ဝန်ထမ်းနောင်ရေး ဗဟိုရန်ပုံငွေ ဥပဒေကြမ်းနှင့်စပ်လျဉ်း၍ ဝန်ထမ်းနောင်ရေး ဗဟိုရန်ပုံငွေ အကောင်အထည်ဖော်ရေးကော်မတီဥက္ကဋ္ဌ၊ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီးအား ရှင်းလင်းတင်ပြခြင်းကို ၅-၁၂-၂၀၂၃ရက်နေ့၊ ၈-၁၂-၂၀၂၃ရက်နေ့နှင့် ၁၉-၁၂-၂၀၂၃ ရက်နေ့များတွင် စီမံကိန်းနှင့် ဘဏ္ဍာရေးဝန်ကြီးဌာန၊ ရုံးအမှတ် (၂၆) အစည်းအဝေးခန်းမ၌ ကျင်းပပြုလုပ်ခဲ့ပါသည်။ အစည်းအဝေးသို့ ဝန်ထမ်းနောင်ရေး ဗဟိုရန်ပုံငွေ အကောင်အထည်ဖော်ရေးကော်မတီ အတွင်းရေးမှူး၊ ပင်စင်ဦးစီးဌာန ညွှန်ကြားရေးမှူးချုပ် ဦးရဲညွန့်နှင့် ပင်စင်ဦးစီးဌာနမှ တာဝန်ရှိသူများ တက်ရောက်ခဲ့ပါသည်။ အဆိုပါရှင်းလင်းတင်ပြပွဲတွင် ဝန်ထမ်းနောင်ရေး ဗဟိုရန်ပုံငွေ ဥပဒေကြမ်းနှင့် စပ်လျဉ်း၍ ပင်စင်ဦးစီးဌာန ညွှန်ကြားရေးမှူးချုပ် ဦးရဲညွန့်က ဥပဒေကြမ်းဆိုင်ရာ စိစစ်တွေ့ရှိချက်များကို ရှင်းလင်းတင်ပြခဲ့ပြီး သက်ဆိုင်ရာ ဌာနခွဲ၊ ညွှန်ကြားရေးမှူးက ဥပဒေမူကြမ်းနှင့်စပ်လျဉ်း၍ ပုဒ်မ တစ်ခုချင်းအလိုက် ရှင်းလင်းတင်ပြခြင်းနှင့် ဥပဒေရေးရာဝန်ကြီးဌာန၊ ဥပဒေမူကြမ်းစိစစ်ရေးဦးစီးဌာန၏ဥပဒေမူကြမ်းအပေါ် တွေ့ရှိချက်များအား သဘောထားမှတ်ချက်ပေးပို့လာသည့် ပုဒ်မများကို အကျယ်တဝင့် ညှိနှိုင်းဆွေးနွေးခဲ့ကြပါသည်။  ထို့နောက် အစည်းအဝေးသို့ တက်ရောက်လာကြသော တာဝန်ရှိသူများက ဆွေးနွေးညှိနှိုင်းခြင်းနှင့် အကြံပြုမှတ်ချက်ပေးခြင်းများ ဆောင်ရွက်ခဲ့ကြပါသည်။