စီမံကိန်းနှင့်ဘဏ္ဍာရေးဝန်ကြီးဌာန၊ စီမံကိန်းရေးဆွဲရေးဦးစီးဌာနတွင် တာဝန်ထမ်းဆောင်နေသည့် လူငယ်ဝန်ထမ်းများ၏ လုပ်ငန်းဆောင်ရွက်မှုတွင် ပိုမိုထိရောက်စွာ ဆောင်ရွက်နိုင်ရေးအတွက် လူငယ်အသိပညာဖလှယ်ပွဲ ၅/၂၀၂၄ ကို “ဗလငါးတန်နှင့် ပြည့်စုံဖို့ လူငယ်အားလုံး ကြိုးစားစို့” ခေါင်းစဉ်ဖြင့် ၂၀၂၄ ခုနှစ်၊ မေလ ၁၆ ရက်နေ့၊ မွန်းလွဲ ၁၅း၀၀ နာရီတွင် ဤဦးစီးဌာန၊ သင်တန်းကျောင်း၌ ကျင်းပပြုလုပ်ခဲ့ပြီး ဦးစီးကော်မတီဝင်များနှင့် အသက် ၃၅ နှစ်အောက် လူငယ်ဝန်ထမ်း (၄၀)ဦး ပါဝင်တက်ရောက်ခဲ့ပါသည်။

လူငယ်အသိပညာဖလှယ်ပွဲတွင် ဗလငါးတန်နှင့်ပြည့်စုံဖို့ လူငယ်အားလုံးကြိုးစားစို့ ခေါင်းစဉ်နှင့်သက်ဆိုင်သည့် ဗလငါးတန်ဖွံ့ဖြိုးတိုးတက်ရေးနှင့်ပတ်သက်၍ မျက်မှောက်ခေတ်၌ သိပ္ပံနှင့်နည်းပညာများလျှင်မြန်စွာ တိုးတက်ပြောင်းလဲလာရာရုပ်ဝတ္ထုများသာတိုးတက်လာပြီး စိတ်ပိုင်းဆိုင်ရာများတွင် အားနည်းမှုများရှိလာကြောင်း၊ ရုပ်ပိုင်းဆိုင်ရာနှင့်စိတ်ပိုင်းဆိုင်ရာများ အချိုးညီစွာတိုးတက်စေရေးအတွက် ဗလငါးတန်ဖြစ်သည့် ကာယဗလ၊  ဉာဏဗလ၊ ဘောဂဗလ၊ စာရိတ္တဗလနှင့် မိတ္တဗလတို့ကို ဖြည့်ဆည်းရန် လိုအပ်ပါကြောင်း၊  ဗလငါးတန်ပြည့်စုံစေရေးအတွက် ဆောင်ရွက်ရန်လိုအပ်ချက်များ၊ အသိပညာများ၊ ရှေးအဆိုအမိန့်များ၊ ဆရာတော်ကြီးများ ဟောကြားသည့်တရားတော်များကို ကိုးကားပြီး ၎င်းတို့၏ လက်တွေ့အသိအမြင်များနှင့် ပေါင်းစပ်၍ ပါဝင်ဆွေးနွေးသူများက  အသိပညာဖလှယ်ခဲ့ကြပြီး  တက်ရောက်လာသည့်  လူငယ်ဝန်ထမ်းများက  ပြန်လည်ဆွေးနွေးမေးမြန်းခဲ့ကာ လူငယ်အသိပညာဖလှယ်ပွဲကို ၁၆း၃၀ နာရီတွင် ရုပ်သိမ်းခဲ့ပါသည်။