နေပြည်တော် ၂၀၁၈ ခုနှစ်၊ ဇွန်လ(၂၉) ရက်နေ့

          စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ကမ္ဘာ့ဘဏ်(WorldBank)၊ ကုလသမဂ္ဂဖွံ့ဖြိုးမှုအစီအစဉ်(UNDP)တို့ပူးပေါင်းဆောင်ရွက်ခဲ့သည့် မြန်မာနေထိုင်မှုအခြေအနေ စစ်တမ်း(၂၀၁၇)(Myanmar Living Conditions Survey-MLCS)မှ ရရှိလာသည့် အချက်အလက်များကိုအခြေခံ၍ပြုစုခဲ့သည့်“အဓိကညွှန်ကိန်းများအစီရင်ခံစာ(Key Indicators Report)” မိတ်ဆက်ပွဲနှင့် ဂုဏ်ပြုမှတ်တမ်းလွှာပေးအပ်ပွဲအခမ်းအနားကို ၂၀၁၈ခုနှစ်၊ ဇွန်လ (၂၉)ရက်နေ့တွင် Max Hotel၊  နေပြည်တော်၌ ကျင်းပပြုလုပ်ခဲ့ပါသည်။

          အခမ်းအနားသို့ကျန်းမာရေးနှင့်အားကစားဝန်ကြီးဌာနမှ ပြည်ထောင်စုဝန်ကြီး၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး၊ အမြဲတမ်းအတွင်းဝန်များ၊ သက်ဆိုင်ရာဌာနများမှ ညွှန်ကြားရေးမှူးချုပ်များ၊ ဒုတိယ ညွှန်ကြားရေးမှူးချုပ်များ၊ NSDS Cluster အဖွဲ့ခေါင်းဆောင်များ၊ ဖွံ့ဖြိုးမှုမိတ်ဖက် အဖွဲ့အစည်းများ၊ တိုင်းဒေသကြီး/ပြည်နယ်များရှိ ဗဟိုစာရင်းအင်းအဖွဲ့(ရုံးခွဲ)များမှ တာဝန်ခံများ နှင့်ဌာနဆိုင်ရာတာဝန်ရှိသူများ၊ စစ်တမ်းကောက်ယူရာတွင် ပါဝင်ဆောင်ရွက်သူများတက် ရောက်ခဲ့ကြပါသည်။

          အခမ်းအနားတွင် ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးက အဖွင့်အမှာစကားပြောကြားရာတွင် သက်ဆိုင်ရာဝန်ကြီးဌာန၊ အဖွဲ့ အစည်းများအနေဖြင့် စစ်တမ်းအစီရင်ခံစာတွင်ပါရှိသော အချက်အလက်များကို စနစ် တကျခွဲခြမ်းစိတ်ဖြာ၍ နိုင်ငံတော်ဖွံ့ဖြိုးတိုးတက်ရေးနှင့် ပြည်သူလူထုအကျိုးရှိစေရေးအတွက် မူဝါဒများချမှတ်ရာတွင်လည်းကောင်း၊ ဘဏ္ဍာငွေနှင့် အရင်းအမြစ်များခွဲဝေချထားခြင်းဆိုင်ရာ မူဝါဒများချမှတ်ရာတွင်လည်းကောင်း၊ စီမံကိန်းရေးဆွဲရာတွင်လည်းကောင်း အသုံးပြုနိုင်မည် ဖြစ်ပြီး ယခုစစ်တမ်းအပါအဝင် စစ်တမ်းအသီးသီးမှ အချက်အလက်များကို မူဘောင်များနှင့် လမ်းပြမြေပုံများချမှတ်ရာတွင် လက်တွေ့အသုံးပြု၍ နိုင်ငံတော်နှင့်ပြည်သူလူထုအကျိုး ဖွံ့ဖြိုး တိုးတက်စေရေးလုပ်ငန်းများကို ဆောင်ရွက်ကြရန်တိုက်တွန်း လိုပါကြောင်းပြောကြား သွားခဲ့ပါ သည်။

          လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စု ဝန်ကြီးဒေါက်တာဝင်းမြတ်အေးမှ ဂုဏ်ပြုအမှာစကားပြောကြားရာတွင် ဤအစီရင်ခံစာသည် ပြည်သူလူထုအတွက်ပွင့်လင်းမြင်သာမှုကို မြှင့်တင်ရာရောက်ပြီးပြည်သူများ၏ လိုအပ်ချက်များ ကိုဖော်ထုတ်သိရှိနိုင်ပါကြောင်း၊ ညွှန်ကိန်းများအရနိုင်ငံ၏ အချို့သောနေရာဒေသများတွင် ပညာ ရေး၊ ရေနှင့်သန့်ရှင်းမှု၊ အိမ်ရာအနေအထားများ၌ တိုးတက်မှုများ နောက်ကျကျန်နေဆဲ ဖြစ်ကြောင်း၊ ဥပမာ - ရှမ်းပြည်နယ်၊ မွန်ပြည်နယ်နှင့်ရခိုင်ပြည်နယ်တို့တွင် မူလတန်းကျောင်း နေအရွယ်ကလေးဆယ်ဦးတွင် တစ်ဦးသည်ကျောင်းတက်ရောက်နိုင်ခြင်းမရှိသည်ကို တွေ့ရ ပါကြောင်း၊ ရေနှင့်သန့်ရှင်းမှုအပိုင်းတွင်လည်း ဧရာဝတီတိုင်းဒေသကြီးနှင့် ရခိုင်ပြည်နယ်တို့ရှိ ဒေသအချို့တွင် မြစ်၊ချောင်း၊ရေအိုင်တို့မှရေကို သောက်ရေအဖြစ် အသုံးပြုမှုမြင့်မားနေဆဲ ဖြစ်ကြောင်း အမှာစကားတွင်ထည့်သွင်းပြောကြားသွားခဲ့ပါသည်။

          စီမံကိန်းနှင့်ဘဏ္ဍာရေးဝန်ကြီးဌာန၊ အမြဲတမ်းအတွင်းဝန် ဦးထွန်းထွန်းနိုင်မှ နှုတ်ခွန်း ဆက်အမှာစကားပြောကြားရာတွင်  မိမိတို့ဝန်ကြီးဌာနသည် စီးပွားရေးမူဝါဒများ ဖော်ဆောင်ရာတွင် တက်ကြွစွာပါဝင်ဆောင်ရွက်နေပါကြောင်း၊  နိုင်ငံတော်၏မူဝါဒများချမှတ်ရာ တွင်လည်းကောင်း၊ ဖွံ့ဖြိုးမှုစီမံကိန်းများရေးဆွဲရာတွင်လည်းကောင်း၊ ဘတ်ဂျက်ခွဲဝေချထားရာ တွင်လည်းကောင်း လက်တွေ့ကျ၍ ယုံကြည်ကိုးစားနိုင်သည့် စာရင်းအင်းအချက်အလက် များလိုအပ်သည့်အတွက် ယခုအစီရင်ခံစာပါ အချက်အလက်များသည်  ပြည်သူတို့၏နေထိုင်မှု အခြေအနေတိုးတက်လာမှုကို အကဲဖြတ်သုံးသပ်နိုင်ပါကြောင်း ပြောကြားသွားခဲ့ပါသည်။

         ထို့နောက် ကုလသမဂ္ဂဖွံ့ဖြိုးမှုအစီအစဉ်(UNDP) မှ Country Director, Mr.Peter Bachelor ၊ ကမ္ဘာ့ဘဏ် (World Bank)မှ Lead Social Development Specialist, Mr.Sean Bradley  နှင့်  DFIDမှ Economist, Mr.NickWintleတို့မှ  နှုတ်ခွန်းဆက် အမှာစကားဆက်လက်ပြောကြားခဲ့ပါသည်။

        ထို့နောက် မြန်မာနေထိုင်မှုအခြေအနေစစ်တမ်းဆောင်ရွက်ခဲ့သည့် Video Clip မှတ်တမ်း အား ပြသခဲ့ပါသည်။

        ဆက်လက်၍ အဓိကညွှန်ကိန်းများအစီရင်ခံစာမှ တွေ့ရှိချက်များနှင့် ပတ်သက်၍ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်နှင့် ကမ္ဘာ့ဘဏ် (World Bank)တို့မှ Senior Economist, Dr.ReenaBadiani-Magnussonတို့မှ  ရှင်းလင်းပြောကြား ခဲ့ပါသည်။

       ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ  ပြောကြားရာတွင် ယခုMLCSစစ်တမ်းသည် ၂၀၁၄ ခုနှစ်တွင် ကောက်ယူခဲ့သည့် သန်းခေါင်စာရင်းမှ Master Sample Frame ကိုအသုံးပြု၍ စာရင်းကောက်ကွက် (၁၁၅၂)ခုရှိ အိမ်ထောင်စုပေါင်း (၁၃၇၃၀) အား ကောက်ယူခဲ့ရာ ၉၄% ထိ တုန့်ပြန်မှုရရှိခဲ့ပါကြောင်း၊ စစ်တမ်းကောက်ယူရာတွင် တစ်နိုင်ငံလုံးကိုခြုံငုံသုံးသပ်နိုင်စေရန်အတွက် စာရင်းကောက်ကွက်များရွေးချယ်၍ ၁၂ လတာကာလပတ်လုံး Quarter (၄)ခုခွဲ၍ ရာသီအလိုက် ကောက်ယူခဲ့ခြင်းဖြစ်ပါကြောင်း၊ စစ်တမ်းကာလတစ်လျှောက်အရည်အသွေးရှိသည့် အချက်အလက်များ Quality Data ရရှိ နိုင်ရေးအတွက် စူးစိုက်ဆောင်ရွက်ထားခြင်းကြောင့် စစ်တမ်းမှရလဒ်များသည် ယုံကြည်စိတ်ချရ ပြီးလက်တွေ့ကျ၍ ပြည်သူတို့၏ မျက်မှောက်လူနေမှုဘဝကိုထင်ဟပ်ပေါ်လွင်စေသည့်အတွက် ယခုစစ်တမ်းသည် ပြီးပြည့်စုံသည့် အကဲဖြတ်မှုများပေးစွမ်းနိုင်ပါကြောင်း၊

