စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေးကော်မတီ ဆဋ္ဌမအကြိမ်အစည်းအဝေး (၃/၂၀၁၇) နှင့်  ကနဦးလိုအပ်ချက် စစ်တမ်းကောက်ယူရေး၊ ပျက်စီး ဆုံးရှုံးမှု အတည်ပြုရေးနှင့်လိုအပ်ချက်များဆန်းစစ်ဖော်ထုတ်ရေး လုပ်ငန်းကော်မတီ စတုတ္ထ အကြိမ် အစည်းအဝေး (၃/၂၀၁၇) ကို ၂၀၁၇ခုနှစ်၊ နိုဝင်ဘာလ(၉)ရက်နေ့၊ နေ့လည်(၂:၀၀) နာရီတွင် စီမံကိန်းနှင့် ဘဏ္ဍာရေး ဝန်ကြီးဌာန၊ ရုံးအမှတ်(၁) အစည်းအဝေးခန်းမ၌ ကျင်းပရာ စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေးကော်မတီနာယက ဒုတိယသမ္မတဦးဟင်နရီဗန်ထီးယူက  အဖွင့်အမှာစကား ပြောကြားခဲ့ပါသည်။   

ဒုတိယသမ္မတဦးဟင်နရီဗန်ထီးယူက  အဖွင့်အမှာစကား ပြောကြားရာတွင် နိုင်ငံတော် ဖွံ့ဖြိုးတိုးတက်မှုအတွက် စီမံကိန်းများ၊ စီမံချက်များ ရေးဆွဲခြင်း၊ မူဝါဒချမှတ်ခြင်း များအတွက် ကဏ္ဍများ၏ အခြေအနေမှန်ကို သိရှိနိုင်ရန် မူလစာရင်းအင်း အချက်အလက်များ ကောက်ယူ ခြင်း၊ လူမှုစီးပွားဆိုင်ရာ စစ်တမ်းများ ကောက်ယူခြင်း၊ သဘာဝဘေး အန္တရာယ်ဆိုင်ရာ စစ်တမ်း များကောက်ယူခြင်းတို့ကို မြန်မာနိုင်ငံအမျိုးသား စာရင်းအင်းစနစ်တွင် ပါဝင်ကြသော အဖွဲ့ အစည်းများ အားလုံးပေါင်းစပ်ပါဝင် ဆောင်ရွက်ရန် လိုအပ်ပါကြောင်း၊ ခိုင်မာပြီးအရည်အသွေး ပြည့်ဝသော စာရင်းအင်းများ ထုတ်ပြန်နိုင်ရေး၊ စာရင်းအင်းဆိုင်ရာ လွှမ်းခြုံမှု အားကောင်းစေ ရေးအတွက်  နိုင်ငံတကာစံနှုန်းများနဲ့အညီ စာရင်းအင်းဥပဒေအသစ် ပြန်လည်ရေးဆွဲပြီး တင်ပြခဲ့ရာ ၂၀၁၇ခုနှစ် အောက်တိုဘာလ (၂၅) ရက်နေ့တွင် ပြည်သူ့လွှတ်တော်မှ အတည်ပြုခဲ့ပြီး ဖြစ်ပါကြောင်း၊ စာရင်းအင်းရလဒ်များမှန်ကန်စွာ ထုတ်ပြန်နိုင်ရန် သက်ဆိုင်ရာ ဝန်ကြီးဌာနများ၊ စာရင်းအင်း အချက်အလက် ထုတ်ပြန်သူများနှင့့် အချက်အလက် သုံးစွဲသူများအကြားပူး​ပေါင်းဆောင်ရွက်ရန်နှင့် Statistics User - Provider Relations များ ကောင်းမွန်စေရန် ဆောင်ရွက်ရေး လမ်းညွှန်ပြောကြားလိုကြောင်း၊ စဉ်ဆက်မပြတ် ဖွံ့ဖြိုးမှုပန်းတိုင်များ (Sustainable Development Goals - SDGs) ကို နိုင်ငံတကာတွင် အကောင်အထည် ဖော်ဆောင်ရွက်လျက်ရှိပြီး မိမိတို့ မြန်မာနိုင်ငံတွင်လည်း