နေပြည်တော်၊ မတ် ၁၀

စီမံကိန်းရေးဆွဲရေးဦးစီးဌာန၊ အရာထမ်းများ လုပ်ငန်းစွမ်းဆောင်ရည် မြှင့်တင်ရေးမွမ်းမံသင်တန်း အမှတ်စဉ် (၆/၂၀၂၄-၂၀၂၅) သင်တန်းဆင်းပွဲအခမ်းအနားကို ၇-၃-၂၀၂၅ ရက်၊ ၁၆:၀၀ နာရီတွင် နေပြည်တော် ကောင်စီနယ်မြေရှိ စီမံကိန်းရေးဆွဲရေးဦးစီးဌာန၊ သင်တန်းကျောင်း၌ ကျင်းပရာ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်း တက်ရောက်၍ လမ်းညွှန် အမှာစကား ပြောကြားပါသည်။
သင်တန်းဆင်းပွဲသို့ စီမံကိန်းနှင့် ဘဏ္ဍာရေးဝန်ကြီးဌာနအောက်ရှိ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များနှင့် သက်ဆိုင်ရာ တာဝန်ရှိပုဂ္ဂိုလ်များ တက်ရောက်ပါသည်။
ဒုတိယဝန်ကြီး က ယခုသင်တန်းတွင် ဌာနနှင့် တိုက်ရိုက်သက်ဆိုင်သည့် ဘာသာရပ်များအပြင် ချိတ်ဆက်ဆောင်ရွက်ရမည့် အခြားသိသင့် သိထိုက်သည့် ဘာသာရပ်များကိုလည်း သင်ကြားပို့ချပေးခဲ့ကြောင်း၊ စီမံကိန်းရေးဆွဲရာတွင် ဘာသာရပ်ဆိုင်ရာ ကျွမ်းကျင်မှုရှိစေရန်၊ ရလဒ်အခြေပြု ဒေသန္တရ စီမံကိန်းများရေးဆွဲရာ၌ မြေပြင်ပကတိအခြေအနေကို ထင်ဟပ်စေပြီး ပြည်သူကို အကျိုးပြုသည့် စီမံကိန်းများဖြစ်စေရေး အလေးထား ဆောင်ရွက်သွားကြရန်၊ သင်တန်းပြီးဆုံး၍ လုပ်ငန်းခွင်သို့ ပြန်လည် တာဝန်ထမ်းဆောင်ရာတွင် မိမိတို့၏ အရည်အသွေးများကို စဉ်ဆက်မပြတ် တိုးတက်စေရေး ဆက်လက် လေ့လာသင်ယူသွားကြရန်၊ ဝန်ထမ်းစည်းမျဉ်း စည်းကမ်းနှင့်အညီ နေထိုင်ကြရန်နှင့် စိတ်ဓာတ်စည်းကမ်းကောင်းမွန်သည့် ဝန်ထမ်းကောင်းများ ဖြစ်စေရေးအတွက် ကြိုးပမ်းအားထုတ် သွားကြရန် တိုက်တွန်းလိုကြောင်း စသည်ဖြင့် လမ်းညွှန်မှာကြားပါသည်။
အဆိုပါ သင်တန်းကို ရက်သတ္တပတ် ၃ ပတ်ကြာ ဖွင့်လှစ်ခဲ့ပြီး ရုံးချုပ်နှင့် တိုင်းဒေသကြီး/ ပြည်နယ် (၈) ခုတို့မှ သင်တန်းသား/သူ ၆၃ ဦး တက်ရောက်ကြောင်း သတင်းရရှိပါသည်။