အစိုးရအဖွဲ့အစည်းများနှင့်  ပုဂ္ဂလိက အရပ်ဖက်အဖွဲ့အစည်းများအတွက် လိုအပ်နေ သည့် ပြည်သူ့ရေးရာစီမံခန့်ခွဲသူများနှင့် စီးပွားရေးလုပ်ငန်း စီမံခန့်ခွဲမှု ကျွမ်းကျင်သူများ မွေးထုတ်ပေးရန် ရည်ရွယ်၍ စီမံကိန်းနှင့်ဘဏ္ဍာရေးဝန်ကြီးဌာန၊ အုပ်ချုပ်မှုနှင့် ဖွံ့ဖြိုးမှု ပညာဘွဲ့လွန်သင်တန်းဌာန (GSAD) နှင့် ပညာရေးဝန်ကြီးဌာန၊ မိတ္ထီလာ စီးပွားရေး တက္ကသိုလ်တို့ ပူးပေါင်းဖွင့်လှစ်သည့် စီးပွားရေးလုပ်ငန်း စီမံခန့်ခွဲမှုမဟာဘွဲ့(MBA)နှင့် ပြည်သူ့ ရေးရာစီမံခန့်ခွဲမှုမဟာဘွဲ့ (MPA) သင်တန်း (ဒုတိယအကြိမ်) ဖွင့်ပွဲ အခမ်းအနားကို နေပြည်တော်ရှိ အမျိုးသားမှတ်တမ်းများ မော်ကွန်းတိုက်ဦးစီးဌာန၌ ယနေ့ နံနက် ၉ နာရီခွဲ တွင် ကျင်းပခဲ့သည်။

အခမ်းအနားသို့ စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း၊ ပြည်ထောင်စု စာရင်းစစ်ချုပ် ဦးမော်သန်း၊ စီမံကိန်းနှင့်ဘဏ္ဍာရေးဝန်ကြီးဌာန ဒုတိယ ဝန်ကြီး ဦးမောင်မောင်ဝင်း၊ အမြဲတမ်းအတွင်းဝန် ဦးထွန်းထွန်းနိုင်၊ မိတ္ထီလာ စီးပွားရေး တက္ကသိုလ်မှ ပါမောက္ခချုပ် ဒေါက်တာထွန်းအောင်၊ ညွှန်ကြားရေးမှူးချုပ်များ၊ ဒုတိယ ညွှန်ကြားရေးမှူးချုပ်များ၊ ပါမောက္ခ/ ဌာနမှူးများ၊ သင်ကြားပို့ချမည့် ဆရာ/ဆရာမများ၊ သင်တန်းတက်ရောက်မည့် သင်တန်း သား၊ သင်တန်းသူ ( ၂၂၂ ) ဦးနှင့်   စုစုပေါင်း ( ၃၅၀) ဦးခန့် တက်ရောက်ခဲ့ကြသည်။

အခမ်းအနားတွင် စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်း က အဖွင့်အမှာစကားပြောကြားခဲ့ပြီး ပြည်ထောင်စုစာရင်းစစ်ချုပ် ဦးမော်သန်းက ကြိုဆို နှုတ်ခွန်းဆက်စကားပြောကြားခဲ့ကာ မိတ္ထီလာစီးပွားရေးတက္ကသိုလ် ပါမောက္ခချုပ် ဒေါက်တာ ထွန်းအောင်က သင်တန်းရေးရာ ကိစ္စရပ်များကို ရှင်းလင်းပြောကြားခဲ့ပါသည်။

ယခုနှစ် MPA သင်တန်းတွင် အစိုးရဝန်ထမ်း ၇၄ % ၊ ပုဂ္ဂလိကကဏ္ဍမှ  ၂၆ % နှင့် MBA သင်တန်းတွင် အစိုးရဝန်ထမ်း ၃၂ % ၊ ပုဂ္ဂလိကကဏ္ဍမှ  ၆၈ % တက်ရောက် ခဲ့ကြသည်။ သင်တန်းကာလမှာ နှစ်နှစ်ဖြစ်ပြီး သင်တန်းများကို ရုံးပိတ်ရက်များတွင် သင်ကြားပို့ချသွားမည်ဖြစ်ပါသည်။ သင်တန်းတွင် ခေါင်းဆောင်မှုနှင့် စီမံခန့်ခွဲမှု အလေ့ အကျင့်များ ပျိုးထောင်မှု၊ ဒီမိုကရေစီကျင့်စဉ်များ နားလည်သဘောပေါက်ပြီး လိုက်နာ ကျင့်သုံးတတ်မှု စီးပွားရေးစီမံခန့်ခွဲမှု၊ ကိုယ်ရည်ကိုယ်သွေး ကောင်းမွန်ရေး လေ့ကျင့်မှု အပါအဝင် ဘာသာရပ်ဆိုင်ရာ လေ့ကျင့်သင်ကြားခြင်းများကို စာတွေ့လက်တွေ့ ကွင်းဆင်းလေ့လာခြင်း၊ စာတမ်းများ တင်သွင်းခြင်းများဖြင့် သင်ကြားပို့ချသွားမည် ဖြစ်ကြောင်း သတင်းရရှိသည်။

သတင်းစဉ်