နေပြည်တော် နိုဝင်ဘာ၂၄

          စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့နှင့် ကမ္ဘာ့ဘဏ်(World Bank) တို့ပူးပေါင်း၍ စာရင်းအင်းဆိုင်ရာ ဖွံ့ဖြိုးမှုအမျိုးသားအဆင့် မဟာဗျူဟာ အကောင်အထည် ဖော်ဆောင်ရေး စီမံကိန်းနှင့်စပ်လျဉ်းသည့် ညှိနှိုင်းဆွေးနွေးပွဲကို နေပြည်တော်၊ Hilton ဟိုတယ်၌ ယနေ့နံနက်၉နာရီတွင် ကျင်းပပြုလုပ်ခဲ့ရာစီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်နှင့် ကမ္ဘာ့ဘဏ်(World Bank)၊ Senior Economist၊ Dr. ReenaBadiani-Magnusson တို့မှအဖွင့်အမှာစကား ပြောကြားခဲ့ပါသည်။

စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာ ဝါဝါမောင်က ကြိုဆိုနှုတ်ခွန်းဆက် အမှာစကားပြောကြားရာတွင် ယနေ့မြန်မာနိုင်ငံသည် ပွင့်လင်းမြင်သာမှုရှိသော ဒီမိုကရေစီနိုင်ငံအဖြစ်သို့ အသွင်ကူးပြောင်းလျက်ရှိရာ ဖွံ့ဖြိုးတိုးတက်မှုအတွက် စာရင်းအင်းတိကျမှန်ကန်ရေးနှင့် အရည်အသွေးပြည့်ဝရေးသည် အလွန်အရေးကြီးပါကြောင်း၊ စာရင်းအင်းလုပ်ငန်းစဉ်များကို ထိရောက်စွာဆောင်ရွက်နိုင်ရန် အတွက် ပြည်သူ့လွှတ်တော်မှ မြန်မာနိုင်ငံစာရင်းအင်းဥပဒေကို အတည်ပြုပြီးဖြစ်ပါကြောင်း၊ ထို့အပြင် မြန်မာနိုင်ငံ အမျိုးသားစာရင်းအင်းစနစ်အား မြှင့်တင်နိုင်ရန်ရည်ရွယ်၍ ဒုတိယသမ္မတမှ သဘာပတိအဖြစ် ဦးဆောင်ပြီး စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးမှ ဥက္ကဌအဖြစ်ဆောင်ရွက်၍ ဗဟိုစာရင်းအင်းအဖွဲ့အနေဖြင့် အတွင်းရေးမှူးအဖြစ် ပါဝင်ဆောင်ရွက် လျက်ရှိသော စာရင်းအင်းအချက်အလက်မှန်ကန်ရေးနှင့် အရည်အသွေးပြည့်ဝရေးကော်မတီကို ဖွဲ့စည်းကာ အလေးထားဆောင်ရွက်လျက်ရှိပါကြောင်း၊ စာရင်းအင်းဆိုင်ရာ ဖွံ့ဖြိုးမှုအမျိုးသား အဆင့်မဟာဗျူဟာ (National Strategy for Development of Statistics-NSDS) သည် စာရင်းအင်းစနစ် ခိုင်မာအားကောင်းစေရန်သာမက ဌာနများရှိ စာရင်းအင်းယူနစ်များ တိုးတက်စေရန်ကိုလည်း အထောက်အကူပြုစေမည် ဖြစ်ပါကြောင်း၊ မိမိတို့အနေဖြင့် မြန်မာနိုင်ငံစာရင်းအင်းစနစ်Peer Review ကို PARIS 21 ၏ အကူအညီအထောက်အပံ့ဖြစ် ဆောင်ရွက်နိုင်ခဲ့ပါကြောင်း၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့်မဟာဗျူဟာ အကောင်အထည်ဖော်ရေးစီမံကိန်းကို အပိုင်း(၂)ပိုင်း ဖြင့် ၂၀၁၃ ခုနှစ်တွင် စတင်ရေးဆွဲခဲ့ပါကြောင်း၊ အပိုင်း (၁) အဓိကမဟာဗျူဟာ (Core Strategies) ကို ၂၀၁၅ နှစ်ဝက်တွင် အပြီးသတ်ရေးဆွဲနိုင်ခဲ့ပြီး ၂၀၁၆ ခုနှစ် ဇူလိုင်လတွင် ထုတ်ပြန်ခဲ့ပါကြောင်း၊ ယခုအပိုင်း(၂)အကောင်အထည်ဖော်ဆောင်ရေး စီမံကိန်း (ImplementationPlan)သည် နှစ်ရှည်ဆောင်ရွက်ရမည့် စီမံကိန်းဖြစ်သော်လည်း ယခု စီမံကိန်းသည် ၂၀၁၈-၂၀၁၉ မှ ၂၀၂၂-၂၀၂၃ အထိ (၅) နှစ်စီမံကိန်းဖြစ်ပါကြောင်း၊ ပထမပိုင်းအနေဖြင့် စာရင်းအင်းအချက်အလက် မှန်ကန်ရေးနှင့် အရည်အသွေးပြည့်ဝရေး ကော်မတီ ဖွဲ့စည်းနိုင်ခဲ့သကဲ့သို့ လူ့စွမ်းအားအရင်းအမြစ်နှင့် နည်းပညာများတိုးတက်နိုင်စေရန် Statistical Training Center ကို ထူထောင်၍  စာရင်းအင်းနှင့် သက်ဆိုင်သော သင်တန်းများကို သင်ကြားပို့ချပေးနေပါကြောင်း၊ မိမိတို့ ဗဟိုစာရင်းအင်းအဖွဲ့အနေဖြင့် SDGs နှင့်ပတ်သက်၍ Monitoring & Evaluation ဆောင်ရွက်နေပြီး SDGs ညွှန်ကိန်းများကို တရားဝင် ထုတ်ပြန်နိုင်ရန်အတွက် Detail Action Plans များလိုအပ်ပြီး National Dataset ကို ပိုမိုတိုးတက်စေရန်လိုအပ်ပါကြောင်း၊ ထို့ကြောင့်NSDS ရေးဆွဲအကောင်အထည် ဖော်ဆောင်ရာ တွင် အားလုံးပူးပေါင်း ပါဝင်ဆောင်ရွက်စေလိုပါကြောင်းနှင့် Comprehensive Action Plan ဖြစ်ရန် ဆောင်ရွက်သင့်ပါကြောင်း၊ ယခုလုပ်ငန်းစီမံကိန်းသည် မြန်မာနိုင်ငံစာရင်းအင်းစနစ်ကို မြှင့်တင်နိုင်မည့် မှတ်တိုင်တစ်ခုဖြစ်သောကြောင့် သက်ဆိုင်သူအားလုံးပါဝင်ပြီး ဘက်စုံကဏ္ဍစုံမှ ပူးပေါင်းဆောင်ရွက်သွားရမည် ဖြစ်ပါကြောင်းနှင့် စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာ အကောင်အထည်ဖော်ဆောင်ရေး စီမံကိန်းရေးဆွဲနိုင်ရန် အကူအညီပေးခဲ့သော ကမ္ဘာ့ဘဏ် (World Bank)ကိုလည်း ကျေးဇူးတင်ရှိပါကြောင်း ပြောကြားခဲ့ပါသည်။

