Mobile Tablet ဖြင့် မွေးဖွားမှုနှင့် သေဆုံးမှုကို မှတ်ပုံတင်ခြင်း နည်းပညာဆိုင်ရာ မိတ်ဆက်ပွဲအခမ်းအနားကို ၂၀၁၉ ခုနှစ်၊ အောက်တိုဘာလ (၃) ရက်နေ့တွင် မော်လမြိုင်မြို့ရှိ Royal Hinthar ဟိုတယ်၌ ကျင်းပပြုလုပ်ခဲ့ရာ မွန်ပြည်နယ်ဝန်ကြီးချုပ် ဒေါက်တာအေးဇံမှ အဖွင့်မိန့်ခွန်း ပြောကြားခဲ့ပြီး ပြည်ထောင်စုအစိုးရအဖွဲ့ရုံးဝန်ကြီးဌာန၊ ဒုတိယဝန်ကြီးဦးတင်မြင့်မှ အဖွင့်အမှာစကားပြောကြားခဲ့ပါသည်။ အခမ်းအနားတွင် ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်မှ စီမံချက်နှင့်ပတ်သက်၍ ရှင်းလင်းတင်ပြကာ Tablet ဖြင့် မွေးစားရင်းထုတ်ယူခြင်းအား လက်တွေ့ပြသခဲ့ပြီး Tablet နှင့် ကွန်ပျူတာဆက်စပ်ပစ္စည်းများအား မွန်ပြည်နယ်၊ ပြည်သူ့ကျန်းမာရေးဦးစီးဌာနသို့ လွှဲပြောင်း ပေးအပ်ခဲ့ပါသည်။ အဆိုပါအခမ်းအနားသို့ မွန်ပြည်နယ်ဝန်ကြီးချုပ် ဒေါက်တာအေးဇံ၊ ပြည်ထောင်စုအစိုးရအဖွဲ့ရုံးဝန်ကြီးဌာန၊ ဒုတိယဝန်ကြီးဦးတင်မြင့်၊ မွန်ပြည်နယ်အစိုးရအဖွဲ့ဝင် ဝန်ကြီး များ၊ ကျန်းမာရေးနှင့်အားကစားဝန်ကြီးဌာန၊ အမြဲတမ်းအတွင်းဝန် (၁)၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်၊ UNICEF မှ ဌာနေကိုယ်စားလှယ်၊ Telenor Myanmar မှ အမှုဆောင်အရာရှိချုပ်နှင့် ဖိတ်ကြားထားသည့် ဧည့်သည်တော်များ တက်ရောက်ခဲ့ပါသည်။ (သတင်းစဉ်)

၂၀၁၉ ခုနှစ်၊ အောက်တိုဘာလ (၃) ရက်