အမျိုးသားအဆင့် ဘက်စုံစီမံကိန်း၊ ဒေသန္တရနှင့် ကဏ္ဍအလိုက် ကာလတို၊ ကာလလတ်၊ ကာလရှည် ဖွံ့ဖြိုးမှုစီမံကိန်းများ အထူး သဖြင့် ၅ နှစ် စီမံကိန်း မဟာဗျူဟာ မူဘောင်အတွင်းမှ လုပ်ငန်းများ အကောင်အထည်ဖော် နိုင်ရေးသည် အရေးကြီးကြောင်း၊ မြန်မာနိုင်ငံအနေဖြင့် စဉ်ဆက်မပြတ် ဖွံ့ဖြိုးမှုပန်းတိုင် ဆိုင်ရာ ရည်မှန်းချက်များ အကောင်အထည်ဖော်ဆောင်မှုကို စောင့်ကြည့် အကဲဖြတ်၍ လိုအပ်သည်များ ကို အချိန်နှင့်တစ်ပြေးညီ ဆောင်ရွက်သွားရန် ဖြစ်ပါကြောင်း၊ ဗဟိုစာရင်းအင်းအဖွဲ့၊ ကျန်းမာရေး နှင့်အားကစားဝန်ကြီးဌာန၊ UNICEF နှင့် Bloomberg တို့ ပူးပေါင်းပြီး  မြန်မာနိုင်ငံ  မွေးဖွားမှု နှင့်သေဆုံးမှုဆိုင်ရာ မှတ်ပုံတင်လုပ်ငန်း လမ်းညွှန်စာအုပ်ကို ပြန်လည် မိတ်ဆက်ခဲ့ပြီး ဖွား/သေ စာရင်းအင်းလုပ်ငန်းများ တိုးတက်လာစေရန် ဆက်လက် ဆောင်ရွက်မည့် စီမံချက်များကို သက်ဆိုင် ရာဌာနများအကြားမှာ ပူးပေါင်းဆောင် ရွက်ကြရန် တိုက်တွန်းလိုပါကြောင်း၊ ကမ္ဘာ့နိုင်ငံများ၏ ဘေးအန္တရာယ်လျော့ပါးရေးလုပ်ငန်း စီမံခန့်ခွဲမှု ဆိုင်ရာတိုးတက်မှု အခြေအနေကို သုံးသပ် နိုင်သော “ ဘေးအန္တရာယ်ကြောင့် ထိခိုက်ဆုံးရှုံးနိုင်ခြေ လျှော့ချရေးဆိုင်ရာ ဆန်ဒိုင်း မူဘောင်” ပါ သတ်မှတ်ချက်များ အောင်မြင်စေရေးအတွက် ကဏ္ဍဆိုင်ရာ၊ ဒေသန္တရဆိုင်ရာ ရည်မှန်းချက် များ ချမှတ်ပြီး အကောင်အထည်ဖော်ဆောင်ရန်၊  ယခုနှစ်အတွင်း သဘာဝ ဘေးအန္တရာယ်ဆိုင်ရာ စစ်တမ်းကို ဗဟိုစာရင်းအင်းအဖွဲ့မှ ကောက်ယူမည်ဖြစ်သည့်အတွက် သက်ဆိုင်ရာတိုင်း ဒေသကြီးနှင့်ပြည်နယ်များမှ ပူးပေါင်းဆောင်ရွက် ပေးကြရန် ထပ်လောင်း မှာကြားလိုကြောင်း၊  ဘေးအန္တရာယ်နှင့် ပတ်သက်၍ စီမံချက်များကို ကာလတို၊ ကာလရှည် ဆောင်ရွက်သွားရမည် ဖြစ်ကြောင်း၊ နိုင်ငံတော် ရန်ပုံငွေဖြင့် လည်းကောင်း၊ ဖွံ့ဖြိုးမှု မိတ်ဖက်များ၏ အကူအညီ ဖြင့်သော်လည်းကောင်း ဆောင်ရွက်မည် ဖြစ်ကြောင်း၊ နိုင်ငံဖွံ့ဖြိုးရေးတွင် အလွန်အရေးပါပြီး ယုံကြည်ကိုးစားနိုင်သော မြေပြင်စာရင်းအင်းမှန်များ ဖြစ်စေရန်၊ အချိန်နဲ့ တစ်ပြေးညီရှိစေရန်နှင့် ရှေ့နောက် ညီညွတ်မှုများရှိစေရန်၊ Stakeholder