စီမံကိန်းနှင့် ဘဏ္ဍာရေးဝန်ကြီးဌာန၊ မြန်မာ့အာမခံလုပ်ငန်း၏ 
အာမခံ Product များကို Website, Mobile Application များမှတစ်ဆင့် Online/Mobile Payment စနစ်ဖြင့် စတင်ဝယ်ယူနိုင်မည့် မိတ်ဆက်ဖွင့်ပွဲအခမ်းအနား ကျင်းပ

ရန်ကုန်၊ ဇူလိုင် ၈

          စီမံကိန်းနှင့်ဘဏ္ဍာရေးဝန်ကြီးဌာန၊ မြန်မာ့အာမခံလုပ်ငန်း၏ အာမခံ Product များကို Website, Mobile Application များမှတစ်ဆင့် Online/Mobile Payment စနစ်ဖြင့် စတင် ဝယ်ယူနိုင်မည့် မိတ်ဆက်ဖွင့်ပွဲအခမ်းအနားကို ရန်ကုန်မြို့၊ မြန်မာ့အာမခံလုပ်ငန်း(ရုံးချုပ်)၊ ဆဌမထပ် အစည်းအဝေးခန်းမ၌ Online Webinar ဖြင့် နံနက် (၁၀:၀၀) နာရီတွင် ကျင်းပပြုလုပ်ခဲ့ပါသည်။

      အဆိုပါအခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်၊ ဒုတိယဝန်ကြီး ဦးမောင်မောင်ဝင်း၊ အာမခံလုပ်ငန်းကြီးကြပ်ရေးအဖွဲ့ အဖွဲ့ဝင်များ၊ မြန်မာနိုင်ငံအာမခံအသင်း အဖွဲ့ဝင်များ၊ မြန်မာ့အာမခံလုပ်ငန်း၏ စီးပွားရေးမိတ်ဖက်အဖွဲ့အစည်းများ၊ မြန်မာ့အာမခံကိုယ်စားလှယ်များ၊ မြန်မာ့အာမခံလုပ်ငန်းတွင် အာမခံထားသူများ၊ အထူးဖိတ်ကြားထားသောဧည့်သည်များက Online မှ တက်ရောက်ကြပါသည်။