ဆက်လက်၍ကမ္ဘာ့ဘဏ်(World Bank)၊ Senior Economist၊ Dr. ReenaBadiani-Magnusson မှ ကမ္ဘာဘဏ်သည် နိုင်ငံပေါင်း ၁၇၀ ကျော်၏ စာရင်းအင်းနယ်ပယ်များအား ကူညီပံ့ပိုးပေးနေသော မိတ်ဖက်ဖြစ်ပြီး မြန်မာနိုင်ငံ၏ အမျိုသားစာရင်းအင်း ဖွံ့ဖြိုးတိုးတက်မှုကိုလည်း ကူညီဆောင်ရွက်ပေးနေပါကြောင်း၊ စာရင်းအင်းဆိုင်ရာဖွံ့ဖြိုးမှု အမျိုးသားအဆင့် မဟာဗျူဟာသည် စာရင်းအင်းစနစ်တစ်ခုလုံး တိုးတက်မှုကို ဖော်ဆောင်ပေး နိုင်မည်ဖြစ်ပြီးယနေ့ ညှိနှိုင်းဆွေးနွေးပွဲသည် လုပ်ငန်းအဖွဲ့များ၏ လုပ်ငန်းဆောင်ရွက်နေမှု အခြေအနများ၊ လိုအပ်ချက်များကို ဆွေးနွေးသွာကြမည် ဖြစ်ပါကြောင်း၊ ကမ္ဘာဘဏ်အနေဖြင့် ပြီးပြည့်စုံသော စီမံကိန်း (Comprehensive Plan) ဖြစ်လာစေရန်အတွက် ပူးပေါင်းဆောင်ရွက် သွားမည်ဖြစ်ပါကြောင်း၊ ကြွရောက်လာကြသော ဧည့်သည်တော်များအား ကျေးဇူးတင်ပါကြောင်း အဖွင့်အမှာစကား ပြောကြားခဲ့ပြီးNSDS လုပ်ငန်းအဖွဲ့အလိုက် Parallel Sessions ကို ဆက်လက် ကျင်းပခဲ့ပါသည်။

မွန်းလွဲပိုင်းတွင် စာရင်းအင်းဆိုင်ရာ ဖွံ့ဖြိုးတိုးတက်မှုအမျိုးသားအဆင့် မဟာဗျူဟာ အကောင်အထည်ဖော်ဆောင်ရွက်မည့် လုပ်ငန်းအဖွဲ့(၁၀)ဖွဲ့မှ အဖွဲ့လိုက် ဆွေးနွေးခဲ့မှုများအား ပြန်လည်တင်ပြဆွေးနွေးကြပြီး တက်ရောက်လာသူများက သိရှိလိုသည်များကို မေးမြန်းခဲ့ကြ ပါသည်။ ထို့နောက် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်မှ ဆွေးနွေးတင်ပြမှုများအား အနှစ်ချုပ်ပြန်လည်ဆွေးနွေးပြောကြားခဲ့ပါသည်။     

အခမ်းအနားသို့ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များနှင့် ဌာန အသီးသီးမှ အရာရှိကြီးများ၊ ကမ္ဘာ့ဘဏ်မှ ကိုယ်စားလှယ်များ၊ NSDS Cluster အဖွဲ့ ခေါင်းဆောင်နှင့်အဖွဲ့ဝင်များ၊ သက်ဆိုင်ရာဝန်ကြီးဌာနများမှ တာဝန်ရှိပုဂ္ဂိုလ်များ၊ သက်ဆိုင်ရာ ကဏ္ဍမှကျွမ်းကျင်ပညာရှင်များ အပါအဝင်စုစုပေါင်း(၁၈၀)ဦး ခန့်တက်ရောက်ခဲ့ကြပြီး ဆွေးနွေးပွဲကို မွန်းလွဲ ၄:၀၀နာရီတွင် ရုပ်သိမ်းခဲ့ကြောင်း သတင်းရရှိသည်။

သတင်းစဉ်