ပင်စင်ဥပဒေသုံးသပ်ပြင်ဆင်ရေးအထောက်အကူပြုအဖွဲ့၏ (၂/၂၀၂၄) ကြိမ်မြောက်အစည်းအဝေးကို   ၂၄ - ၉ -၂၀၂၄ ရက် (အင်္ဂါနေ့)၊ နေ့လယ် (၂:၀၀) နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄)၊ပင်စင်ဦးစီးဌာနအစည်းအဝေးခန်းမ၌ ကျင်းပပြုလုပ်ခဲ့ပါသည်။ အဆိုပါအစည်းအဝေးသို့ ပင်စင်ဥပဒေသုံးသပ်ပြင်ဆင်ရေးအထောက်အကူပြုအဖွဲ့၏ ဥက္ကဋ္ဌ၊ ပင်စင်ဦးစီးဌာန ညွှန်ကြားရေးမှူးချုပ် ဦးရဲညွန့်၊ အဖွဲ့ဝင်များဖြစ်ကြသည့် ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် လက်ထောက်ညွှန်ကြားရေးမှူးများ စုံညီစွာ တက်ရောက်ကြသည်။ အစည်းအဝေးတွင် အဖွဲ့ ဥက္ကဋ္ဌ၊ ပင်စင်ဦးစီးဌာန ညွှန်ကြားရေးမှူးချုပ် ဦးရဲညွန့်က အဖွင့်အမှာစကားပြောကြားပြီး အဖွဲ့အတွင်းရေးမှူး၊ ပင်စင်စနစ်ပြုပြင်ပြောင်းလဲရေးဌာနခွဲတာဝန်ခံ ညွှန်ကြားရေးမှူး ဦးမိုးကြည်က ပင်စင်ဥပဒေသုံးသပ်ပြင်ဆင်ရေး အထောက်အကူပြုအဖွဲ့ ယခင်(၁/၂၀၂၄)ကြိမ်မြောက်အစည်းအဝေး၏ ဆုံးဖြတ်ချက်များ၊ ဆက်လက်ဆွေးနွေးမည့် နည်းဥပဒေတစ်ခုချင်းအလိုက် ဆက်စပ်စဉ်းစားရမည့် အချက်များနှင့် စပ်လျဉ်း၍ အသေးစိတ်ရှင်းလင်းတင်ပြခဲ့ပြီး ပြင်ဆင်၊ ဖြည့်စွက်၊ ပယ်ဖျက်သင့်သည့် သဘောထားမှတ်ချက်များအား ဌာနခွဲအလိုက် သက်ဆိုင်ရာဌာနခွဲတာဝန်ခံများက ရှင်းလင်းတင်ပြခဲ့ရာ တက်ရောက်လာကြသည့် အဖွဲ့ဝင်များမှလည်း တင်ပြချက်များအပေါ် ဝိုင်းဝန်းအကြံပြုဆွေးနွေးခဲ့ကြပါသည်။ ဆက်လက်၍ အဖွဲ့ဝင်များ၏ အကြံပြုဆွေးနွေးချက်များအပေါ် အဖွဲ့ဥက္ကဋ္ဌ ပင်စင်ဦးစီးဌာန ညွှန်ကြားရေးမှူးချုပ် ဦးရဲညွန့်က သုံးသပ်ဆွေးနွေး၍ နိဂုံးချုပ်အမှာစကားပြောကြားပြီး အစည်း အဝေးကို ညနေ (၃:၃၀) နာရီတွင် အောင်မြင်စွာ ကျင်းပပြီးစီးခဲ့ပါသည်။