နေပြည်တော် ၊ ဖေဖော်ဝါရီလ ၄ 
စီမံကိန်းနှင့် ဘဏ္ဍာရေးဝန်ကြီးဌာနတွင်ရှိသော Data Center များနှင့် ပတ်သက်၍ ဆက်လက်ဆောင်ရွက်မည့် အစီအမံများနှင့် စပ်လျဉ်းသည့် ညှိနှိုင်းအစည်းအဝေးကို ယနေ့ နံနက် ၁၀:၀၀ နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၂)၊ အစည်းအဝေးခန်းမ၌ကျင်းပရာ ဒုတိယဝန်ကြီး ဒေါ်သန်းသန်းလင်း၊ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ် ဦးကျော်ထင်၊ ဒုတိယညွှန်ကြားရေးမှူးချုပ်များနှင့် သက်ဆိုင်ရာဌာနများမှ တာဝန်ရှိသူများ တက်ရောက်ခဲ့ကြသည်။ ရှေးဦးစွာ ဒုတိယဝန်ကြီးက ယနေ့ခေတ် တစ်ကမ္ဘာလုံး၌ Internet ကွန်ယက် ဖြန့်ကြက်ဆက်သွယ်ဆောင်ရွက်ရာတွင် Data Center များကို သတင်းအချက်အလက်များ ဖလှယ်ချိတ်ဆက်ပေးသည့် ဆုံမှတ်အဖြစ် အသုံးပြုလာပါကြောင်း၊ အင်တာနက် ချိတ်ဆက် အသုံးပြုမှုများပြားလာသည်နှင့်အမျှ ပြည်သူများ၊ စီးပွားရေးလုပ်ငန်းများ၊ အစိုးရဌာနဆိုင်ရာများ၏ သတင်းအချက်အလက်များသည် Digital Platform သို့မဟုတ်  Online ပေါ်တွင် တဖြည်းဖြည်း တိုးတက်များပြားလာသည်ကို တွေ့မြင်နေရပါကြောင်း၊ Digital Data များကို သိုလှောင်သိမ်းဆည်းရန် အခြေခံအဆောက်အအုံဖြစ်သော Data Center များ လိုအပ်ပါကြောင်း၊ သို့ပါ၍ ဝန်ကြီးဌာနတွင် တပ်ဆင်အသုံးပြုနေသည့် Data Center များကို အကျိုးရှိ ထိရောက်စွာ အသုံးပြုနိုင်ရန် Data Center များ၏ လက်ရှိဆောင်ရွက်နေမှု အခြေအနေများကို စိစစ်တင်ပြနိုင်ရေးအတွက် “Data Center များ၏ ဆောင်ရွက်နေမှု အခြေအနေကို စိစစ်အစီရင်ခံရေးအဖွဲ့”အား ဖွဲ့စည်းပြီး တာဝန်ပေးအပ်ခဲ့ပါကြောင်း၊ Data Center ရှိသည့် ဦးစီးဌာန/အဖွဲ့အစည်းများမှ ဆက်လက်ဆောင်ရွက်မည့် အစီအမံများကို အချိန်မီ အကျိုးရှိ ထိရောက်အောင် စနစ်တကျရေးဆွဲတင်ပြရန် လိုအပ်ပါကြောင်းဖြင့် တိုက်တွန်း ပြောကြားခဲ့သည်။
ဆက်လက်၍ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ် ဦးကျော်ထင်မှ Data Center များ ဆက်လက်ဆောင်ရွက်မည့် အစီအမံများနှင့် စပ်လျဉ်း၍ ဖြည့်စွက် ပြောကြားခဲ့ပြီး ဒုတိယအမြဲတမ်းအတွင်းဝန် ဦးဟန်မျိုးအောင်က Data Center များ၏ ဆောင်ရွက်နေမှု အခြေအနေကို ရှင်းလင်းတင်ပြခဲ့သည်။ ထို့နောက် Data Center အသုံးပြုနေသော ဦးစီးဌာန/အဖွဲ့အစည်းများမှ တာဝန် ရှိသူများမှ ဆွေးနွေးတင်ပြခဲ့ကြပြီး ဒုတိယဝန်ကြီးက ဆွေးနွေးတင်ပြချက်များအပေါ် ပေါင်းစပ်ညှိနှိုင်းပေးခဲ့ကြောင်း သတင်းရရှိသည်။