    အခမ်းအနားတွင် ရှေးဦးစွာ စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က Online မှ အဖွင့်အမှာစကားပြောကြားရာတွင် ယနေ့ ကမ္ဘာ့နိုင်ငံအသီးသီးသည် နယ်ပယ်အသီးသီးမှာ I.T နည်းပညာကို အသုံးပြုပြီး အရှိန်အဟုန်ပြင်းပြင်းနဲ့ ရှေ့ကိုချီတက်နေသည့်ခေတ်ဖြစ်ကြောင်း၊ နိုင်ငံတော်ရဲ့ ကဏ္ဍအသီးသီးဟာလည်း ခေတ်နဲ့ယှဉ် ရင်ဘောင်တန်းနိုင်ရန်လိုကြောင်း၊ နိုင်ငံတော်အစိုးရအနေဖြင့်လည်း Digital Government Strategy ချမှတ်ပြီး   e-Government System ကို အကောင်အထည်ဖော် ကျင့်သုံးနေပြီဖြစ်ကြောင်း၊ မြန်မာ့အာမခံက ဆောင်ရွက်နေသည့်စီမံကိန်းသည် နိုင်ငံတော်ကချမှတ်ထားသော Digital Government Strategy နှင့် e-Government System တို့ကို အကောင်အထည်ဖော်ဆောင်ရွက်နိုင်ရန်အတွက် ရည်ရွယ်ပြီး အာမခံလုပ်ငန်းစနစ်များစုစည်းမြှင့်တင်ခြင်းစီမံကိန်း (Integrated Insurance Solutions Project) ကို ၂၀၁၉-၂၀၂၀ ဘဏ္ဍာရေးနှစ်မှစပြီး ၂၀၂၃-၂၀၂၄ ဘဏ္ဍာရေးနှစ်ထိ ၅ နှစ်တာ အကောင်အထည်ဖော် ဆောင်ရွက်နေခြင်းဖြစ်ကြောင်း၊ မြန်မာ့အာမခံက အကောင်အထည်ဖော် ဆောင်ရွက်နေသည့် အစီအစဉ်သည် အာမခံအကာအကွယ်ရယူလိုသည့် ပြည်သူများအနေဖြင့် မိမိရွေးချယ်ဝယ်ယူလိုသော အာမခံ Product များကို ခေတ်နှင့်အညီ အဆင်ပြေချောမွေ့စွာ ရွေးချယ်ဝယ်ယူနိုင်ရန်နှင့် ငွေပေးချေနိုင်ရန်အတွက် အာမခံလုပ်ငန်းများကို Digital နည်းပညာဖြင့် ပြောင်းလဲအဆင့်မြှင့်တင် ပြီး အခြားပြည်တွင်း/ပြည်ပကုမ္ပဏီများနဲ့ တန်းတူစျေးကွက်အတွင်း ယှဉ်ပြိုင်ထိုးဖောက်နိုင်ရန် ရည်ရွယ်ထားပါကြောင်း၊ စီမံကိန်းကို ၂၀၁၉-၂၀၂၀ ဘဏ္ဍာရေးနှစ်မှစတင်ခဲ့ပြီး ပထမနှစ်ပြီးမြောက်သည့်အခါတွင် သူတစ်ပါးထိခိုက်မှုအာမခံနှင့် ခရီးသွားအာမခံအမျိုးအစား (၂) မျိုးကို မြန်မာ့အာမခံ လုပ်ငန်း Website နှင့် Mobile App တို့မှတစ်ဆင့် ဝယ်ယူနိုင်ပြီဖြစ်ကြောင်း၊ ယခုအချိန်တွင် Covid-19 ကပ်ရောဂါဆိုးကြောင့် အာမခံထားရှိသူများ လူကိုယ်တိုင်လာရောက်ပြီး ပရီမီယံပေးချေရန်မလိုတော့ဘဲ Online/Mobile Payment များဖြင့် ငွေပေးချေခြင်းများကို အဆင်ပြေချောမွေ့စွာ ပေးချေနိုင်မှာဖြစ်ပါကြောင်း၊ အာမခံလုပ်ငန်းကဏ္ဍသည်လည်း တစ်ရက်နှင့်တစ်ရက် တိုးတက် ပြောင်းလဲလာသဖြင့် ယခုစီမံကိန်းကို ဆောင်ရွက်ခြင်းကြောင့် Digital စနစ်သည် နိုင်ငံနှင့် ပြည်သူအတွက် အထောက်အကူပြုမှာ ဖြစ်ပါကြောင်း ပြောကြားခဲ့ပါသည်။ 

      ဆက်လက်၍ မြန်မာ့အာမခံလုပ်ငန်း ဦးဆောင်ညွှန်ကြားရေးမှူး ဒေါက်တာစန္ဒာဦးက နှုတ်ခွန်းဆက်အမှာစကားပြောကြားခဲ့ပြီး မြန်မာ့အာမခံလုပ်ငန်း၏ Corporate Video များ ပြသခဲ့ ပါသည်။ 

      ထို့နောက် မြန်မာ့အာမခံလုပ်ငန်း၏ အာမခံ Product များကို Website, Mobile Application များမှတစ်ဆင့် Online/Mobile Payment စနစ်ဖြင့် စတင်ဝယ်ယူနိုင်မည့် မိတ်ဆက် ဖွင့်ပွဲအခမ်းအနား ဖွင့်လှစ်ခဲ့ပါသည်။

     မြန်မာ့အာမခံလုပ်ငန်းသည် နိုင်ငံပိုင်အာမခံအဖွဲ့အစည်းဖြစ်ပြီး ၁၉၅၂ ခုနှစ်ကတည်းက စတင်တည်ထောင်ခဲ့ပြီး အသက်အာမခံလုပ်ငန်းကို စတင်ဆောင်ရွက်ခဲ့ကာ နောက်ပိုင်းတွင် အသက်နှင့်အထွေထွေအာမခံနှစ်မျိုးလုံး လက်ခံဆောင်ရွက်ခဲ့ပါသည်။ ယခုလက်ရှိ ဆောင်ရွက် လျက်ရှိသော အာမခံအမျိုးအစားများမှာ အသက်အာမခံအနေဖြင့် (၁၉) မျိုး၊ အထွေထွေအာမခံ အနေဖြင့် (၂၂) မျိုး လက်ခံဆောင်ရွက်လျက်ရှိပါသည်။