အားလုံးပါဝင် ဆောင်ရွက်ရန်အတွက် ဝန်ကြီးဌာနများအကြား၊ ဗဟိုအဆင့်နှင့် တိုင်းဒေသကြီး/ ပြည်နယ်အစိုးရများကြား ပူးပေါင်း၍ အရှိန်အဟုန်မြှင့် တိုးချဲ့ဆောင်ရွက်ကြရန်၊ မိမိတို့ ဆောင်ရွက်ရသောလုပ်ငန်းများ၏ လိုအပ်ချက် များအား ဖြည့်ဆည်းဆောင်ရွက်ပေးကြရန်နှင့် ငွေကြေးသုံးစွဲမှု လုပ်ငန်းများကို အထောက် အထားဓါတ်ပုံများဖြင့် ဥပဒေ၊ နည်းဥပဒေတို့နှင့်အညီ စနစ်တကျ ဆောင်ရွက် သွားကြရန် တိုက်တွန်းပါကြောင်း ပြောကြားခဲ့ပါသည်။

          ဆက်လက်၍ စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေး ကော်မတီနှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေးလုပ်ငန်းကော်မတီများ၏ဥက္ကဋ္ဌ စီမံကိန်းနှင့်ဘဏ္ဍာရေး ဝန်ကြီးဌာန ပြည်ထောင်စုဝန်ကြီးဦးကျော်ဝင်းက  စာရင်းအင်းလုပ်ငန်းစဉ်များ ပီပြင်စွာ အကောင်အထည်ဖော်ဆောင်ရွက်နိုင်ရေး၊ ခိုင်မာ၍ အရည်အသွေးပြည့်ဝသည့် စာရင်းအင်း ကိန်းဂဏန်းများ ထုတ်ပြန်နိုင်ရေး၊ စာရင်းအင်းဆိုင်ရာ လွှမ်းခြုံမှု အားကောင်းစေရေးအတွက်  နိုင်ငံတကာ စံနှုန်းများနှင့်အညီ စာရင်းအင်းဥပဒေအသစ် ပြန်လည်ရေးဆွဲပြီး တင်ပြခဲ့ရာ ပြည်သူ့လွှတ်တော်မှ အတည်ပြုခဲ့ပြီးဖြစ်ပါကြောင်းနှင့် စာရင်းအင်းဥပဒေသစ်ကို လွှတ်တော်မှာ ပြဋ္ဌာန်းပြီးပါကလည်း လိုအပ်သော ဥပဒေ၊ နည်းဥပဒေများ ပြဋ္ဌာန်းနိုင်ရေးအတွက် ဆောင်ရွက် သွားမည် ဖြစ်ပါကြောင်း၊ စာရင်းအင်းထုတ်ပြန်ရာတွင် အချက်အလက်မှန်ကန်‌ တိကျခိုင်မာပြီး အချိန်နှင့် တစ်ပြေးညီထုတ်ပြန်နိုင်ရန်အတွက် ပြည်ထောင်စုဝန်ကြီးဌာန ရုံးချုပ်နှင့် တိုင်းဒေသကြီး/ပြည်နယ်များ ညှိနှိုင်းပူးပေါင်းဆောင်ရွက်ကြရန်၊ စာရင်းအင်းမှန်ကန်မှသာ နိုင်ငံတော်၏ လူမှုစီးပွားဖွံ့ဖြိုး ရေးအတွက် အဓိကကျသည့် မူဝါဒများ၊ စီမံကိန်းများ ချမှတ်ရာတွင် အထောက်အကူပြုနိုင်မည် ဖြစ်ကြောင်း၊ စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေးလုပ်ငန်း ဆောင်ရွက်ရာတွင် တွေ့ကြုံခဲ့ရသည့် အခက်အခဲနှင့် စိန်ခေါ်မှုများ၊ အားနည်းချက်နှင့် လိုအပ်ချက်များ၊ ဆောင်ရွက်ပြီးစီးမှုနှင့် ဆက်လက်​ဆောင်ရွက်ရမည့်လုပ်ငန်းစဉ်များကို တက်ရောက်လာကြသူများမှ ပွင့်လင်းစွာ တိုင်ပင်ဆွေးနွေး ကြရန်နှင့် သို့မှသာလျင် မိမိတို့ဘက်မှလည်း လိုအပ်သည့်ပံ့ပိုးမှုများ ပြုလုပ်ပေးနိုင်မှာ ဖြစ်ပါ ကြောင်းပြောကြားခဲ့ပါသည်။