          စစ်တမ်းမှအချက်အလက်များသည် တိုင်းဒေသကြီး/ပြည်နယ်များအလိုက် ဆင်းရဲနွမ်းပါးမှု နှင့် နေထိုင်မှုအခြေအနေကိုသိရှိနိုင်ပြီး မြို့မ/ကျေးလက် ခွဲခြား၍ စားသုံးသူစျေးဆနှုန်း(Consumer Price Index-CPI) တွက်ချက်ရာတွင်လည်းကောင်း၊ အမျိုးသားစာရင်းအင်းစနစ်(System of National Accounts-SNA) တွက်ချက်ရာတွင် လည်းကောင်း၊ အထောက်အကူပြုနိုင်မည်ဖြစ်ပြီး တိုင်းပြည်၏အနာဂတ်ဖွံ့ဖြိုးတိုးတက်မှုအတွက် မူဝါဒများချမှတ်ရာတွင်လည်းကောင်း၊ စီမံကိန်းများရေးဆွဲရာတွင်လည်းကောင်း၊ သယံဇာတများခွဲဝေအသုံးပြုရာတွင်လည်းကောင်း၊ စဉ်ဆက်မပြတ်ဖွံ့ဖြိုးမှုပန်းတိုင်များ (Sustainable Development Goals-SDGs) အကောင်အထည်ဖော်ရေးတွင် စောင့်ကြည့်အကဲဖြတ်ရာတွင်လည်းကောင်း အသုံးပြုနိုင်မည် ဖြစ်ပါကြောင်း၊ ယခုထွက်ရှိလာသည့် အစီရင်ခံစာသည် ပထမဦးဆုံးအစီရင်ခံဖြစ်ပြီး ဆက်လက်၍ ဆင်းရဲနွမ်းပါးမှုနှင့်မညီမျှမှုဆိုင်ရာအစီရင်ခံစာ၊ အမျိုးသားအဆင့်နှင့် တိုင်းဒေသကြီး/ပြည်နယ်အဆင့်အလိုက်  လူမှုစီးပွားအခြေအနေ အစီရင်ခံစာများ ဆက်လက် ထွက်ပေါ်ရေးအတွက် ကြိုးပမ်းဆောင်ရွက်မည် ဖြစ်ပါကြောင်းထည့်သွင်းပြောကြားခဲ့ပါသည်။

            ဆက်လက်၍ Panel Discussionကို ပြုလုပ်ရာဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ ဦးဆောင်၍ “ Listening to the voice of the  people of Myanmar to improve their lives” ခေါင်းစဉ်ဖြင့်ပြည်သူ့အင်အားဦးစီးဌာန၊ စီမံကိန်းရေးဆွဲရေးဦးစီးဌာန၊ ကုလသမဂ္ဂဖွံ့ဖြိုးမှုအစီအစဉ်၊ကမ္ဘာ့ဘဏ်နှင့်  မြန်မာဖွံ့ဖြိုးမှု အဖွဲ့အစည်းတို့မှ အသီးသီးဆွေးနွေးခဲ့ကြပြီး တက်ရောက်လာသူများမှ သိလိုသည်များ မေးမြန်းဆွေးနွေးခဲ့ကြပါသည်။

          ညနေပိုင်းတွင် စစ်တမ်းကောက်ယူရာတွင် ပါဝင်ဆောင်ရွက်ခဲ့သည့် တိုင်းဒေသကြီး/ ပြည်နယ်များမှ စာရင်းကောက်သူများနှင့် စစ်တမ်းကြီးကြပ်သူများမှ စစ်တမ်းအတွေ့အကြုံများ ရှင်းလင်းတင်ပြကြပါသည်။ ထို့နောက်  ညွှန်ကြားရေးမှူးချုပ် ဒေါက်တာဝါဝါမောင်မှ  တိုင်းဒေသ ကြီး/ ပြည်နယ်များအလိုက် ဂုဏ်ပြုမှတ်တမ်းလွှာများပေးအပ် ခဲ့ပါသည်။

                                        သတင်းစဉ်