    အထွေထွေအာမခံလုပ်ငန်းတွင် စီးပွားရေးလုပ်ငန်းရှင်များ၊ ဟိုတယ်၊ စက်ရုံ၊ အလုပ်ရုံ၊ သိုလှောင်ရုံများအတွက် ငွေရေးကြေးရေးဆုံးရှုံးမှု (Financial Loss) ကို အကာအကွယ်ပေးသည့် မီးအာမခံကိုလည်းကောင်း၊ ဆောက်လုပ်ရေးလုပ်ငန်းရှင်များ၏ အင်ဂျင်နီယာလုပ်ငန်းများအတွက် ကန်ထရိုက်တာအလုံးစုံအာမခံ (Contractor’s All Risks)၊ တည်ဆောက်မှုအလုံးစုံအာမခံ (Erection All Risks)ကိုလည်းကောင်း၊ လုပ်ငန်းရှင်များအားလုံးအတွက် Industrial All Risks နှင့် Property All Risks ကိုလည်းကောင်း လက်ခံဆောင်ရွက်ပေးလျက်ရှိပါသည်။

      ထို့ပြင် ကုန်သွယ်မှုလုပ်ငန်းရှင်များ၊ သင်္ဘောလုပ်ငန်းရှင်များအတွက် ရေကြောင်း ကုန်စည်/ ကုန်းလမ်းကုန်စည်အာမခံနှင့် ရေယာဉ်ကိုယ်ထည်အာမခံကိုလည်းကောင်း၊ လေကြောင်းလုပ်ငန်း လုပ်ငန်းရှင်များအတွက် လေကြောင်းအာမခံ၊ ၎င်းနှင့်ဆက်စပ်သည့်အာမခံအမျိုးမျိုးကိုလည်း ကောင်း၊ ရေနံလုပ်ငန်းများအတွက် ရေနံနှင့်သဘာဝဓါတ်ငွေ့အာမခံလုပ်ငန်းကို လည်းကောင်း အာမခံဝန်ဆောင်မှုပေးလျက်ရှိပါသည်။

        ခရီးသွားလုပ်ငန်းများအတွက် ကိုယ်အင်္ဂါထိခိုက်မှုနှင့် ရောဂါဘယအာမခံ၊ အုပ်စုလိုက် ကိုယ်အင်္ဂါထိခိုက်မှုအာမခံ (Group Personal Accident Insurance) ကျန်းမာရေးအာမခံ (Health Insurance)၊ ခရီးသွားအာမခံလုပ်ငန်းအမျိုးမျိုးတို့ကို လက်ခံဆောင်ရွက်ပေးခြင်းဖြင့် ပြည်သူလူထု အား အာမခံအကာအကွယ်ပေး၍ ဝန်ဆောင်မှုပေးလျက်ရှိပါသည်။

        ထိုသို့အာမခံဝန်ဆောင်မှုပေးခြင်းကို နှစ်ပေါင်း (၆၀) ကျော် manual system ဖြင့် ဝန်ဆောင်မှုပေးနေရာမှ ပြည်သူလူထုအနေဖြင့် ပြောင်းလဲတိုးတက်လာသည့် IT နည်းပညာကို အသုံးပြု၍ အာမခံဝန်ဆောင်မှုများကို အလွယ်တကူဝယ်ယူနိုင်ရန်ရည်ရွယ်ပြီး အာမခံ Product များကို digital နည်းပညာဖြင့် ပြောင်းလဲဝန်ဆောင်မှုပေးခြင်း၊ အထွေထွေအာမခံလုပ်ငန်းမှ သူတစ်ပါးထိခိုက်မှုအာမခံကို Mobile Application မှ တစ်ဆင့်ဝယ်ယူ၍ ပရီမီယံ ငွေအား Online Payment ဖြင့်ပေးချေခြင်းများ ဆောင်ရွက်သွားမည်ဖြစ်ပါသည်။ 

မြန်မာ့အာမခံလုပ်ငန်း