စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ယနေ့နံနက် (၇:၃၀) နာရီတွင် ကမ္ဘောဒီးယားနိုင်ငံက အိမ်ရှင်အဖြစ် Virtual စနစ်ဖြင့်ကျင်းပပြုလုပ်သည့် အာဆီယံ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများအစည်းအဝေးနှင့် ဆက်စပ်အစည်းအဝေးများသို့ ပါဝင်တက်ရောက်သည်။

၂၀၂၂ ခုနှစ် အာဆီယံအစည်းအဝေးများကို ကမ္ဘောဒီးယားနိုင်ငံက အာဆီယံအလှည့်ကျ ဥက္ကဌတာဝန်ယူ၍ ဆောင်ရွက်လျက်ရှိရာ ယခုနှစ်အတွက် အာဆီယံဆောင်ပုဒ်အဖြစ် “ASEAN A.C.T.: Addressing Challenges Together” ကိုချမှတ်ထားပါသည်။ အစည်းအဝေးတွင် အာဆီယံ နိုင်ငံများအနေဖြင့် ကိုဗစ်-၁၉ ကမ္ဘာ့ကပ်ရောဂါအလွန် ရေရှည်တွင် ခံနိုင်ရည်ရှိပြီး စဉ်ဆက်မပြတ် တိုးတက်မှုရရှိစေရေးအတွက် အားလုံးပါဝင်ဆောင်ရွက်သွားမည့်နည်းလမ်းများအား ရှာဖွေဖော် ထုတ် နိုင်ရေးကိစ္စရပ်များ၊ ကမ္ဘာလုံးဆိုင်ရာ မသေချာမှုများရှိနေသော်လည်း အာဆီယံအသိုက် အဝန်းအား ညီမျှသော၊ ခိုင်မာသော၊ အားလုံးပါဝင်မှုရှိသောရပ်ဝန်းတစ်ခုအဖြစ် ဖော်ဆောင်နိုင်ရေး အတွက် ဦးတည်ဆောင်ရွက်နေသည့် အာဆီယံဘဏ္ဍာရေးပူးပေါင်းဆောင်ရွက်မှုကိစ္စရပ်များ၊ Roadmap for Monetary and Financial Integration of ASEAN (RIA-Fin) နှင့်စပ်လျဉ်းသည့် တိုးတက်မှုအခြေအနေများနှင့် ဦးစားပေးဆောင်ရွက်ရမည့် ကိစ္စရပ်များအား ဆွေးနွေးခဲ့ကြပြီး ဒုတိယဝန်ကြီးနှင့် ဒုတိယဥက္ကဌများက နိုင်ငံအလိုက်အတွေ့အကြုံများနှင့် အမြင်ချင်းဖလှယ် ဆွေးနွေးခဲ့ပါသည်။

ထို့ပြင် အာဆီယံဘဏ္ဍာရေးနှင့်ဗဟိုဘဏ်တို့၏ပူးပေါင်းဆောင်ရွက်မှုသည် ဒေသစီးပွားရေးအတွက် ပိုမိုအရေးပါလာသည့်အတွက် ကိုဗစ်-၁၉ ရောဂါလွန်မြောက်သည့်ကာလတွင် ပြန်လည်ထူထောင်ရေးအစီအစဉ်များကို ပိုမိုတွန်းအားပေးဆောင်ရွက်နိုင်ရေးနှင့် စဉ်ဆက်မပြတ်ဖွံ့ဖြိုးတိုး တက်ရေးအတွက် ရေရှည်ဆောင်ရွက်သွားမည့်အစီအစဉ်များ၊ ASEAN Blueprint 2025 အကောင်အထည်ဖော်ဆောင်ရွက်မှုအခြေအနေများ၊ အာဆီယံနိုင်ငံများအတွင်း ဘဏ္ဍာရေးပူးပေါင်းဆောင်ရွက်မှုများ၏ တိုးတက်မှုအခြေအနေများကို ဆွေးနွေးကြပါသည်။ အာဆီယံဘဏ္ဍာရေးပူးပေါင်း ဆောင်ရွက်မှု ကိစ္စရပ်များတွင်အာဆီယံဒေသတွင်းငွေလုံးငွေရင်းဆိုင်ရာဖြေလျှော့ပေးမှုကိစ္စရပ်များ၊ အရင်းအနှီးဈေးကွက်ဖွံ့ဖြိုးတိုးတက်ရေးဆိုင်ရာကိစ္စရပ်များ၊ အာဆီယံဘဏ္ဍာရေး ပူးပေါင်းဆောင်ရွက်မှုမူဘောင်သဘောတူညီချက် အကောင်အထည်ဖော်ရေးကိစ္စရပ်များ၊ ငွေရေးကြေးရေးကဏ္ဍတွင် အားလုံးပါဝင်လာနိုင်ရေးဆိုင်ရာ ကိစ္စရပ်များနှင့် ငွေပေးချေမှုနှင့် စာရင်းရှင်းလင်းရေးစနစ်များ ဖွံ့ဖြိုးတိုး တက်မှုဆိုင်ရာကိစ္စရပ်များ ပါဝင်ပါသည်။

