နေပြည်တော

စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့သည် UNICEF၊ Bloomberg၊ အထွေထွေအုပ်ချုပ်ရေးဦးစီးဌာနတို့နှင့်ပူးပေါင်း၍ရပ်ကွက်/ကျေးရွာအုပ်ချုပ်ရေးမှူးများအတွက် စာရင်းအင်းများမှန်ကန်ရေးနှင့်အရည်အသွေးပြည့်ဝရေးအသိပညာပေးဆရာဖြစ်သင်တန်းကို ၂၀၁၈ ခုနှစ်၊ ဇွန်လ (၆) ရက်နေ့မှ (၈) နေ့အထိ Horizon Lake View Resort Hotel၊နေပြည်တော်၌ ကျင်းပပြုလုပ်ခဲ့ပါသည်။

သင်တန်းဖွင့်ပွဲအခမ်းအနားသို့ ပြည်ထဲရေးဝန်ကြီးဌာနမှ အမြဲတမ်းအတွင်းဝန် ဦးတင်မြင့်၊ စီမံကိန်းနှင့်ဘဏ္ဍာရေးဝန်ကြီးဌာန၊ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်၊ တိုင်းဒေသကြီး/ ပြည်နယ်၊ ခရိုင်အထွေထွေအုပ်ချုပ်ရေးဦးစီးဌာနများမှ အရာထမ်းများ၊ တိုင်းဒေသကြီး/ ပြည်နယ်၊ဗဟိုစာရင်းအင်းအဖွဲ့မှ အရာထမ်းများအပါအဝင် စုစုပေါင်းသင်တန်းသား (၁၇၃) ဦးတက်ရောက်ခဲ့ပါသည်။

သင်တန်းဖွင့်ပွဲအခမ်းအနားတွင် ပြည်ထဲရေးဝန်ကြီးဌာန၊အမြဲတမ်းအတွင်းဝန် ဦးတင်မြင့်မှ အဖွင့်အမှာစကားပြောကြားရာတွင်အထွေအထွေအုပ်ချုပ်ရေးဦးစီးဌာနအနေဖြင့် ရပ်ကွက်(သို့)ကျေးရွာအုပ်စုအုပ်ချုပ်ရေးဆိုင်ရာနည်းဥပဒေပါ ပြဋ္ဌာန်းထားသည့် စာရင်းဇယားပုံစံ (၂၇) မျိုးကိုရပ်ကျေးအဆင့်တွင် ထားရှိဆောင်ရွက်လျက်ရှိသည့်အပြင် လူဦးရေနှင့် သက်ဆိုင်သည့် စာရင်းဇယား(၆)မျိုးကိုလည်းအုပ်ချုပ်ရေး၊ လူမှုရေး၊ လုံခြုံရေးဆိုင်ရာကိစ္စရပ်များနှင့် စီမံခန့်ခွဲရေးလုပ်ငန်းများအဆင်ပြေချောမွေ့စွာဆောင်ရွက် နိုင်ရန်အတွက် ကောက်ခံစာရင်းပြုစုလျက်ရှိပါကြောင်း၊မွေးဖွားမှု/ သေဆုံးမှုကိစ္စရပ်များနှင့် စပ်လျဉ်း၍ ၂၀၁၂ခုနှစ်၊ ရပ်ကွက်(သို့) ကျေးရွာအုပ်စုအုပ်ချုပ်ရေးဥပဒေတွင် ပြဋ္ဌာန်းထားသည့်အတိုင်းသက်ဆိုင်ရာဝန်ကြီးဌာနများနှင့် ပူးပေါင်း၍ မွေးဖွားမှုနှင့် သေဆုံးမှုစာရင်းအင်းများကိုမှန်ကန်တိကျပြည့်စုံစွာရရှိအောင်ဆောင်ရွက်ရမည်ဖြစ်ပါကြောင်း၊ တိုင်းဒေသကြီး/ပြည်နယ်၊ နေပြည်တော်ကောင်စီ၊ ခရိုင်များမှ အုပ်ချုပ်ရေးမှူးများအနေဖြင့် သင်တန်းမှရရှိသောအသိပညာဗဟုသုတများကိုပြန်လည်မျှဝေကြရန်နှင့် တိကျမှန်ကန်၍ အရည်အသွေးပြည့်ဝသောစာရင်းအင်းများရရှိရန်အတွက် ကြိုးပမ်းဆောင်ရွက်ကြရန် ပြောကြားခဲ့ပါသည်။

ဆက်လက်၍ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ အမှာစကားပြောကြားရာတွင် အသိပညာပေးသင်တန်း (၃) ရက်တာကာလကိုအမျိုးသားစာရင်းအင်းစနစ်တွင် ပါဝင်သောအဖွဲ့အစည်းဌာနအချင်းချင်းပိုမိုနီးကပ်စွာပူးပေါင်းဆောင်ရွက်ဖွင့်လှစ်ခွင့်ရသည့်အတွက် ကျေးဇူးအထူးတင်ရှိပါကြောင်း၊ ဤသင်တန်းများကိုဖွင့်လှစ်ရခြင်းမှာဗဟိုစာရင်းအင်းအဖွဲ့အနေဖြင့် စာရင်းအင်းဥပဒေကိုအကောင်အထည်ဖော်ခြင်းဖြစ်သလိုအထွေထွေအုပ်ချုပ်ရေးဦးစီးဌာနသည်လည်းရပ်ကွက်(သို့) ကျေးရွာအုပ်စုအုပ်ချုပ်ရေးဆိုင်ရာနည်းဥပဒေကိုအကောင်အထည်ဖော်ခြင်းပင်ဖြစ်ပါကြောင်း၊အုပ်ချုပ်မှုဆိုင်ရာမှတ်တမ်းများသည် တရားဝင်စာရင်းအင်းများအတွက် အလွန်အရေးကြီးသည့် မှတ်တမ်းများဖြစ်ပါကြောင်း၊ တိကျမှန်ကန်၍ လက်တွေ့ကျသောစာရင်းအင်းအချက်အလက်များကိုအခြေခံပြီးစီမံကိန်းများ၊ မူဝါဒများရေးဆွဲမှသာပိုမိုအောင်မြင်နိုင်မည် ဖြစ်ပါကြောင်းပြောကြားခဲ့ပါသည်။

အဆိုပါသင်တန်းတွင် စာရင်းအင်း၏ အရေးပါပုံ၊ ဖွံ့ဖြိုးမှုစီမံကိန်းနှင့် စောင့်ကြပ်ကြည့်ရှုရေးလုပ်ငန်းများတွင် စာရင်းအင်းအချက်အလက်အသုံးပြုနိုင်မှု၊ ခေတ်စနစ်အရလိုအပ်လျက်ရှိသည့် စာရင်းဇယားပုံစံ (၂၇) မျိုး၊ မွေးဖွားမှုနှင့် သေဆုံးမှုဆိုင်ရာစာရင်းအင်းများ၏ အရေးပါပုံ၊ အသုံးပြုမှုနည်းလမ်းများကိုဆရာဖြစ် သင်တန်းအဖြစ် (၃) ရက်ကြာပူးပေါင်းဖွင့်လှစ်ကျင်းပခဲ့ခြင်းဖြစ်ပြီးပြည်နယ်နှင့် တိုင်းဒေသကြီးအလိုက် ဆင့်ပွားသင်တန်းများအဖြစ် ဆက်လက်ပို့ချမည် ဖြစ်ကြောင်းသတင်းရရှိပါသည်။

          (သတင်းစဉ်)