စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ကုလသမ္ဂ္ဂဖွံ့ဖြိုးမှုအစီအစဉ်တို့ ပူးပေါင်း၍ “မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (Myanmar Sustainable Development Plan-MSDP) ကို အကောင်အထည်ဖော်ဆောင်ရာ၌ စောင့်ကြည့်အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework-NIF) တစ်ရပ် ဖွံ့ဖြိုးလာစေရေး လုပ်ငန်းညှိနှိုင်းဆွေးနွေးပွဲ ဖွင့်ပွဲကို ၂၀၁၉ ခုနှစ် ဇွန်လ (၄) ရက် (အင်္ဂါနေ့) နံနက် (၁၀:၀၀) အချိန်တွင် နေပြည်တော်ရှိ Royal President Hotel ၌ ကျင်းပပြုလုပ်ခဲ့ရာစီမံကိန်းနှင့်ဘဏ္ဍာရေးဝန်ကြီးဌာန၊ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဉီးဆန်းမြင့် မှ အဖွင့်အမှာစကားပြောကြားခဲ့ပါသည်။

          စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဉီးဆန်းမြင့်မှ အဖွင့်အမှာစကား ပြောကြားရာတွင် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable Development Plan-MSDP)ကို အကောင်အထည်ဖော်ဆောင်ရာတွင် တိုးတက်မှု၊ ထိရောက်မှုများကို စောင့်ကြည့် အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework-NIF) တစ်ရပ် ပေါ်ထွက်လာစေရေး ဆောင်ရွက်လျက်ရှိပါကြောင်း၊ ယခုကဲ့သို့ ဆောင်ရွက်ရာတွင် အမျိုးသားစာရင်းအင်းအဖွဲ့အစည်းဖြစ်သည့် ဗဟိုစာရင်းအင်းအဖွဲ့အနေဖြင့် Focal အဖြစ် ဆောင်ရွက်ခွင့်ရရှိသည့် အတွက် ဝမ်းမြောက်ဂုဏ်ယူမိပါကြောင်း၊ အမျိုးသားညွှန်ကိန်းမူဘောင် ပေါ်ထွက်လာစေရေးအတွက် ဝန်ကြီးဌာနများ၊ ဦးစီးဌာနများ၊ အစိုးရမဟုတ်သော အဖွဲ့အစည်းများ၊ ဖွံ့ဖြိုးမှုမိတ်ဖက်များနှင့် ပူးပေါင်း၍ လုပ်ငန်းကဏ္ဍအလိုက် အဖွဲ့ ၁၃ ဖွဲ့ဖြင့် ဆောင်ရွက်လျက်ရှိပါကြောင်း၊ ပထမအကြိမ် ညှိနှိုင်းဆွေးနွေးပွဲများကို ၂၀၁၈ ခုနှစ် ဩဂုတ်လတွင် ကျင်းပခဲ့ပြီး ဒုတိယအကြိမ် ညှိနှိုင်းဆွေးနွေးပွဲများကို ၂၀၁၈ ခုနှစ် နိုဝင်ဘာလတွင် ကျင်းပခဲ့ပါကြောင်း၊ ယခု တတိယအကြိမ် တစ်နည်းအားဖြင့် NIF Draft One version-2 နောက်ဆုံးအကြိမ် ညှိနှိုင်းဆွေးနွေးပွဲများကို ပြုလုပ်သွားမှာ ဖြစ်ပါကြောင်း၊ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက် ညီသော ဖွံ့ဖြိုးတိုးတက်မှုစီမံကိန်း (MSDP)သည် နိုင်ငံတကာ ကတိကဝတ်များနှင့်အညီ အကောင်အထည်ဖော်ဆောင်နေသည့် စဉ်ဆက်မပြတ်ဖွံ့ဖြိုးမှု ပန်းတိုင်များ၏ ရည်မှန်းချက်များ အပါအဝင် မိမိတို့နိုင်ငံ၏ အခြေအနေနှင့် လျော်ညီသည့် ဖွံ့ဖြိုးမှု လိုအပ်ချက်များကို ထည့်သွင်းထားသော စီမံကိန်း ဖြစ်ပါကြောင်း၊ စီမံကိန်းတွင် မဏ္ဍိုင် (၃) ရပ်၊ ပန်းတိုင် (၅) ရပ်၊ မဟာဗျူဟာ (၂၈) ခု အကောင်အထည်ဖော်မည့် လုပ်ငန်းအစီအစဉ် (၂၅၁) ခု ပါဝင်ပါကြောင်း၊  အမျိုးသားညွှန်ကိန်းမူဘောင် ကို ဖော်ဆောင်ရာတွင် နိုင်ငံအဆင့် တိုင်းတာရမှာ ဖြစ်သည့်အတွက် Project Level အပြင် Strategic Level ကိုပါ ထည့်သွင်းစဉ်းစား ဆွေးနွေးခဲ့ကြပါကြောင်း ပြောကြားခဲ့ပါသည်။

ဆက်လက်၍ ကုလသမဂ္ဂဖွံ့ဖြိုးမှုအစီအစဉ်မှ Monitoring and Evaluation Expert ဖြစ်သူ Mr. Nicolas Garrigue မှ NIF Draft One version-2 ညှိနှိုင်းဆွေးနွေးပွဲကျင်းပရခြင်းနှင့် စပ်လျဉ်း၍ ဆွေးနွေး ပြောကြာခဲ့ပါသည်။

ညှိနှိုင်းဆွေးနွေးပွဲသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ်နှင့်  တာဝန်ရှိသူများ၊  သက်ဆိုင်ရာ ဝန်ကြီးဌာနများနှင့် ဉီးစီးဌာနများမှ တာဝန်ရှိပုဂ္ဂိုလ်များ၊  ကုလသမဂ္ဂဖွံ့ဖြိုးမှုအစီအစဉ်မှ ကိုယ်စား လှယ်များ၊ အစိုးရမဟုတ်သော အဖွဲ့အစည်းများမှ ကိုယ်စားလှယ်များ၊ အမျိုးသားညွှန်ကိန်းမူဘောင် ဖော်ဆောင်ရေး လုပ်ငန်း အဖွဲ့များနှင့် ဖွံ့ဖြိုးမှုမိတ်ဖက်များ အပါအဝင် စုစုပေါင်း (၂၀၀) ဦးခန့် တက်ရောက်ခဲ့ကြပါသည်။

          အဆိုပါ ညှိနှိုင်းဆွေးနွေးပွဲသည် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်းကို အကောင်အထည်ဖော်ဆောင်သည့် ကာလတစ်လျှောက်လုံးနှင့် အကောင်အထည်ဖော်ပြီးနောက်ပိုင်း ကာလအထိ စီမံကိန်း၏ ထိရောက်မှု၊ တိုးတက်မှု၊ ရေရှည်တည်တံ့မှုနှင့် သက်ရောက်မှုတို့ကို သိရှိတိုင်းတာနိုင်စေရန်အတွက် ညီညွတ်ပြီး တစ်သမတ်တည်းဖြစ်စေသည့် စောင့်ကြည့်လေ့လာ အကဲဖြတ်နိုင်သည့် အမျိုးသားညွှန်ကိန်း မူဘောင် တစ်ရပ် ပေါ်ထွက်လာစေရန် ရည်ရွယ်၍ ၂၀၁၉ ခုနှစ် ဇွန်လ (၄) ရက်နေ့မှ (၇) ရက်နေ့ထိ ကျင်းပ ပြုလုပ်သွားမည်ဖြစ်ပါသည်။