နေပြည်တော် ဒီဇင်ဘာ ၆

အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေး လုပ်ငန်းသုံးသပ်မှုအစီရင်ခံရေးအဖွဲ့၏ (၆/၂၀၂၃) ကြိမ်မြောက်အစည်းအဝေးကို ၂၀၂၃ ခုနှစ်၊ ဒီဇင်ဘာလ ၆ ရက်၊ နေ့လယ်ပိုင်းတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ်(၃၂) အစည်းအဝေးခန်း၌ ကျင်းပခဲ့ပါသည်။

အစည်းအဝေးသို့ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုး တိုးတက်ရေး လုပ်ငန်းသုံးသပ်မှုအစီရင်ခံရေးအဖွဲ့ ဥက္ကဋ္ဌ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်းမှ ဦးဆောင်၍ စီမံကိန်းနှင့် ဘဏ္ဍာရေးဝန်ကြီးဌာန၊ ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ သယံဇာတနှင့် သဘာဝ ပတ်ဝန်းကျင်ထိန်းသိမ်းရေးဝန်ကြီးဌာန၊ စက်မှုဝန်ကြီးဌာန၊ အလုပ်သမားဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှု လက်မှုလုပ်ငန်းရှင်များ အသင်းချုပ်နှင့် မြန်မာနိုင်ငံလူငယ်စွန့်ဦးတီထွင် လုပ်ငန်းရှင်များအသင်းတို့မှ လုပ်ငန်းသုံးသပ်မှု အစီရင်ခံရေးအဖွဲ့ဝင်များ တက်ရောက်ကြပါသည်။

ရှေးဦးစွာ လုပ်ငန်းသုံးသပ်မှုအစီရင်ခံရေးအဖွဲ့ ဥက္ကဋ္ဌ ဒုတိယဝန်ကြီး ဒေါ်သန်းသန်းလင်းက အဖွင့်အမှာစကား ပြောကြားရာတွင် လုပ်ငန်းသုံးသပ်မှုအစီရင်ခံရေးအဖွဲ့၏ အစည်းအဝေးကို (၂)လ (၁)ကြိမ် ကျင်းပရန် စီစဉ်ထားရှိပြီး (၅/၂၀၂၃) ကြိမ်မြောက် အစည်းအဝေးကို ၁၃-၉-၂၀၂၃ ရက်တွင် ကျင်းပခဲ့ပြီး ယနေ့တွင် (၆/၂၀၂၃) ကြိမ်မြောက် အစည်းအဝေးကို ကျင်းပခြင်း ဖြစ်ကြောင်း ပြောကြားပါသည်။

မိမိတို့အဖွဲ့အနေဖြင့် လုပ်ငန်းကော်မတီသို့ အစီရင်ခံစာများ ပြုစုတင်ပြလျက်ရှိပြီး လုပ်ငန်းကော်မတီ ဥက္ကဋ္ဌ၊ ဒုတိယဝန်ကြီးချုပ်က မိန့်မှတ်ချက်များ ပြုခဲ့ပါကြောင်း၊ အစီရင်ခံစာ များကို ပြုစုတင်ပြရာတွင် နိုင်ငံတော်အကြီးအကဲများမှ လိုအပ်သည့်လမ်းညွှန်မှုများ ပေးနိုင်ရေး အတွက် MSME ဖွံ့ဖြိုးတိုးတက်ရေးအတွက် လိုအပ်ချက်များ၊ MSME ကဏ္ဍ၏ အားသာချက်များ၊ အားနည်းချက်များ၊ အခြားနိုင်ငံများနှင့် မြန်မာနိုင်ငံရှိ MSME တို့နှင့် နှိုင်းယှဉ်ချက်များ၊ နိုင်ငံတော်မှ ပံ့ပိုးဆောင်ရွက်ပေးရမည့်အချက်များကို ထည့်သွင်းရေးသား အကြံပြုတင်ပြကြရန် ဖြစ်ကြောင်း၊ Rolling Process ဆောင်ရွက်ရမည့် လုပ်ငန်းဖြစ်သဖြင့် စဉ်ဆက်မပြတ် ဆောင်ရွက်သွားကြရန် လိုအပ်ကြောင်း၊ မိမိတို့အဖွဲ့၏ လုပ်ငန်းတာဝန်များတွင် “MSME လုပ်ငန်း များကို ပကတိအခြေအနေ၊ လိုအပ်ချက်များနှင့် အခက်အခဲများကို လေ့လာသုံးသပ်ခြင်း” ဆိုသည့်အချက် ပါဝင်သောကြောင့် ပြည်တွင်း MSME လုပ်ငန်းများ ဖွံ့ဖြိုးတိုးတက်ရေးအတွက် အခြားနိုင်ငံများနှင့် နှိုင်းယှဉ်လေ့လာတင်ပြသကဲ့သို့ မြေပြင်ပကတိအခြေအနေများကို လက်တွေ့ သိရှိနိုင်ရန်အတွက် ကွင်းဆင်းလေ့လာရန် လိုအပ်မည်ဖြစ်ကြောင်း၊ လုပ်ငန်းအဖွဲ့များအလိုက် အစီရင်ခံစာများ တင်ပြနိုင်ရေး၊ အချက်အလက်များခိုင်မာပြည့်စုံမှု ရှိစေရေးတို့အတွက် အလေးထား ဆောင်ရွက်ရန်၊ အဖွဲ့ဝင်များအနေဖြင့် ဝိုင်းဝန်းပံ့ပိုး ကူညီပေးရန်နှင့် ရင်းနှီးပွင့်လင်းစွာ ဝိုင်းဝန်း ဆွေးနွေးပေးရန် ပြောကြားပါသည်။

