စီမံကိန်းနှင့် ဘဏ္ဍာရေးဝန်ကြီးဌာနပြည်ထောင်စုဝန်ကြီးဦးကျော်ဝင်းသည် ယနေ့ မွန်းလွဲ ၁နာရီတွင် ရာဇသင်္ဂဟလမ်း၊ ကုမုဒြာကြာပန်းအဝိုင်းအနီးရှိစီမံကိန်းနှင့် ဘဏ္ဍာရေးဝန်ကြီးဌာန အမျိုးသားမှတ်တမ်းများမော်ကွန်းတိုက်ဦးစီးဌာန (နေပြည်တော်)နှင့် ရုံးအမှတ် (၁) ရှိ နိုင်ငံခြား စီးပွားဆက်သွယ်ရေး ဦးစီးဌာနတို့ကို ကြည့်ရှုစစ်ဆေးခဲ့သည်။

ပထမဦးစွာပြည်ထောင်စုဝန်ကြီးသည် တာဝန်ရှိသူများလိုက်ပါလျက် အမျိုးသားမှတ်တမ်း များမော်ကွန်းတိုက်ဦးစီးဌာန (နေပြည်တော်)၊အဆောင်(A)ရှိမြန်မာနိုင်ငံ၏ အုပ်ချုပ်ရေးစနစ် ပြောင်းလဲမှုများကို မြန်မာဘုရင်ခေတ်မှ ယခုပြည်ထောင်စုသမ္မတမြန်မာနိုင်ငံတော် ခေတ်အထိ ထင်ရှားသောမော်ကွန်းများမှ ရွေးချယ်ထုတ်နှုတ်၍ ခေတ်အလိုက်ခင်းကျင်းပြသထားသော မော်ကွန်းပြခန်းနှင့် အဆောင်(B)ရှိ စီးပွားရေးလုပ်ငန်းစီမံခန့်ခွဲမှုမဟာဘွဲ့(MBA) ၊ ပြည်သူ့ရေး ရာ စီမံခန့်ခွဲမှုမဟာဘွဲ့ (MPA) သင်တန်းများဖွင့်လှစ်သင်ကြားမည့် အုပ်ချုပ်မှုနှင့် ဖွံ့ဖြိုးမှုပညာဘွဲ့လွန်သင်တန်းဌာန၏ သင်တန်းခန်းမများနှင့် ရုံးခန်းများခင်း ကျင်းထားရှိမှု အခြေအနေ၊ ဆောက်အဦများသန့်ရှင်းရေးဆောင်ရွက်ထားရှိမှုတို့ကို ကြည့်ရှုစစ်ဆေးပြီးရုံးအမှတ် (၁) ရှိနိုင်ငံခြားစီးပွားဆက်သွယ်ရေးဦးစီးဌာနကိုကြည့်ရှု့စစ်ဆေးခဲ့သည်။

ပြည်ထောင်စုဝန်ကြီးက ရုံးခန်းများအလင်းရောင် လုံလောက်စွာ ရရှိရေးဆောင်ရွက် သွားရန်၊ လေအေးပေးစက်များစနစ်တကျ တပ်ဆင်အသုံးပြုရန်၊ ဌာနခွဲ/ဌာနစိတ်အလိုက် ကွန်ပျူတာများစိစစ်ဖြန့်ဝေသွားရန်၊ မှတ်တမ်းများစနစ်တကျ ထိန်းသိမ်းထားရှိရန်နှင့်  မီးဘေးလုံခြုံရေးစနစ်များတပ်ဆင်ထားရန်တို့ကိုလမ်းညွှန်မှာကြားခဲ့သည်။

(သတင်းစဉ်)

နေပြည်တော် မေ ၁၆