စည်ပင်သာယာဒဏ်ကြေးငွေနှင့် မော်တော်ယာဉ် ဆုကြေးရငွေများအား စီမံခန့်ခွဲရာ၌ တစ်ပြေးညီဖြစ်စေရန်အတွက် သက်ဆိုင်ရာ စည်ပင်သာယာရေးဥပဒေများတွင် ပြဋ္ဌာန်းနိုင်ရေးကိစ္စ နှင့်စပ်လျဉ်းသည့် ညှိနှိုင်းအစည်းအဝေးတစ်ရပ်ကို နေပြည်တော်ရှိ စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ် (၂၆) တွင် မေ ၂၀ ၊ မွန်းလွဲ (၂) နာရီ၌ ကျင်းပပြုလုပ်ခဲ့ပါသည်။

       အစည်းအဝေးသို့ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း၊ ပြည်ထောင်စု ရှေ့နေချုပ်ရုံး၊ ပြည်ထောင်စုစာရင်းစစ်ချုပ်ရုံး၊ နေပြည်တော်၊ ရန်ကုန်မြို့တော်နှင့် မန္တလေးမြို့တော် စည်ပင်သာယာရေးကော်မတီတို့မှ အဆင့်မြင့်အရာရှိကြီးများ၊ စီမံကိန်းနှင့် ဘဏ္ဍာရေးဝန်ကြီးဌာနမှ သက်ဆိုင်ရာ ညွှန်ကြားရေးမှူးချုပ်များ တက်ရောက်ကြပါသည်။

      စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းက အမှာစကား ပြောကြားရာတွင် အစည်းအဝေး၌ နေပြည်တော်၊ ရန်ကုန်မြို့တော်နှင့် မန္တလေးမြို့တော် စည်ပင်သာယာရေးကော်မတီများအနေဖြင့် ကောက်ခံရရှိသည့် စည်ပင်သာယာဒဏ်ကြေးငွေများနှင့် ယာဉ် စည်းကမ်း၊ လမ်းစည်းကမ်းထိန်းသိမ်းရေးဒဏ်ကြေးငွေများကို ဥပဒေစည်းမျဉ်းလုပ်ထုံးလုပ်နည်းများနှင့်အညီ ဆောင်ရွက်နိုင်ကြစေရေးအတွက် ညှိနှိုင်းဆွေးနွေးရန်ဖြစ်ကြောင်း၊ အဆိုပါဒဏ်ကြေးငွေများကို  သက်ဆိုင်ရာစည်ပင်သာယာရေးကော်မတီရန်ပုံငွေစာရင်းသို့ ပေးသွင်းရမည်ဖြစ်ကြောင်း၊ အဆိုပါဒဏ်ကြေးငွေများမှ သက်ဆိုင်ရာဝန်ထမ်းများအတွက် ဆုကြေးငွေချီးမြှင့်လိုသည်များကို စည်ပင်သာယာရေးကော်မတီ ဥပဒေနှင့်အညီဆောင်ရွက်ရေး၊ လုပ်ထုံးလုပ်နည်း စနစ်တကျရေးဆွဲရေးတို့အတွက် ဆောင်ရွက်ကြရမည်ဖြစ်ကြောင်း မှာကြားပါသည်။

     ထို့နောက် ပြည်ထောင်စုရှေ့နေချုပ်ရုံး၊ ပြည်ထောင်စုစာရင်းစစ်ချုပ်ရုံး၊ နေပြည်တော်၊ ရန်ကုန်နှင့် မန္တလေးမြို့တော်စည်ပင်သာယာရေးကော်မတီတို့မှ တာဝန်ရှိသူများ၊ စီမံကိန်းနှင့် ဘဏ္ဍာရေးဝန်ကြီးဌာနမှ သက်ဆိုင်ရာ ညွှန်ကြားရေးမှူးချုပ်များက ဝိုင်းဝန်းဆွေးနွေးတင်ပြကြပြီး၊ ဒုတိယဝန်ကြီးက စည်ပင်သာယာဒဏ်ကြေးငွေနှင့် ယာဉ်စည်းကမ်း၊ လမ်းစည်းကမ်းဒဏ်ကြေးငွေများ စီမံခန့်ခွဲရာတွင် ဆောင်ရွက်ရမည့် လုပ်ငန်းစဉ်များကို ပေါင်းစပ်ညှိနှိုင်းဆောင်ရွက်ပေးခဲ့ပြီး အစည်းအဝေးကို ရုပ်သိမ်းခဲ့ကြောင်း သတင်းရရှိပါသည်။