စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းသည် ဖိလစ်ပိုင်နိုင်ငံ၊ မနီလာမြို့တွင် ၂၀၁၇ ခုနှစ် စက်တင်ဘာလ ၆ ရက်နေ့မှ  ၁၁ ရက်နေ့အထိကျင်းပသည့်  (၄၉) ကြိမ် မြောက် အာဆီယံစီးပွားရေးဝန်ကြီးများအစည်းအဝေးနှင့် ဆက်စပ်အစည်းအဝေးများသို့ တက်ရောက်လျက်ရှိသည်။

အဆိုပါကာလအတွင်း ပြည်ထောင်စုဝန်ကြီးသည် အာဆီယံနိုင်ငံအချင်းချင်း တွေ့ဆုံသည့် ဝန်ကြီးအဆင့် အစည်းအဝေး(၆)ခု၊ အာဆီယံနှင့် ဆွေးနွေးဘက်နိုင်ငံတို့နှင့် ကျင်းပပြုလုပ်သည့် အစည်းအဝေး (၁၃)ခု၊  စုစုပေါင်းအစည်းအဝေး (၁၉) ခုသို့ ပါဝင်တက်ရောက်သည်။ 
ယင်းအစည်းအဝေးများအနက် ယနေ့မွန်းလွဲပိုင်းတွင် ကျင်းပသည့် ကမ္ဘောဒီယား၊ လာအို၊ မြန်မာနှင့် ဗီယက်နမ်နိုင်ငံ (စီအယ်လ်အမ်ဗွီ)တို့မှ စီးပွားရေးဝန်ကြီးများ၏ (၉) ကြိမ်မြောက် အစည်းအဝေးတွင် ပြည်ထောင်စုဝန်ကြီးသည် အစည်းအဝေးသဘာပတိအဖြစ် ဆောင်ရွက်ပြီး အဆိုပါ အစည်းအဝေးသို့  စီအယ်လ်အမ်ဗွီနိုင်ငံများနှင့် အာဆီယံအတွင်းရေးမှူးချုပ်ရုံးတို့မှ ကိုယ်စားလှယ် စုစုပေါင်း (၂၅) ဦးခန့် တက်ရောက်သည်။ 
အစည်းအဝေးတွင်  စီအယ်လ်အမ်ဗွီလုပ်ငန်းအစီအစဉ် ၂၀၁၆ နှင့် လုပ်ငန်းအစီအစဉ် ၂၀၁၇-၂၀၁၈ တို့၏ ဖြစ်ပေါ်တိုးတက်မှုအခြေအနေများနှင့် ဆက်လက်ဆောင်ရွက်ရန်ကိစ္စများ၊  စီအယ်လ် အမ်ဗွီ ဖွံ့ဖြိုးတိုးတက်စေရေးမူဘောင် (Framework for CLMV Development) ရေးဆွဲနိုင်ရေး ကိစ္စများအပေါ် အမြင်ချင်းဖလှယ်ဆွေးနွေးကြသည်။ 
စီအယ်လ်အမ်ဗွီ ဖွံ့ဖြိုးတိုးတက်စေရေးမူဘောင်ကို  စီအယ်လ်အမ်ဗွီနိုင်ငံများနှင့် ကျန်အာဆီယံ အဖွဲ့ဝင်နိုင်ငံများအကြား ဖွံ့ဖြိုးတိုးတက်မှုကွာဟချက် ကျဉ်းမြောင်းစေရန်နှင့် စီအယ်လ်အမ်ဗွီနိုင်ငံများသည် ၂၀၃၀ ခုနှစ်တွင် ဝင်ငွေ အလယ်အလတ်အဆင့်ရှိသည့် နိုင်ငံများအဖြစ်သို့ ရောက်ရှိစေရန် ရည်ရွယ်ပြီး ရေးဆွဲခြင်းဖြစ်သည်။ 
ယင်းမူဘောင်ကိုရေးဆွဲရန်  ၂၀၁၆ ခုနှစ် လာအိုနိုင်ငံ အာဆီယံဥက္ကဋ္ဌ တာဝန်ယူစဉ် စီးပွားရေးပိုင်းဆိုင်ရာ ဦးစားပေးဆောင်ရွက်မည့် လုပ်ငန်းစဉ်တစ်ခုအဖြစ် ချမှတ်ခဲ့ခြင်းဖြစ်ပြီး ဗီယက်နမ်နိုင်ငံ၌ ၂၀၁၆ ခုနှစ် အောက်တိုဘာလတွင် ကျင်းပခဲ့သည့် (၈) ကြိမ်မြောက် စီအယ်လ်အမ်ဗွီထိပ်သီးအစည်းအဝေးတွင် နိုင်ငံ့ခေါင်းဆောင်များမှ အဆိုပါ မူဘောင်ရေးဆွဲရေးကိစ္စအပေါ် အတည်ပြုခဲ့ခြင်း ဖြစ်သည်။

နေပြည်တော် စက်တင်ဘာ ၁၁