နေပြည်တော်၊ ဇွန်လ (၈) ရက် တွင် စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် UNICEF ၊ Bloomberg ၊ အထွေထွေအုပ်ချုပ်ရေးဦးစီးဌာနတို့ ပူးပေါင်း၍ ရပ်ကွက်/ကျေးရွာအုပ်ချုပ်ရေးမှူးများအတွက် စာရင်းအင်းမှန်ကန်ရေးနှင့် အရည်အသွေးပြည့်ဝရေးအသိပညာပေးဆရာဖြစ်သင်တန်းဆင်းလက်မှတ်ပေးအပ်ပွဲအခမ်းအနားကို ၂၀၁၈ ခုနှစ်၊ ဇွန်လ (၈) ရက်နေ့တွင် Horizon Lake View Resort Hotel၊နေပြည်တော်၌ ကျင်းပခဲ့ရာဗဟိုစာရင်းအင်းအဖွဲ့၊ညွှန်ကြားရေးမှူးချုပ် ဒေါက်တာဝါဝါမောင်နှင့် ဒုတိယညွှန်ကြားရေးမှူးချုပ် ဦးသန်းဇော်တို့မှ သင်တန်းသား/သူများအားသင်တန်းဆင်းလက်မှတ်ပေးအပ်ခဲ့ပါသည်။

အခမ်းအနားသို့ တိုင်းဒေသကြီး/ ပြည်နယ်၊ ခရိုင် အထွေထွေအုပ်ချုပ်ရေးဦးစီးဌာနများမှ အရာထမ်းများ၊ တိုင်းဒေသကြီး/ ပြည်နယ်ဗဟိုစာရင်းအဖွဲ့မှ အရာထမ်းများ၊ UNICEF နှင့် Bloomberg မှ တာဝန်ရှိသူများတက်ရောက်ခဲ့ပါသည်။

အဆိုပါသင်တန်းသည် ၂၀၁၈ ခုနှစ်၊ ဇွန်လ (၆) ရက်နေ့မှ (၈) ရက်နေ့အထိသင်ကြားပို့ချခဲ့ခြင်းဖြစ်ပါသည်။သင်တန်းတွင် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ အရည်အသွေးပြည့်ဝသည့် အမျိုးသားစာရင်းအင်းစနစ်ပေါ်ပေါက်ရေး၊ အုပ်ချုပ်မှုဆိုင်ရာမှတ်တမ်းများကောင်းမွန်စေရေး၊စာရင်းအင်းဥပဒေအကောင်အထည်ဖော်ရေး၊ခေါင်းဆောင်မှုနှင့် အုပ်ချုပ်မှုဆိုင်ရာပညာရပ်များနှင့် ပတ်သက်၍ သင်ကြားပို့ချခြင်း၊ ဒုတိယညွှန်ကြားရေးမှူးချုပ် ဦးသန်းဇော်မှရပ်ကွက်၊ ကျေးရွာများတွင် ထားရှိရမည့် အခြေခံစာရင်းအင်းများအကြောင်းရှင်းလင်းပို့ချခြင်း၊ ဒုတိယညွှန်ကြားရေးမှူးဒေါ်နော်ဆာကပေါမှ မြန်မာနိုင်ငံ၏ မွေးဖွားမှုနှင့် သေဆုံးမှတ်ပုံတင်ခြင်းစနစ်နှင့် ဆောင်ရွက်နေမှုအခြေအနေများအားဆွေးနွေးတင်ပြခြင်း၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ ညွှန်ကြားရေးမှူးဒေါ်မြတ်မိုးသွယ်မှ သဘာဝဘေးအန္တရာယ်ကြောင့် ထိခိုက်ပျက်စီးမှုစာရင်းများကိုအလျင်အမြန်ကောက်ယူခြင်း၊ The Application of KOBO (Myanmar): Rapid Disaster Damage & Loss Assessment Tool နှင့် ပတ်သက်၍ ရှင်းလင်းပို့ချခြင်း၊ UNICEF နှင့် Bloomberg မှ တာဝန်ရှိသူများမှ ဖွားသေစာရင်းအင်းအရေးပါပုံအကြောင်းရှင်းလင်းဆွေးနွေးခြင်း၊ ပြည်နယ်နှင့် တိုင်းဒေသကြီးအလိုက် သင်တန်းသား/သင်တန်းသူများအုပ်စုလိုက်ဆွေးနွေးခြင်း၊ ပြန်လည်တင်ပြခြင်းများဆောင်ရွက်ခဲ့ကြပါသည်။

သင်တန်းသား/သင်တန်းသူများအနေဖြင့် သက်ဆိုင်ရာတိုင်းဒေသကြီး/ ပြည်နယ်များတွင်ရပ်ကွက်/ကျေးရွာအုပ်ချုပ်ရေးမှူးများအားဆင့်ပွားသင်တန်းများပြန်လည်ပို့ချ သင်ကြားပေးနိုင်ရန်နှင့် စာရင်းအင်းအချက်အလက်များကောက်ယူစုစည်းရာတွင်အရည်အသွေးပြည့်ဝသောစာရင်းအင်းများမှန်ကန်စွာကောက်ယူစုစည်းနိုင်စေရန်နှင့် အမျိုးသားစာရင်းအင်းစနစ်တွင် ပါဝင်သောအဖွဲ့အစည်းများအချင်းချင်းပိုမိုနီးကပ်စွာညှိနှိုင်းပေါင်းစပ် ဆောင်ရွက်နိုင်စေရန် ရည်ရွယ်၍ ဖွင့်လှစ်ခဲ့ခြင်းဖြစ်ပါသည်။