အဆိုပါအစည်းအဝေးနှင့်အတူ ဆက်စပ်အစည်းအဝေးတစ်ခုဖြစ်သော အာဆီယံဘဏ္ဍာရေးနှင့် ဗဟိုဘဏ်ဒုတိယအကြီးအကဲများနှင့် အမေရိကန်ပြည်ထောင်စု၊ ဘဏ္ဍာရေးဝန်ကြီးဌာနတို့၏အစည်း အဝေးကိုလည်း ယနေ့နံနက်၊ (၇:၃၀) နာရီမှ (၈:၄၅) နာရီထိ Virtual အစီအစဉ်ဖြင့် ကျင်းပခဲ့ပါသည်။ အစည်းအဝေးတွင် အမေရိကန်ပြည်ထောင်စုက ၎င်း၏ အဓိကကုန်သွယ်ဖက်ဒေသတစ်ခုဖြစ်သည့် အာဆီယံဒေသတွင် ကိုဗစ်-၁၉ ကပ်ရောဂါ၏ သက်ရောက်မှုများကို တုံ့ပြန်ဆောင်ရွက်သွားမည့်အစီ အစဉ်များနှင့် ကိုဗစ်-၁၉ ကာလအလွန်တွင်ဆောင်ရွက်မည့် ပြန်လည်ထူထောင်ရေးလုပ်ငန်းစဉ်များ၌  ပူးပေါင်းဆောင်ရွက်နိုင်မည့်ကိစ္စရပ်များ၊ နည်းပညာတိုးတက်မှုနှင့်အတူ ယှဉ်တွဲပေါ်ပေါက်လာသည့် digital assets များနှင့်စပ်လျဉ်း၍ ဆောင်ရွက်နိုင်မည့်အခြေအနေများ၊ ရာသီဥတုပြောင်းလဲမှုကြောင့် ဖြစ်ပေါ်လာနိုင်သည့် စီးပွားရေးနှင့်လူမှုရေးထိခိုက်မှုများအပေါ် ဘဏ္ဍာရေးအစီအစဉ်များ ချမှတ် ဆောင်ရွက်ရေးကိစ္စရပ်များကို အမြင်ချင်းဖလှယ်ဆွေးနွေးခဲ့ကြပါသည်။ အဆိုပါအစည်းအဝေးတွင် ဒုတိယဝန်ကြီးက မြန်မာနိုင်ငံ၏ digital finance ဆိုင်ရာ ဆောင်ရွက်မှုအခြေအနေများအား ဆွေးနွေး ခဲ့ပါသည်။

ယခုကျင်းပသည့် အာဆီယံဘဏ္ဍာရေးနှင့် ဗဟိုဘဏ်ဒုတိယအကြီးအကဲများအစည်းအဝေးမှ ဆွေးနွေးဆုံးဖြတ်ချက်များကို ဧပြီလ ၈ ရက်နေ့တွင်ကျင်းပမည့် အာဆီယံဘဏ္ဍာရေးနှင့် ဗဟိုဘဏ် ဥက္ကဌများအစည်းအဝေးသို့ ဆက်လက်တင်ပြအတည်ပြုဆောင်ရွက်မည်ဖြစ်သည်။

အစည်းအဝေးသို့ ဘဏ္ဍာရေးနှင့် ဗဟိုဘဏ်တို့မှ ဒုတိယဝန်ကြီးများနှင့် ဒုတိယဥက္ကဌများ၊ အာဆီယံအတွင်းရေးမှူးချုပ်ရုံးမှ တာဝန်ရှိသူများ စုံညီစွာတက်ရောက်ခဲ့ကြပြီး၊ လာမည့် ၂၀၂၃ ခုနှစ် တွင် ကျင်းပမည့် အာဆီယံ ဘဏ္ဍာရေးနှင့် ဗဟိုဘဏ်ဒုတိယအကြီးအကဲများအစည်းအဝေးကို အိမ်ရှင် အဖြစ် အလှည့်ကျသည့် အင်ဒိုနီးရှားနိုင်ငံက လက်ခံကျင်းပသွားမည်ဖြစ်ကြောင်း သိရှိရသည်။

သတင်းစဉ်