊ နိုင်ငံတော် အတွက် ပြည်သူလူထုအခြေပြု ကျန်းမာရေးဆောင်ရွက်မှုလုပ်ငန်းတွေကို စွမ်းစွမ်းတမံ ဆောင်ရွက် ခဲ့ကြသည့်အတွက် ကမ္ဘာ့ကျန်းမာရေးအဖွဲ့က ချီးမြှင့်ခဲ့သည့်ဆုနှင့် ပတ်သက်သည်များကို မော်ကွန်း တိုက်သို့ လွှဲပြောင်းပေးအပ်သည့်အတွက် ပြည်သူ့ကျန်းမာရေးဦးစီးဌာနမှ တာဝန်ရှိပုဂ္ဂိုလ်များကို ကျေးဇူးတင်ရှိပါကြောင်း၊ မော်ကွန်းတိုက်တွင် ထားရှိခြင်းသည် ကျန်းမာရေးနှင့်အားကစားဝန်ကြီး ဌာနအတွက်သာမက နိုင်ငံတော်အတွက်ပါ သမိုင်း၊မော်ကွန်း မှတ်တိုင်တစ်ခု အနေဖြင့် ဆက်လက် တည်ရှိနေမည်ဖြစ်ပြီး နောင်လာ နောက်သား မျိုးဆက်သစ်များကိုပါ လက်ဆင့်ကမ်း သိရှိစေမည် ဖြစ်ပါကြောင်း၊ နောင်တွင်လည်း ယခုကဲ့သို့ အမျိုးသားရေး တန်ဖိုး၊ သမိုင်းတန်ဖိုးရှိသည့် မှတ်တမ်း များကို ဆက်လက် လွှဲပြောင်းပေးပါရန် ပြောကြားခဲ့ပါသည်။

၄။         ကျန်းမာရေးနှင့်အားကစားဝန်ကြီးဌာန၊ တိုင်းရင်းဆေးဦးစီးဌာနမှ ဒုတိယညွှန်ကြားရေးမှူးချုပ်၊ ဒေါက်တာသံလွင်ထွန်းမှလည်း ၎င်းတို့အဖွဲ့၏ ကြိုးပမ်းဆောင်ရွက်ခဲ့မှု အခြေအနေများကို အသေးစိတ် ရှင်းလင်းတင်ပြပြီး မိမိတို့ရရှိခဲ့သည့် ဆုတံဆိပ်နှင့် ပတ်သက်၍ အဆိုပြုတင်ပြချက် မှတ်တမ်းများကို နောင်လာနောက်သားများမှ ကိုးကားအသုံးပြုနိုင်ရန် ရည်ရွယ်၍ မော်ကွန်းတိုက် သို့ လှူဒါန်းခြင်း ဖြစ်ပါကြောင်းနှင့် ရရှိခဲ့သည့်ဆုကြေးငွေများကိုလည်း နိုင်ငံတော်၏ ကျန်းမာရေး ဖွံ့ဖြိုးရေးကဏ္ဍများတွင် လှူဒါန်းမှု ပြုခဲ့ပါကြောင်းကို ရှင်းလင်းပြောကြားပါသည်။ ဆက်လက်၍ ညွှန်ကြားရေးမှူးချုပ်မှ ကျန်းမာရေးနှင့်အားကစားဝန်ကြီးဌာနမှ တာဝန်ရှိ ပုဂ္ဂိုလ်များအား ဂုဏ်ပြု မှတ်တမ်းလွှာများ ပေးအပ်ခဲ့ပါသည်။