ဒူဘိုင်းမြို့၊ အာရပ်စော်ဘွားများ ပြည်ထောင်စု

အောက်တိုဘာလ (၂၁) ရက်နေ့မှ (၂၅) ရက်နေ့အထိ

အာရပ်စော်ဘွားများ ပြည်ထောင်စု၊ ဒူဘိုင်းမြို့တွင် အောက်တိုဘာလ (၂၁) ရက်နေ့မှ (၂၅) ရက်နေ့အထိ ကျင်းပပြုလုပ်ခဲ့သည့် ၂၀၁၈ခုနှစ် ကုလသမဂ္ဂ ကမ္ဘာ့စာရင်းအင်းအချက်အလက် ဖိုရမ်နှင့် ၂၀၃၀ပြည့်နှစ် အစီအစဉ်အရ စဉ်ဆက်မပြတ်ဖွံ့ဖြိုးမှုအတွက် စာရင်းအင်းစွမ်းဆောင်ရည် မြှင့်တင်ရေးနှင့် ပူးပေါင်းဆောင်ရွက်ရေး အဆင့်မြင့်အရာရှိများအဖွဲ့၏ (၁၂)ကြိမ်မြောက် အစည်းအဝေးသို့ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင် တက်ရောက်ခဲ့ ပါသည်။ 

အစည်းအဝေးတွင် စဉ်ဆက်မပြတ်ဖွံ့ဖြိုးမှုဆိုင်ရာ ၂၀၃၀ အစီအစဉ်အား အကောင်အထည် ဖော်ရာတွင် Data Power နှင့် စပ်လျဉ်း၍ တိုးတက်မှုကို တိုင်းတာရန်၊ အထောက်အထားအခြေပြု လက်တွေ့ကျသည့် မူဝါဒများချမှတ်နိုင်ရန်၊ အချက်အလက်နှင့် စာရင်းအင်းဆိုင်ရာ နည်းလမ်းသစ်များ အသုံးချခြင်းတို့နှင့် ပတ်သက်၍ ဆွေးနွေးခဲ့ကြပြီး Cape Town Global Action Plan (CTGAP) နှင့် စာရင်းအင်းဆိုင်ရာ ဆောင်ရွက်မှုများအား ငွေကြေး ထောက်ပံ့နိုင်ရေးအတွက်ဆောင်ရွက်ထားရှိမှုများ၊ CTGAP အပြည့်အဝ အကောင်အထည် ဖော်ဆောင်ရွက်နိုင်ရန် အဆိုပြုစီမံချက်များနှင့် စပ်လျဉ်း၍ အလားအလာရှိသော ငွေကြေး ထောက်ပံ့ရေး ယန္တရားတစ်ခု ဖော်ထုတ်၍ အကောင်အထည်ဖော်ရေးအတွက် ဘဏ္ဍာရေးဆိုင်ရာ စီးဆင်းမှုများကို ချိတ်ဆက်ဆောင်ရွက်နိုင်ရန် မိတ်ဖက်အဖွဲ့အစည်းများနှင့် ဆွေးနွေးခဲ့ကြပါသည်။

အဆိုပါ အစည်းအဝေးများမှ စဉ်ဆက်မပြတ်ဖွံ့ဖြိုးတိုးတက်ရေးအတွက် ကုလသမဂ္ဂ အဖွဲ့ဝင်နိုင်ငံများ၏ အကောင်အထည်ဖော် ဆောင်ရွက်ရာတွင် တိုးတက်မှုများကို တိုင်းတာခြင်း နှင့် ညွှန်ကိန်းများတွက်ချက်တိုင်းတာခြင်းတို့ပေါ်တွင် အခြေခံသည့် မူဝါဒများချမှတ်နိုင်ရန် အချက်အလက်များနှင့်စာရင်းအင်းများကိုတီထွင်အသုံးချခြင်းဆိုင်ရာအသိအမြင်၊အတွေ့အကြုံ များဖလှယ်နိုင်ခဲ့ပြီး မြန်မာနိုင်ငံ  အမျိုးသားစာရင်းအင်းစနစ် (NSS) ၏ စာရင်းအင်းစွမ်းရည် အားကောင်းလာစေရန် စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ(NSDS) Action Plan အကောင်အထည်ဖော်ရာတွင် အထောက်အကူရရှိနိုင်မည် ဖြစ်ပါသည်။