ထို့နောက် လုပ်ငန်းသုံးသပ်မှု အစီရင်ခံရေး ရုံးလုပ်ငန်းအဖွဲ့ တွဲဖက်အတွင်းရေးမှူးက လုပ်ငန်းသုံးသပ်မှုအစီရင်ခံရေးအဖွဲ့၏ (၅/၂၀၂၃) ကြိမ်မြောက် အစည်းအဝေး ဆုံးဖြတ်ချက်များ အပေါ် ဆောင်ရွက်ပြီးစီးမှုအခြေအနေများ၊ လုပ်ငန်းသုံးသပ်မှုအစီရင်ခံရေးအဖွဲ့၏ လုပ်ငန်း ဆောင်ရွက်ချက်များ၊ အထောက်အကူပြု လုပ်ငန်းအဖွဲ့များက လုပ်ငန်းဆောင်ရွက်မှုအခြေအနေ များနှင့် ဆက်လက်ဆောင်ရွက်မည့် အစီအစဉ်များအား ရှင်းလင်းတင်ပြပါသည်။

ဆက်လက်၍ အထောက်အကူပြုလုပ်ငန်းအဖွဲ့ (၄)ဖွဲ့က အဖွဲ့တစ်ခုချင်းအလိုက် လုပ်ငန်း ဆောင်ရွက်မှု အခြေအနေများ၊ ရှေ့ဆက်လက်ဆောင်ရွက်မည့် လုပ်ငန်းစဉ်များနှင့် စပ်လျဉ်း၍ ဆွေးနွေးတင်ပြကြပါသည်။

ထို့နောက် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ ဖွံ့ဖြိုး တိုးတက်ရေးလုပ်ငန်းသုံးသပ်မှုအစီရင်ခံရေးအဖွဲ့ ဥက္ကဋ္ဌ ဒုတိယဝန်ကြီးက MSME ဖွံ့ဖြိုးတိုးတက် ရေးအတွက် လုပ်ငန်းဆောင်ရွက်ရာတွင် သက်ဆိုင်ရာဌာနများအနေဖြင့် အချင်းချင်း ချိတ်ဆက် ဆောင်ရွက်ရန် လိုအပ်ကြောင်း၊ MSME လုပ်ငန်းများအတွက် ငွေကြေးအရင်းအနှီးရရှိနိုင်ရန် နိုင်ငံတော်မှ ဆောင်ရွက်ပေးလျက်ရှိသည့် အစီအစဉ်များအပြင် အခြားဘဏ္ဍာငွေရရှိနိုင်မည့် နည်းလမ်းများကိုလည်း ဖော်ထုတ်ပေးရန် လိုအပ်ကြောင်း၊ မိမိတို့အဖွဲ့အနေဖြင့် လိုအပ်ပါက မြေပြင်ကွင်းဆင်းလေ့လာရန် ဆောင်ရွက်မည်ဖြစ်ကြောင်း၊ MSME လုပ်ငန်းများကို ထိတွေ့၍ ၎င်းတို့၏ လိုအပ်ချက်များ၊ နိုင်ငံတော်မှ ပံ့ပိုးပေးလျက်ရှိမှု အခြေအနေများနှင့် ချိတ်ဆက် ဆောင်ရွက်နိုင်မည့် နည်းလမ်းများကို ဖော်ထုတ်ခြင်းဖြင့် MSME လုပ်ငန်းများဖွံ့ဖြိုးတိုးတက်ရေး မှသည် နိုင်ငံတော်၏ ရေရှည်စီးပွားရေးဖွံ့ဖြိုးတိုးတက်မှုကို အကောင်အထည်ဖော်ဆောင်ရွက်နိုင် မည်ဖြစ်ကြောင်း လမ်းညွှန်မှာကြားခဲ့ပါသည်။

သတင်းစဉ်