စီမံကိန်းနှင့်ဘဏ္ဍာရေးဝန်ကြီးဌာန၊ စီမံကိန်းရေးဆွဲရေးဦးစီးဌာနတွင် တာဝန်ထမ်းဆောင်နေသည့် လူငယ်ဝန်ထမ်းများ၏ လုပ်ငန်းဆောင်ရွက်မှုတွင် ပိုမိုထိရောက်စွာ ဆောင်ရွက်နိုင်ရေးအတွက် လူငယ်အသိပညာဖလှယ်ပွဲ ၇/၂၀၂၄ ကို “အဂတိဖယ်ခွာ ပြည်သာယာ” ခေါင်းစဉ်ဖြင့် ၂၀၂၄ ခုနှစ်၊ စက်တင်ဘာလ ၁၈ ရက်နေ့၊ ၁၃:၀၀ နာရီတွင် ဤဦးစီးဌာန၊ သင်တန်းကျောင်း၌ ကျင်းပပြုလုပ်ခဲ့ပြီး ဦးစီးကော်မတီဝင်များနှင့် အသက် ၃၅ နှစ်အောက် လူငယ်ဝန်ထမ်း (၅၀)ဦး ပါဝင်တက်ရောက်ခဲ့ပါသည်။

လူငယ်အသိပညာဖလှယ်ပွဲတွင် “အဂတိဖယ်ခွာ ပြည်သာယာ” ခေါင်းစဉ်နှင့်ပတ်သက်၍ အဂတိဆိုသည်မှာ မည်သူမဆို ရာထူးတာဝန်ကို အလွဲသုံးစားပြု၍ဖြစ်စေ၊ အခြားတစ်နည်းဖြင့်ဖြစ်စေ၊ တစ်စုံတစ်ရာကို ပြုလုပ်ရန်၊ ဥပဒေနှင့်အညီ ပြုလုပ်ခြင်းမှ ရှောင်ကြဉ်ရန်၊ ဥပဒေနှင့်အညီ ရထိုက်ခွင့်မရှိသောအခွင့်အရေးကိုပေးရန်၊ ဥပဒေနှင့်အညီရထိုက်ခွင့်ရှိသော အခွင့်အရေးကိုမပေးရန်၊ မမှန်ကန်သောနည်းလမ်းဖြင့်ပိတ်ပင်ရန်အတွက် တံစိုးလက်ဆောင်ပေးခြင်း၊ ပေးရန်အားထုတ်ခြင်း၊ လက်ခံခြင်း၊ လက်ခံရန်အားထုတ်ခြင်းစသည်တို့ကို တိုက်ရိုက်ဖြစ်စေ၊သွယ်ဝိုက်၍ဖြစ်စေပြုလုပ်ခြင်းဖြစ်ကြောင်း၊ အဂတိတရားလေးပါးဖြစ်သည့် ဆန္ဒာဂတိ၊ ဒေါသာဂတိ၊ ဘယာဂတိနှင့် မောဟာဂတိ များကို သိ၍ဖြစ်စေ၊ မသိ၍ဖြစ်စေ ဖြစ်ပေါ်ဆောင်ရွက်နိုင်သည့် အခြေအနေများအား မြတ်စွာဘုရား ဟောကြားထားသည့် တရားတော်များ၊ ရှေးလူကြီးများ၏အဆိုအမိန့်များကို ကိုးကား၍ အသိပညာဖလှယ်ခဲ့ကြပါသည်။ ထို့ပြင် အဂတိလိုက်စားမှုများသည် နိုင်ငံဖွံ့ဖြိုးတိုးတက်မှုအပေါ်အဟန့်အတား ဖြစ်စေကြာင်း၊ အဂတိတရားကင်းစင်ပါက ငြိမ်းချမ်းသာယာသည့် လူ့အဖွဲ့အစည်းတစ်ရပ်ကိုဖန်တီးနိုင်ပြီး နိုင်ငံတစ်နိုင်ငံ၏ စီးပွားရေး၊ လူမှုရေး၊ ပညာရေး၊ ကျန်းမာရေးစသည့် ကဏ္ဍများတွင် ပိုမိုအရည်အသွေးပြည့်ဝစွာဆောင်ရွက်နိုင်မည်ဖြစ်ကြောင်း၊ မြန်မာနိုင်ငံအနေဖြင့် အဂတိလိုက်စားမှု တိုက်ဖျက်ရေးလုပ်ငန်းစဉ်များနှင့်ပတ်သက်၍ အဂတိလိုက်စားမှုတိုက်ဖျက်ရေးကော်မရှင်ဖွဲ့စည်းထားရှိပြီး အဂတိလျော့ပါးခြင်းမှတစ်ဆင့် ပပျောက်စေသည့်အထိ ဆောင်ရွက်နေကြောင်း စသဖြင့် ပါဝင်ဆွေးနွေးသူများက အသိပညာဖလှယ်ခဲ့ကြပြီး တက်ရောက်လာသည့် လူငယ်ဝန်ထမ်းများက   ပြန်လည်မေးမြန်းဆွေးနွေးခဲ့ကာ လူငယ်အသိပညာဖလှယ်ပွဲကို ၁၄:၀၀ နာရီတွင် ရုပ်သိမ်းခဲ့ပါသည်။