နေပြည်တော်၊  နိုဝင်ဘာလ (၂၉) ရက်

မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable Development Plan - MSDP) ကို အကောင်အထည်ဖော်ဆောင် ရာ၌ စောင့်ကြည့်အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework - NIF) တစ်ရပ် ဖွံ့ဖြိုးလာစေရေးအတွက် ဒုတိယအကြိမ် ညှိနှိုင်း ဆွေးနွေးပွဲကို ၂၀၁၈ခုနှစ်၊ နိုဝင်ဘာလ(၂၉)ရက်နေ့၊ နံနက်(၉:၀၀)နာရီတွင် Park Royal Hotel၊ နေပြည်တော်၌ ကျင်းပခဲ့ပါသည်။

ဆွေးနွေးပွဲတွင် စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးဆက်အောင်မှ  အဖွင့်အမှာစကား ပြောကြားရာတွင် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း(Myanmar Sustainable Development Plan - MSDP) ကို အကောင်အထည်ဖော်ဆောင်ရွက်ရန်အတွက် ကဏ္ဍအလိုက် စီမံကိန်းများရေးဆွဲရန် လိုအပ် ပါကြောင်း၊  အကောင်အထည်ဖော် ဆောင်ရွက်မည် စီမံကိန်းများ၏ ဦးစားပေးအဆင့်များ ခွဲခြား သတ်မှတ်၍ အစီအစဉ်အလိုက် နိုင်ငံတော်ဘတ်ဂျက် သုံးစွဲမည့် စီမံကိန်းများ၊  ODA ပြည်ပ အထောက်အပံ့ဖြင့် ဆောင်ရွက်မည့်စီမံကိန်းများ၊ ပုဂ္ဂလိက ကဏ္ဍဖြင့် ဆောင်ရွက်မည့် စီမံကိန်းများ ခွဲခြားသတ်မှတ်ကာ Project Bank တွင် စုစည်းတင်ပြခြင်းသည် ပွင့်လင်း မြင်သာမှုကို ဖော်ဆောင်နိုင်မည်ဖြစ်ပါကြောင်း ပြောကြားခဲ့ပါသည်။

ဆက်လက်၍ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ နှုတ်ခွန်းဆက်အမှာစကား ပြောကြားရာတွင် MSDP စီမံကိန်းကို အောင်မြင်စွာ အကောင်အထည်ဖော်ဆောင်နိုင်ရေးနှင့် အကောင်အထည်ဖော်ဆောင်နိုင်မှု အတိုင်းအတာကို သတ်မှတ်တိုင်းတာမှုများအား စောင့်ကြည့်လေ့လာအကဲဖြတ်ခြင်း(Monitoring& Evaluation) လုပ်ငန်း ဆောင်ရွက်နိုင်ရန်  မရှိမဖြစ်လိုအပ်သည့် အမျိုးသားအဆင့် ညွှန်ကိန်းမူဘောင် ချမှတ်နိုင်ရန် လိုအပ်ပါကြောင်း၊ လုပ်ငန်းအဖွဲ့(၁၃)ဖွဲ့၏ အဖွဲ့အလိုက် ပထမအကြိမ် ဆွေးနွေး ညှိနှိုင်းပွဲများလည်း ကျင်းပပြီးစီးခဲ့ပြီး ရလဒ်များလည်းရရှိခဲ့ပြီး ဖြစ်ပါကြောင်း၊ MSDP သည် SDGs ပါ ဦးတည်ချက်များကို အခြေပြု ရေးဆွဲထားသည့်အတွက် Monitoring & Evaluation ပိုင်းတွင် ခိုင်မာအားကောင်းရန် အလွန်အရေးကြီးပါကြောင်း၊ MSDP အတွက် ညွှန်ကိန်းများကို ရွေးချယ်သတ်မှတ်ရာတွင် သက်ဆိုင်ရာ လုပ်ငန်း နယ်ပယ် အတွင်း လက်တွေ့လုပ်ငန်းများ ဆောင်ရွက်နေသည့် ဌာနများ၏ သဘောထားများ၊ အကြံဉာဏ်များ လိုအပ်ပါကြောင်း၊ သက်ဆိုင်ရာ ကဏ္ဍအလိုက် ဖွဲ့စည်းထားသည့် လုပ်ငန်းအဖွဲ့(၁၃)ဖွဲ့၏ ဒုတိယအကြိမ် ဆွေးနွေး ညှိနှိုင်းပွဲအတွက် အစီအစဉ်များ ဖြန့်ဝေထားပြီး ဖြစ်ပါကြောင်း၊ နည်းပညာအဖွဲ့တွင် မပါဝင် သေးသည့် ဌာနများအနေဖြင့်လည်း မိမိတို့နှင့် သက်ဆိုင်သည့် ကဏ္ဍအလိုက် ပါဝင်ဆွေးနွေး ပေးကြပါရန် ဖိတ်ကြားပါကြောင်း ပြောကြား ခဲ့ပါသည်။

