ငွေတိုက်ဦးစီးဌာန၏ (၁၀)နှစ်ပြည့် နှစ်ပတ်လည်အခမ်းအနားကျင်းပခြင်း

နေပြည်တော်၊ စက်တင်ဘာ ၁

ငွေတိုက်ဦးစီးဌာနအား ၁-၉-၂၀၂၄ ရက်နေ့တွင် စတင်ဖွင့်လှစ်ခဲ့ရာ (၁၀)နှစ်ပြည့် မြောက်ပြီဖြစ်ပါ၍ “ငွေတိုက်ဦးစီးဌာန၏ (၁၀)နှစ်ပြည့် နှစ်ပတ်လည်အထိမ်းအမှတ်” အဖြစ် စီမံကိန်းနှင့်ဘဏ္ဍာရေးဝန်ကြီးဌာန၊ ရုံးအမှတ်(၃၄)အစည်းအဝေးခန်းမတွင်  ညွှန်ကြားရေးမှူးချုပ် ဒေါ်စီစီပြုံးနှင့် ဝန်ထမ်းများက သံဃာတော်များအား ဝါဆိုသင်္ကန်းနှင့်လူဖွယ်ပစ္စည်းများ ဆက်ကပ်လှူဒါန်းခြင်းနှင့် အန္တရာယ်ကင်းပရိတ်တရားတော်များ နာယူခြင်းတို့အား မြတ်နိဗ္ဗာန်ကို ရည်မှန်း၍ ရေစက်သွန်းချအမျှဝေခဲ့ကြပါသည်။

ဆက်လက်၍ ၁-၉-၂၀၂၃ ရက်နေ့မှ ၃၁-၈-၂၀၂၄ ရက်နေ့အထိ တစ်နှစ်တာကာလအတွင်း ဝန်ကြီးဌာနအဆင့် သင်တန်းများတွင် ထူးချွန်ဆုများရရှိခဲ့ကြသည့် ပို့ဆောင်ရေးနှင့်ဆက်သွယ်ရေးဝန်ကြီးဌာနမှ ဖွင့်လှစ်သော Window Server Administration-II သင်တန်းတွင် ပထမဆု ရရှိခဲ့သည့် ဦးစီးအရာရှိ ဦးရဲကိုကိုထွန်းအား လည်းကောင်း၊ ပို့ဆောင်ရေးနှင့်ဆက်သွယ်ရေးဝန်ကြီးဌာနမှ ဖွင့်လှစ်သော Network Security သင်တန်းတွင် တတိယဆု ရရှိခဲ့သည့် ဦးစီးအရာရှိ ဒေါ်သူဇာခိုင်အား လည်းကောင်း၊ ပြည်ထောင်စုစာရင်းစစ်ချုပ်ရုံးမှ ဖွင့်လှစ်သော နိုင်ငံပိုင်ကဏ္ဍအတွက် နိုင်ငံတကာစာရင်းစံများ ဒီပလိုမာသင်တန်း အမှတ်စဉ်(၁)၊ အပိုင်း(၂) သင်တန်းတွင် တတိယဆု ရရှိခဲ့သည့် ဦးစီးအရာရှိ ဒေါဖြိုးဖြိုးကြွယ်အား လည်းကောင်း ဆုများ ချီးမြှင့်ခဲ့ပါသည်။