 ထို့နောက် စာရင်းအင်းအချက်အလက်များ မှန်ကန်ရေးနှင့် အရည်အသွေးပြည့်ဝရေး ကော်မတီနှင့် ကနဦးလိုအပ်ချက် စစ်တမ်းကောက်ယူရေး၊ ပျက်စီးဆုံးရှုံးမှု အတည်ပြုရေးနှင့် လိုအပ်ချက်များ ဆန်းစစ်ဖော်ထုတ်ရေး လုပ်ငန်းကော်မတီများ၏ အတွင်းရေးမှူး ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်က ဗဟိုစာရင်းအင်းအဖွဲ့ အနေဖြင့် စာရင်းအင်းအချက်အလက်များမှန်ကန်ရေးနှင့် အရည်အသွေးပြည့်ဝရေး ကော်မတီ၏ ပဉ္စမအကြိမ်(၃/၂၀၁၇) အစည်းအဝေးလမ်းညွှန်ချက်အရ ဗဟိုစာရင်းအင်းအဖွဲ့မှ ဆောင်ရွက် နေသည့် စာရင်းအင်းဆိုင်ရာလုပ်ငန်းများ၏တိုးတက်မှုအခြေအနေနှင့် သဘာဝဘေးဆိုင်ရာ စစ်တမ်းများကောက်ယူ၍ ဆန်းစစ်လေ့လာမှုများမှ တွေ့ရှိချက်များ၊ ရှေ့ဆက်ဆောင်ရွက်မည့် လုပ်ငန်းစဉ်များအား ရှင်းလင်းတင်ပြခဲ့ပါသည်။

ဆက်လက်၍ အစည်းအဝေး တက်ရောက်လာကြသည့်ပြည်နယ်နှင့် တိုင်းဒေသကြီးများမှ စီးပွားရေးဝန်ကြီးများက ဆွေးနွေးတင်ပြချက်များအပေါ် ပြည်ထောင်စုဝန်ကြီးက ပြန်လည် ညှိနှိုင်းဆွေးနွေးပြီ့းနောက် ဒုတိယသမ္မတ ဦးဟင်နရီဗန်ထီးယူက နိဂုံးချုပ်အမှာစကား ပြောကြား ကာ အခမ်းအနားကို ရုပ်သိမ်းခဲ့ပါသည်။     

အစည်းအဝေးသို့ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီးဦးကျော်ဝင်း၊ ဒုတိယဝန်ကြီးများ၊ တိုင်းဒေသကြီးနှင့် ပြည်နယ်အစိုးရအဖွဲ့ များမှ စီးပွားရေးနှင့်သက်ဆိုင်သည့် ဝန်ကြီးများ၊ ပြည်ထောင်စုဝန်ကြီးဌာနများမှ အမြဲတမ်း အတွင်းဝန်များ၊ တိုင်းဒေသကြီးနှင့် ပြည်နယ်အစိုးရအဖွဲ့များမှ အတွင်းရေးမှူးများ၊ လုပ်ငန်းကော်မတီအသီးသီးမှအဖွဲ့ဝင်များ၊ ညွှန်ကြားရေးမှူးချုပ်များ၊ စာရင်းအင်း ဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ(National Strategy for Development of Statistics- NSDS) ဖော်ဆောင်နိုင်ရေးလုပ်ငန်း အဖွဲ့ ခေါင်းဆောင်များ၊ စီမံကိန်းနှင့် ဘဏ္ဍာရေး ဝန်ကြီးဌာနမှ လက်ထောက်အတွင်းဝန်များနှင့် တာဝန်ရှိသူများ အပါအဝင် စုစုပေါင်း(၁၅၀)ဦး ခန့် တက်ရောက်ခဲ့ကြပါသည်။