ထိုနောက် ကုလသမဂ္ဂဖွံ့ဖြိုးမှုအစီအစဉ်(UNDP) မှ Deputy  Director, Ms. Dawn Del Rio မှ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း (Myanmar Sustainable DevelopmentPlan-MSDP)ကို အကောင်အထည် ဖော်ဆောင်ရာ၌ စောင့်ကြည့်အကဲဖြတ်နိုင်စေရန်အတွက် အမျိုးသားညွှန်ကိန်းမူဘောင် (National Indicator Framework-NIF)တစ်ရပ်ဖွံ့ဖြိုးလာစေရေး ဒုတိယအကြိမ် ညှိနှိုင်းဆွေးနွေးပွဲကျင်းပရခြင်းနှင့် စပ်လျဉ်း၍ နှုတ်ခွန်းဆက်အမှာစကား ပြောကြားခဲ့ပါသည်။

ဆက်လက်၍ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်မှ National Indicator Framework Progress and Updating the Progress နှင့်စပ်လျဉ်း၍ ရှင်းလင်းပြောကြားခြင်း၊ ရသုံးမှန်းခြေ ငွေစာရင်း ဦးစီးဌာနမှ ညွှန်ကြားရေးမှူးချုပ် ဒေါ်နွဲ့နွဲ့ဝင်း မှ Proposed Indicators for MSDP Goal:2 နှင့် စပ်လျဉ်း၍ ရှင်းလင်းပြောကြားခြင်း၊ ကုလသမဂ္ဂဖွံ့ဖြိုးမှု အစီအစဉ်(UNDP) မှ Senior Consultant, Mr. Nicolas Garrigue မှ MSDP ညွှန်းကိန်းမူဘောင် ပထမအဆင့် အကြံပြုဆွေးနွေးချက်များ၏ ရလဒ်များနှင့် စပ်လျဉ်း၍ ရှင်းလင်းပြောကြားခဲ့ပြီး တက်ရောက်လာကြသူများက  မေးခွန်းများ မေးမြန်း ဆွေးနွေးခဲ့ကြပါသည်။

အဆိုပါဆွေးနွေးပွဲသည် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း အကောင်အထည်ဖော်ဆောင်ရွက်နေသည့် ကာလတစ်လျှောက်လုံးနှင့် အကောင်အထည်ဖော်ပြီး နောက်ပိုင်းကာလထိ စီမံကိန်း၏ ထိရောက်မှု ၊ စွမ်းရည်ပြည့်ဝမှု ၊ ရေရှည်တည်တံ့မှုနှင့် သက်ရောက်မှုတို့ကို မျက်ခြေမပြတ်သိရှိတိုင်းတာနိုင်ရန်အတွက် အမျိုးသား ညွှန်ကိန်း မူဘောင်တစ်ခု ပေါ်ပေါက်လာ စေရန်ရည်ရွယ်၍ ကျင်းပခဲ့ခြင်းဖြစ်ပါသည်။

ဆွေးနွေးပွဲသို့ သက်ဆိုင်ရာ ဝန်ကြီးဌာနများနှင့် အဖွဲ့အစည်းများမှ တာဝန်ရှိသူများ၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ ဖော်ဆောင်နိုင်ရေးလုပ်ငန်းအဖွဲ့ ခေါင်းဆောင်များ၊  မြန်မာနိုင်ငံ၏ ရေရှည် တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှု စီမံကိန်း(Myanmar Sustainable Development Plan-MSDP) အကောင်အထည် ဖော်ဆောင်ရေး လုပ်ငန်းအဖွဲ့များ နှင့် ဗဟိုစာရင်းအင်းအဖွဲ့ မှ တာဝန်ရှိသူများ အပါအဝင် စုစုပေါင်း(၂၅၀) ဦးခန့် တက်ရောက် ခဲ့ကြပါသည်။