နေပြည်တော်  ဒီဇင်ဘာ  ၆

စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ယမန်နေ့ မွန်းလွဲပိုင်းတွင် နေပြည်တော်၊ ပြည်ထောင်စုနယ်မြေရှိ ပျဉ်းမနားခရိုင် မြန်မာ့စီးပွားရေးဘဏ်နှင့် ပျဉ်းမနားမြို့နယ်အခွန်ဦးစီးဌာနမှူးရုံးများသို့ သွားရောက်စစ်ဆေးသည်။

ပထမဦးစွာ ဒုတိယဝန်ကြီးသည် မြန်မာ့စီးပွားရေးဘဏ်၊ ဦးဆောင်ညွှန်ကြားရေးမှူးနှင့် ပြည်တွင်းအခွန်များဦးစီးဌာန၊ ညွှန်ကြားရေးမှူးချုပ်တို့လိုက်ပါလျက် ပျဉ်းမနားခရိုင် မြန်မာ့စီးပွား ရေးဘဏ်သို့ သွားရောက်ကြည့်ရှုစစ်ဆေးပြီး ဘဏ်လုပ်ငန်းဆိုင်ရာကိစ္စရပ်များ၊ ချေးငွေတိုးမြှင့် ထုတ်ချေးနိုင်ရေးဆိုင်ရာကိစ္စရပ်များ၊ ဘဏ်နှင့်ဆက်သွယ်လာသူများအား ဘဏ်လုပ်ငန်းဝန်ဆောင် မှုများဆောင်ရွက်ပေးရာတွင် လွယ်ကူလျင်မြန်စွာဆောင်ရွက်ပေးနိုင်ရေးနှင့် ပင်စင်လစာထုတ်ယူသူ များအတွက် အဆင်ပြေချောမွေ့စွာ ဆောင်ရွက်ပေးနိုင်ရေးကိစ္စရပ်များ၊ ဘဏ်လုံခြုံရေးနှင့် မီးဘေး အန္တရာယ်ကြိုတင်ကာကွယ်ရေးတို့ကိုဂရုတစိုက်ဆောင်ရွက်နိုင်ရေးနှင့် ဝန်ထမ်းအချင်းချင်းစည်းလုံး ညီညွတ်စွာဖြင့် ဘဏ်နှင့်ဆက်သွယ်လာသူများအား ဘဏ်လုပ်ငန်းဝန်ဆောင်မှုများကို ပိုမိုအဆင် ပြေချောမွေ့စွာ ဖြည့်ဆည်းဆောင်ရွက်ပေးကြရန်တို့ကို မှာကြား၍ ဝန်ထမ်းများ၏တင်ပြချက်များကို ပေါင်းစပ်ညှိနှိုင်းဖြည့်ဆည်းဆောင်ရွက်ပေးခဲ့သည်။ 

ဆက်လက်၍ ဒုတိယဝန်ကြီးသည် ပျဉ်းမနားမြို့နယ်အခွန်ဦးစီးဌာနမှူးရုံးသို့ သွားရောက် စစ်ဆေးပြီး အခွန်ရငွေများ တိုးမြင့်ကောက်ခံရရှိနိုင်ရေးအတွက် နိုင်ငံတော်အကြီးအကဲ၏ လမ်းညွှန် ချက်နှင့်အညီ အခွန်နှုန်းများကို တိုးမြှင့်ခြင်းမပြုဘဲ အခွန်ကောက်ခံနိုင်သည့်အခွန်အခြေ တိုးချဲ့ ဖော်ထုတ်နိုင်သည့်နည်းလမ်းများ ရှာဖွေဖော်ထုတ်ရေး၊ လျာထားချက်ထက်ပြည့်မီကျော်လွန်အောင် ကောက်ခံနိုင်မည့်အခြေအနေများ၊ လုံခြုံရေးနှင့် မီးဘေးအန္တရာယ်ကြိုတင်ကာကွယ်ရေးတို့ကို အမြဲ မပြတ်ဂရုစိုက်ဆောင်ရွက်ရေးနှင့် ဝန်ထမ်းအချင်းချင်းစည်းလုံးညီညွတ်စွာဖြင့် တိုးတက်လာသည့် နည်းပညာများကိုအသုံးပြု၍ အခွန်တိုးချဲ့ကောက်ခံနိုင်မည့်နည်းလမ်းများကို ရှာဖွေဖော်ထုတ်ကြရန် တို့ကို မှာကြားခဲ့ပြီး ဝန်ထမ်းများ၏တင်ပြချက်များကို ပေါင်းစပ်ညှိနှိုင်းဖြည့်ဆည်းဆောင်ရွက်ပေး ခဲ့သည်။ 

သတင်းစဉ်