စီမံကိန်းနှင့်ဘဏ္ဍာရေးဝန်ကြီးဌာနက ကြီးမှူး၍ နိုင်ငံအဆင့်ဆန္ဒအလျောက် ပြန်လည်သုံးသပ်မှု (Voluntary National Review-VNR) အစီရင်ခံစာပြုစုရေးနှင့် စပ်လျဉ်း၍ ပြည်တွင်း အစိုးရမဟုတ်သည့် အဖွဲ့အစည်းများနှင့် ညှိနှိုင်းအစည်းအဝေးကို ၂၀-၅-၂၀၂၁ ရက်နေ့၊ နံနက် ၁၀:၀၀ နာရီတွင် Virtual ပုံစံဖြင့် ကျင်းပခဲ့သည်။ 

အစည်းအဝေးသို့ VNR အစီရင်ခံစာ တင်သွင်းရေးအတွက် ပူးပေါင်းဆောင်ရွက်ရေး ကော်မတီဥက္ကဋ္ဌ၊ စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဒေါ်သန်းသန်းလင်းနှင့် မြန်မာနိုင်ငံ အမျိုးသမီးရေးရာအဖွဲ့ချုပ်ဥက္ကဋ္ဌ၊ မြန်မာနိုင်ငံ မိခင်နှင့်ကလေး စောင့်ရှောက်ရေးအသင်း ဥက္ကဋ္ဌ၊ မြန်မာနိုင်ငံ အမျိုးသမီးများနှင့် ကလေးသူငယ်များဘဝမြှင့်တင်ရေးအသင်းဥက္ကဋ္ဌ၊ မြန်မာနိုင်ငံ အမျိုးသမီးအားကစားအဖွဲ့ချုပ် ဒုတိယဥက္ကဋ္ဌ၊ မြန်မာနိုင်ငံကြက်ခြေနီအသင်း အချိန်ပြည့်အမှုဆောင်၊ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်တို့မှ အမှုဆောင်အရာရှိချုပ်၊ စီးပွားရေးတက္ကသိုလ်မှ တာဝန်ရှိပုဂ္ဂိုလ်များ၊ စီမံကိန်းရေးဆွဲရေးဦးစီးဌာနနှင့် ဗဟိုစာရင်းအင်းအဖွဲ့မှ တာဝန်ရှိပုဂ္ဂိုလ်များ တက်ရောက်ခဲ့သည်။

ဒုတိယဝန်ကြီးက မြန်မာနိုင်ငံအနေဖြင့် ၂၀၂၁ ခုနှစ်၊ ဇူလိုင်လတွင် ကျင်းပပြုလုပ်မည့် 21^st High Level Political Forum(HLPF) အစည်းအဝေးတွင် VNR အစီရင်ခံစာကို ပထမအကြိမ် တင်သွင်းရန်ရှိပါကြောင်း၊အစီရင်ခံစာပြုစုတင်သွင်းနိုင်ရေးအတွက် ပေါင်းစပ်ညှိနှိုင်းရေးကော်မတီ၊ အစီရင်ခံစာ ရေးသားပြုစုရေးလုပ်ငန်းအဖွဲ့နှင့် Core Group တို့ကို ဖွဲ့စည်းဆောင်ရွက်နေပါ ကြောင်း၊ VNR သည် Sustainable Development Goals-SDGs ကို အကောင်အထည်ဖော်မှုနှင့် စပ်လျဉ်း၍ နိုင်ငံအသီးသီးက မိမိတို့ဆန္ဒအလျောက် သုံးသပ်၍ အစီရင်ခံစာ တင်သွင်းကြခြင်း ဖြစ်ကြောင်း၊ အစီရင်ခံစာပြုစုတင်သွင်းရာတွင် အစိုးရဌာနများသာမက အစိုးရမဟုတ်သည့် အဖွဲ့အစည်းများ၊ ပညာရပ်ဆိုင်ရာအဖွဲ့အစည်းများနှင့် စီးပွားရေးလုပ်ငန်းရှင်များ၏ အကြံပြုချက်များသည် အရေးကြီးသည့် အခန်းကဏ္ဍတွင် ပါဝင်ကြောင်း၊ တက်ရောက်လာကြသည့် ပုဂ္ဂိုလ်များအနေဖြင့် အစီရင်ခံစာနှင့်စပ်လျဉ်း၍ ထည့်သွင်းလိုသည့် အချက်အလက်များကို ဆွေးနွေးအကြံပြုပေးစေလိုပါကြောင်း ပြောကြားခဲ့သည်။

ဆက်လက်၍ စီမံကိန်းရေးဆွဲရေးဦးစီးဌာန၊ ညွှန်ကြားရေးမှူးချုပ်က VNR အစီရင်ခံစာရေးသားမှုအခြေအနေနှင့် ဆောင်ရွက်ထားရှိမှုများကို ရှင်းလင်းဆွေးနွေးခဲ့ပြီး တက်ရောက်လာသူများမှလည်း အစီရင်ခံစာနှင့် စပ်လျဉ်း၍ အကြံပြုဆွေးနွေးခဲ့ကြောင်း သတင်းရရှိသည်။