နေပြည်တော်၊ ဇွန် ၂၁
     ဒုတိယဝန်ကြီးချုပ်နှင့်စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန် သည် ဇွန်လ ၂၀ ရက်၊ နံနက်ပိုင်းတွင် ရန်ကုန်တိုင်းဒေသကြီးရှိ မြန်မာ့လယ်ယာဖွံ့ဖြိုးရေးဘဏ် ရုံးချုပ်၌ ဝန်ထမ်းများအား  ရင်းရင်းနှီးနှီးတွေ့ဆုံ အမှာစကားပြောကြားသည်။

  ယင်းသို့တွေ့ဆုံစဉ် ဒုတိယဝန်ကြီးချုပ်နှင့် ပြည်ထောင်စုဝန်ကြီးက ကြွေးကျန်များ စနစ်တကျကောက်ခံနိုင်ရေးအတွက် သက်ဆိုင်ရာ တိုင်းဒေသကြီး/ပြည်နယ်အစိုးရအဖွဲ့၊ ခရိုင်မြို့နယ် အစိုးရအဖွဲ့များနှင့် ပူးပေါင်းဆောင်ရွက်ရန်၊ ဘဏ်ခွဲများတွင်ရယူထားသော လယ်ယာမြေလုပ်ကိုင်ခွင့်လက်မှတ်(ပုံစံ-၇) မူရင်းများ ကွဲလွဲမှုမရှိစေရေးကို သက်ဆိုင်ရာလယ်ယာမြေစိစစ်ရေးနှင့် စာရင်းအင်းဦးစီးဌာနနှင့် အမြဲမပြတ်စိစစ်ဆောင်ရွက်ရန်၊ ဝန်ထမ်းအဆင့်ဆင့်အနေဖြင့် ထုတ်ပြန်ထားသော လုပ်ထုံးလုပ်နည်း၊ ညွှန်ကြားချက်၊ စည်းမျဉ်းစည်းကမ်းများကို လိုက်နာဆောင်ရွက်ကြရန် မှာကြားသည်။

   ဆက်လက်၍ ဒုတိယဝန်ကြီးချုပ်နှင့် ပြည်ထောင်စုဝန်ကြီး ဦးဝင်းရှိန်သည် ဆူးလေဘုရားလမ်းရှိ ငွေချေးသက်သေခံလက်မှတ်လုပ်ငန်းကြီးကြပ်ရေးကော်မရှင်ရုံးတွင် ကော်မရှင်အဖွဲ့ဝင်များ၊ ကော်မရှင်ရုံးဝန်ထမ်းများနှင့် တွေ့ဆုံပါသည်။ ကော်မရှင်အဖွဲ့ဝင်များနှင့်တွေ့ဆုံရာတွင် ဒုတိယဝန်ကြီးချုပ်နှင့် ပြည်ထောင်စုဝန်ကြီးက မြန်မာနိုင်ငံ၏အရင်းအနှီးဈေးကွက်ဖွံ့ဖြိုးတိုးတက်ရေးအတွက် ကော်မရှင်၏အခန်းကဏ္ဍမှာအရေးကြီးကြောင်း၊ ငွေချေးသက်သေခံလက်မှတ် ဖြစ်သည့် ရှယ်ယာများထုတ်ဝေရောင်းချသည့် အရည်အသွေးမီ အများပိုင်ကုမ္ပဏီများဖြစ်လာစေရေးအတွက် ဥပဒေ၊ နည်းဥပဒေသတ်မှတ်စံနှုန်းများနှင့်အညီ စိစစ်ဆောင်ရွက်ရန်၊ တစ်ဖက်တွင် လည်း ရင်းနှီးမြှုပ်နှံသူပြည်သူများအား ဥပဒေနှင့်အညီအကာအကွယ်ပေးရေး ဆောင်ရွက်သွားရန်ဖြစ်ကြောင်း မှာကြားခဲ့ပါသည်။ ဆက်လက်ပြီး ကော်မရှင်ရုံးရှိ အရာထမ်း၊ အမှုထမ်းများအား ကော်မရှင်ရုံးအစည်းအဝေးခန်းမတွင် တွေ့ဆုံ၍ ဝန်ထမ်းစည်းမျဉ်းစည်းကမ်းနှင့်အညီ တာဝန် ထမ်းဆောင်ရေး၊ လူ့စွမ်းအားအရင်းအမြစ်ဖွံ့ဖြိုးတိုးတက်ရေးအတွက် အလေးထားဆောင်ရွက် ရေးနှင့် ဝန်ထမ်းသက်သာချောင်ချိရေးဆိုင်ရာကိစ္စများကို အသေးစိတ်ရှင်းလင်းပြောကြားပါသည်။
   ထို့နောက် နိုင်ငံပိုင်ဘဏ်များကတင်ပြလာသော ဘဏ်လုပ်ငန်းဆိုင်ရာကိစ္စရပ်များ၊ ဝန်ထမ်းရေးရာကိစ္စရပ်များ၊ သက်သာချောင်ချိရေးကိစ္စရပ်များ၊ လုပ်ငန်းဆောင်ရွက်မှုအခြေအနေများနှင့် နိုင်ငံ့စီးပွားဖွံ့ဖြိုးတိုးတက်ရေးအတွက် ပုဂ္ဂလိကအခန်းကဏ္ဍရှိ စီးပွားရေးလုပ်ငန်းကြီးများအတွက် လိုအပ်သည့် အရင်းအနှီးဈေးကွက်ဖွံ့ဖြိုးတိုးတက်ရေးဆိုင်ရာ ကိစ္စရပ်များကို ပေါင်းစပ်ညှိနှိုင်းပေးခဲ့ပြီး ဘဏ်ရုံးအဆောက်အဦများကို လိုက်လံကြည့်ရှုစစ်ဆေးခဲ့ကြောင်း သတင်းရရှိသည်။

သတင်းစဉ်