နေပြည်တော် ၊ မေ ၁၂

စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်သည် ယနေ့နံနက် (၀၈:၃၀) နာရီတွင် တရုတ်ပြည်သူ့သမ္မတနိုင်ငံနှင့် ကမ္ဘောဒီးယားနိုင်ငံ ဘဏ္ဍာရေးဝန်ကြီးများက ပူးတွဲသဘာပတိများအဖြစ် တာဝန်ယူဆောင်ရွက်သော (၂၅) ကြိမ်မြောက် အာဆီယံ+၃ ဘဏ္ဍာရေး ဝန်ကြီးများနှင့် ဗဟိုဘဏ်ဥက္ကဌများအစည်းအဝေးသို့ Virtual အစီအစဉ်ဖြင့် ပါဝင်တက်ရောက်ခဲ့သည်။

အစည်းအဝေးတွင် ကိုဗစ်-၁၉ ကပ်ရောဂါအလွန်၌ အားလုံးပါဝင်ဆောင်ရွက်ကြမည့် ပြန်လည်ထူထောင်ရေးအစီအစဉ်များနှင့်စပ်လျဉ်း၍ ကမ္ဘာလုံးဆိုင်ရာနှင့် ဒေသဆိုင်ရာမက်ခရိုစီးပွားရေးရှုမြင် သုံးသပ်ချက်များနှင့် ဦးစားပေးဆောင်ရွက်သင့်သည့် မူဝါဒများ၊ အာဆီယံ+၃ နိုင်ငံများ ပါဝင် ဆောင်ရွက်လျက်ရှိသော ဘဏ္ဍာရေးပူးပေါင်းဆောင်ရွက်မှုများဖြစ်ကြသည့် အာဆီယံ+၃ မက်ခရိုစီးပွားရေးသုတေ သနရုံး (ASEAN+3 Macroeconomic Research Office – AMRO) ၏ လုပ်ငန်းတိုးတက်မှုအခြေအနေများ၊ AMRO ရုံးအား Regional Knowledge Hub အဖြစ် ကြိုးပမ်း ဆောင်ရွက် နေမှုအခြေအနေများ၊ ဇင်းမယ်အစီအစဉ်တွင် နိုင်ငံစုံပါဝင်လာရေး (Chiang Mai Initiative Multilateralisation – CMIM) လုပ်ငန်းအစီအစဉ်အရ အကောင်အထည်ဖော်ဆောင်ရွက်လျက်ရှိသည့်လုပ်ငန်းစဉ်များ၏ တိုးတက်မှုအခြေအနေများ၊ အာရှငွေချေးစာချုပ်ဈေးကွက်ဖွံ့ဖြိုးတိုး တက်မှုအတွက် နည်းပညာအကူအညီပေးရေးအစီအစဉ်များနှင့် ရှေ့ဆက်လက်ဆောင်ရွက်မည့်လုပ်ငန်းစဉ်များအား ညှိနှိုင်းဆွေးနွေးခဲ့ကြသည်။

အစည်းအဝေးတွင် ပြည်ထောင်စုဝန်ကြီးက သက်ဆိုင်ရာခေါင်းစဉ်အလိုက် ပါဝင်ဆွေးနွေးရာ၌ AMRO အား Regional Knowledge Hub အဖြစ် အကောင်အထည်ဖော်ဆောင်ရွက်နေမှုအစီအစဉ်နှင့် ကာလလတ်စီမံကိန်း (၂၀၂၂-၂၀၂၆) အကောင်အထည်ဖော်မှုများကို မြန်မာနိုင်ငံက ထောက်ခံ အားပေးပါကြောင်း၊ ကိုဗစ်-၁၉ ကပ်ရောဂါဖြစ်ပွားမှုနှင့်အတူ ယှဉ်တွဲဖွံ့ဖြိုးလာသည့် financial digitalization နှင့် digital transformation နည်းလမ်းများဖော်ဆောင်ရေး ကြိုးပမ်းဆောင်ရွက်ရန် AMRO သို့ တိုက်တွန်းပါကြောင်း၊ မြန်မာနိုင်ငံအနေဖြင့် အာရှငွေချေးစာချုပ်ဈေးကွက်ဖွံ့ဖြိုး တိုးတက်မှုအတွက် နည်းပညာအကူအညီများရယူ၍ အခြားအဖွဲ့ဝင်နိုင်ငံများနှင့်အတူ လိုက်ပါဆောင်ရွက်လျက်ရှိကြောင်း၊  ထို့ပြင် Financial resilience against climate and natural disasters လုပ်ငန်းအဖွဲ့၏ စွမ်းဆောင်ရည်တိုးမြှင့်ရေးဆိုင်ရာကိစ္စရပ်များတွင်လည်း ပူးပေါင်းပါဝင်ဆောင်ရွက် လျက်ရှိကြောင်း၊ မြန်မာနိုင်ငံအနေဖြင့် ကိုဗစ်-၁၉ ကပ်ရောဂါကာလအလွန်တွင် နိုင်ငံ့စီးပွားရေးပြန်လည်အားကောင်းလာစေရေးအတွက် ကြိုးပမ်းဆောင်ရွက်လျက်ရှိကြောင်း၊ ဒေသတွင်းစီးပွားရေး ပြန်လည်ဦးမော့လာရေး လုပ်ငန်းစဉ်များတွင်လည်း အာဆီယံ+၃ နိုင်ငံများနှင့် ပိုမိုနီးကပ်စွာ ပူး ပေါင်းဆောင်ရွက်သွားမည်ဖြစ်ကြောင်း စသည်ဖြင့် ပါဝင်ဆွေးနွေးခဲ့ပါသည်။

အာဆီယံ+၃ ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဌများ အစည်းအဝေးအား အာဆီယံနိုင်ငံများနှင့် အပေါင်းသုံးနိုင်ငံများဖြစ်ကြသည့် တရုတ်၊ ဂျပန်နှင့် ကိုရီးယားသမ္မတနိုင်ငံတို့က အလှည့်ကျ ပူးတွဲတာဝန်ယူပြီး နှစ်စဉ်ကျင်းပခြင်းဖြစ်ပါသည်။ ယခုနှစ်ကျင်းပသည့် အာဆီယံ+၃ အစည်းအဝေး များအား Virtual Meeting ပုံစံဖြင့် ကျင်းပဆောင်ရွက်ခြင်းဖြစ်ပြီး၊ အစည်းအဝေးသို့ အာဆီယံ+၃ နိုင်ငံများ၏ ဘဏ္ဍာရေးဝန်ကြီးများနှင့်ဗဟိုဘဏ်ဥက္ကဌများ၊ အပြည်ပြည်ဆိုင်ရာငွေကြေးရန်ပုံငွေအဖွဲ့၊ အာရှဖွံ့ဖြိုးရေးဘဏ်၊ အာဆီယံ+၃ မက်ခရိုစီးပွားရေးသုတေသနရုံးနှင့် အာဆီယံ အတွင်းရေးမှူးချုပ်ရုံးတို့မှ အကြီးအကဲများ ပါဝင်တက်ရောက်ခဲ့ကြကြောင်း သတင်းရရှိပါသည်။
သတင်းစဉ်