နေပြည်တော် ၊ ဖေဖော်ဝါရီ ၁၆

စီမံကိန်းနှင့်ဘဏ္ဍာရေးဝန်ကြီးဌာန၊ အာမခံလုပ်ငန်းကြီးကြပ်ရေးအဖွဲ့၏ (၃၁) ကြိမ်မြောက် (ပုံမှန်) အစည်းအဝေး (၁/၂၀၂၃) ကို နေပြည်တော်၊ ရုံးအမှတ် (၃၄) ရှိ အစည်းအဝေးခန်းမတွင် ယမန်နေ့၊  (၁၃:၀၀) နာရီ၌ ကျင်းပပြုလုပ်ခဲ့ပါသည်။ 

အဆိုပါအစည်းအဝေးသို့ အာမခံလုပ်ငန်းကြီးကြပ်ရေးအဖွဲ့ဥက္ကဋ္ဌ၊ စီမံကိန်းနှင့်ဘဏ္ဍာရေးဝန်ကြီး ဌာန ဒုတိယဝန်ကြီး ဦးမောင်မောင်ဝင်း၊ အာမခံလုပ်ငန်းကြီးကြပ်ရေးအဖွဲ့ဝင်များဖြစ်ကြသော ဥပဒေ ရေးရာဝန်ကြီးဌာန၊ ပြည်ထောင်စုစာရင်းစစ်ချုပ်ရုံး၊ မြန်မာနိုင်ငံတော်ဗဟိုဘဏ်၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနနှင့် ပြည်တွင်းအခွန်များဦးစီးဌာနတို့မှ ညွှန်ကြားရေးမှူးချုပ်များနှင့် တာဝန်ရှိသူများ၊ အာမခံလုပ်ငန်းကြီးကြပ်ရေးအဖွဲ့ အတွင်းရေးမှူး၊ ငွေရေးကြေးရေးကြီးကြပ်စစ်ဆေး ရေးဦးစီးဌာနမှ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်နှင့် အရာထမ်းများ တက်ရောက်ခဲ့ ကြပါသည်။ 

အစည်းအဝေးတွင် အာမခံလုပ်ငန်းကြီးကြပ်ရေးအဖွဲ့ ဥက္ကဋ္ဌက အဖွင့်အမှာစကားပြောကြားပြီး၊ အတွင်းရေးမှူးက ယခင်အစည်းအဝေး (၂/၂၀၂၂) ဆုံးဖြတ်ချက်များအပေါ် ဆောင်ရွက်ပြီးစီးမှုအား တင်ပြခဲ့ပါသည်။ ထို့နောက် လိုင်စင်ရအာမခံကုမ္ပဏီများဖြစ်ကြသည့် AIA Myanmar Life Insurance Co., Ltd. မှ Corporate Solution အသက်အာမခံအမျိုးအစားသစ် ဆောင်ရွက်ခွင့်ပြုရေး၊ Prudential Myanmar Life Insurance Limited မှ PRU Flexiprotect အသက်အာမခံအမျိုးအစားသစ် ဆောင်ရွက် ခွင့်ပြုရေး၊ Manulife Myanmar Life Insurance Co., Ltd. မှ Manulife Thaw Ka Kin Way အသက် အာမခံအမျိုးအစားသစ် ဆောင်ရွက်ခွင့်ပြုရေး၊ Chubb Life Insurance Myanmar Ltd. မှ ထာဝရသုခ အသက်အာမခံ (Universal Life Plan) အမျိုးအစားသစ် ဆောင်ရွက်ခွင့်ပြုရေးနှင့် Dai-ichi Life Insurance Myanmar Ltd. မှ Dai-ichi Health Care Insurance ကျန်းမာရေးအာမခံအမျိုးအစားသစ် အား ဆောင်ရွက်ခွင့်ပြုနိုင်ရေးတို့အတွက် ရှင်းလင်းတင်ပြခဲ့ပါသည်။ ထို့နောက် အတွင်းရေးမှူးက Construction All Risk (CAR) နှင့် Erection All Risk (EAR) တို့၏ Policy Wording သုံးစွဲခွင့် ပြုရန်ကိစ္စ၊ နိုင်ငံခြားအာမခံကိုယ်စားလှယ်ရုံး မှတ်ပုံတင်လက်မှတ်ပယ်ဖျက်ခွင့်ပြုရန်ကိစ္စ၊ ကော်ပိုရိတ် အသက်အာမခံကိုယ်စားလှယ် (၃) ခုအား လိုင်စင်သက်တမ်းတိုးရေးကိစ္စ၊ အာမခံကိုယ်စားလှယ် (၂) ဦး မှ အာမခံကိုယ်စားလှယ်လုပ်ကိုင်ခွင့်လိုင်စင် သက်တမ်းတိုးလျှောက်ထားလာခြင်းကိစ္စ၊ မြန်မာ့အာမခံ သင်တန်းကျောင်း (မန္တလေးကျောင်းခွဲ) တည်ထောင်ခွင့်ပြုရန် လျှောက်ထားခြင်းကိစ္စနှင့် မှတ်တမ်း တင်ရန်ကိစ္စရပ်များကို ဆွေးနွေးခဲ့ကြပါသည်။ 

မြန်မာနိုင်ငံ၏ အာမခံဈေးကွက်တွင် ရာနှုန်းပြည့်နိုင်ငံခြားသားပိုင် အသက်အာမခံကုမ္ပဏီ (၅) ခု၊ ဖက်စပ်အသက်အာမခံကုမ္ပဏီ (၃) ခု၊ နိုင်ငံသားပိုင် အသက်အာမခံကုမ္ပဏီ (၉) ခု၊ ဖက်စပ်အထွေ ထွေအာမခံကုမ္ပဏီ (၃) ခု၊ နိုင်ငံသားပိုင် အထွေထွေအာမခံကုမ္ပဏီ (၆) ခုနှင့် မြန်မာ့အာမခံလုပ်ငန်း အပါအဝင် အာမခံကုမ္ပဏီ (၂၇) ခုမှ အာမခံဝန်ဆောင်မှုများကို ဆောင်ရွက်ပေးလျက်ရှိပြီး၊ ပုဂ္ဂလိက အာမခံကုမ္ပဏီများမှ အာမခံအမျိုးအစား (၄၀) မျိုးကို ဝန်ဆောင်မှုပေးလျက်ရှိပါသည်။ အာမခံလုပ်ငန်း ကြီးကြပ်ရေးအဖွဲ့အနေဖြင့် အာမခံကုမ္ပဏီများက အဆိုပြုတင်ပြလာကြသော အသက်အာမခံနှင့် အထွေထွေအာမခံအမျိုးအစားသစ်များကို ဥပဒေ၊ စည်းမျဉ်းစည်းကမ်းများနှင့်အညီ စိစစ်ခွင့်ပြုပေး လျက်ရှိကြောင်း သတင်းရရှိသည်။ 
(သတင်းစဉ်)