ဂျပန်နိုင်ငံအစိုးရမှ ရန်ကုန်တောင်ပိုင်း ရေပေးဝေရေးစီမံချက် အကောင်အထည်ဖော်ရန် အတွက်  ဂျပန်ယန်း ၄.၁၇၆ ဘီလီယံ (လေး ဒဿမ တစ်ခုနစ်ခြောက်ဘီလီယံ) အကူအညီပေးရေး ဆိုင်ရာစာချွန်လွှာ လက်မှတ်ရေးထိုးပွဲ အခမ်းအနားကို ယနေ့ ညနေ ၃ နာရီတွင် စီမံကိန်းနှင့်ဘဏ္ဍာရေးဝန်ကြီးဌာန အစည်း အဝေးခန်းမ၌ ကျင်းပသည်။ အခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်၊ မြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama နှင့် သံရုံးမှ တာဝန်ရှိသူများ၊ ညွှန်ကြားရေးမှူးချုပ်များ၊ ဒုတိယ ညွှန်ကြားရေးမှူးချုပ်များနှင့် တာဝန်ရှိသူများ တက်ရောက်ကြသည်။

         အခမ်းအနားတွင် မြန်မာနိုင်ငံအစိုးရကိုယ်စား စီမံကိန်းနှင့် ဘဏ္ဍာရေး၀န်ကြီးဌာန၊ ဒုတိယဝန်ကြီး ဦးဆက်အောင်နှင့် ဂျပန်နိုင်ငံအစိုးရကိုယ်စားမြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama တို့က အကူအညီပေးရေးဆိုင်ရာ စာချွှန်လွှာကို လက်မှတ်ရေးထိုး လဲလှယ်ကြသည်။ ထို့နောက် စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးဆက်အောင်က ကျေးဇူးတင်စကား ပြောကြားပြီး မြန်မာနိုင်ငံဆိုင်ရာ ဂျပန်သံအမတ်ကြီး Mr. Ichiro Maruyama က အကူအညီပေးရခြင်းနှင့် စပ်လျဉ်း၍ ရှင်းလင်းပြောကြားသည်။ ယင်းနောက် ဒုတိယဝန်ကြီးနှင့် ဂျပန်သံအမတ်ကြီးတို့သည့် အခမ်းအနားသို့ တက်ရောက်လာ သူများနှင့်အတူ မှတ်တမ်းတင်ဓာတ်ပုံရိုက်သည်။ ရန်ကုန်တောင်ပိုင်း ရေပေးဝေရေးစီမံချက်အရ ဒလ၊ ဆိပ်ကြီးခနောင်တို၊ တွံတေး၊ ကော့မှူး နှင့် ကွမ်းခြံကုန်းမြို့နယ်များတွင် သန့်ရှင်းသော သောက်သုံးရေနှင့် အများသုံးရေများ ထုတ်လုပ်နိုင်မည်ဖြစ်ပြီး ရေပေးဝေ​ရေးကဏ္ဍ အဆင့်မြှင့်တင်နိုင်မည်ဖြစ်ကြောင်း သိရသည်။

          အဆိုပါ စီမံချက်နှင့် စပ်လျဉ်း၍ မြန်မာနိုင်ငံဆိုင်ရာ ဂျပန်သံအမတ်ကြီးက” ဒီနေ့ လက်မှတ် ရေးထိုးတဲ့ စာချွန်လွှာဟာ ရန်ကုန်တောင်ပိုင်းမှာရှိတဲ့ ဒေသခံပြည်သူတွေ သန့်ရှင်းတဲ့ သောက်သုံးရေ ရရှိသုံးစွဲနိုင်ဖို့ ဖြစ်ပါတယ်။ ရေပေးဝေရေး စီမံကိန်းလည်းဖြစ်ပါတယ်။ မြန်မာနိုင်ငံရဲ့ ပို့ဆောင်ရေး၊ လျှပ်စစ်နဲ့ စွမ်းအင်ကဏ္ဍ၊ ရန်ကုန်မြို့တော် ဖွံ့ဖြိုးတိုးတက်ရေးကဏ္ဍတွေဟာ ကျွန်တော်တို့ရဲ့ အဓိက ဦးစားပေးကဏ္ဍတွေဖြစ်ပါတယ်။ မြန်မာနိုင်ငံရဲ့ အခြေခံအဆောက်အအုံတွေ ပိုမိုဖွံ့ဖြိုးတိုးတက်ဖို့ အတွက် တရားဝင် ဖွံ့ဖြိုးမှုအကူအညီကို  အသုံးပြုနေပါတယ်။ အဲဒီအခြေခံ အဆောက်အအုံတွေ ဖွံ့ဖြိုးတိုးတက်ဖို့ အတွက် ဂျပန်အစိုးရအနေနဲ့ မြန်မာနိုင်ငံအစိုးရနဲ့ ပူးပေါင်းပြီး ဆောင်ရွက်သွားမှာ ဖြစ်ပါတယ်”ဟု ပြောကြားသည်။ (သတင်းစဉ်)

နေပြည်တော် အောက်တိုဘာ ၃