စီမံကိန်းနှင့်ဘဏ္ဍာရေးဝန်ကြီးဌာန ဗဟိုစာရင်းအင်းအဖွဲ့နှင့် ကုလသမဂ္ဂ ဖွံ့ဖြိုးမှု အစီအစဉ် (UNDP) တို့ပူးပေါင်း၍ မြန်မာနိုင်ငံ၏ စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာ အခြေခံနှစ် ညွှန်ကိန်းအစီရင်ခံစာ (SDG Indicator Baseline Report for Myanmar) မိတ်ဆက်ပွဲနှင့် စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာ အသိပညာမြှင့်တင်မှု အလုပ်ရုံ ဆွေးနွေးပွဲ အခမ်းအနားကို ရန်ကုန်မြို့ Park Royal ဟိုတယ်တွင် နိုဝင်ဘာလ (၁)ရက်နေ့၊ နံနက်(၉)နာရီ၌ ကျင်းပပြုလုပ်ခဲ့ရာ ရန်ကုန်တိုင်းဒေသကြီး၊ စီမံကိန်းနှင့်ဘဏ္ဍာရေးဝန်ကြီး ဦးမြင့်သောင်း၊ UNDP Myanmar မှ Senior Economist, Mr. Thomas Kring နှင့် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင် တို့မှ အဖွင့်အမှာစကား ပြောကြားခဲ့ပါသည်။

        အဆိုပါအစည်းအဝေးတွင် ရန်ကုန်တိုင်းဒေသကြီး စီမံကိန်းနှင့်ဘဏ္ဍာရေးဝန်ကြီး ဦးမြင့်သောင်း၊ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်၊ ကုလသမဂ္ဂ ဖွံ့ဖြိုးမှုအစီအစဉ်(UNDP) မှ Senior Economist, Mr. Thomas Kring နှင့် သက်ဆိုင်ရာဌာန ဆိုင်ရာများ၊ ဖွံ့ဖြိုးမှုမိတ်ဖက်အဖွဲ့အစည်းများမှ ကိုယ်စားလှယ်များ အပါအဝင် စုစုပေါင်း (၂၀၀)ဦး ခန့် တက်ရောက်ခဲ့ပါသည်။ အခမ်းအနားဒုတိယပိုင်း အစီအစဉ်ကို ဆက်လက်ကျင်းပရာ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်က စဉ်ဆက်မပြတ် ဖွံ့ဖြိုးမှု ပန်းတိုင်များ ညွှန်ကိန်းများနှင့်စပ်လျဉ်း၍ မြန်မာနိုင်ငံ၏ လက်ရှိအကောင်အထည်ဖော် ဆောင်ရွက်နေမှုများ၊ ညွှန်ကိန်းရရှိနိုင်မှုအခြေအနေ၊ ကြုံတွေ့နေရသည့် စိန်ခေါ်မှုများကို ရှင်းလင်း တင်ပြပြီး UNDP မှ စာရင်းအင်းပညာရှင် Mr. Felix Schmieding က မြန်မာနိုင်ငံ၏ စဉ်ဆက်မပြတ် ဖွံ့ဖြိုးမှုပန်းတိုင်ဆိုင်ရာ အခြေခံနှစ်ညွှန်ကိန်း အစီရင်ခံစာနှင့် စပ်လျဉ်း၍ ရှင်းလင်း တင်ပြ၍ တက်ရောက်လာကြသည့် တာဝန်ရှိသူများမှ သိရှိလိုသည်များ မေးမြန်းဆွေးနွေးခြင်း၊ အကြံပြုဆွေးနွေးခြင်းများပြုလုပ်ခဲ့ရာ ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာ ဝါဝါမောင်မှ ပြန်လည်ရှင်းလင်း ဆွေးနွေး ခဲ့ပါသည်။

          ထို့နောက် ဗဟိုစာရင်းအင်းအဖွဲ့ ညွှန်ကြားရေးမှူးချုပ် ဒေါက်တာဝါဝါမောင်၊ UNDP မှ Programme Specialist Ms. Hyeran Kim တို့မှ နိဂုံးချုပ်ပြောကြားခဲ့ပြီး မွန်းလွဲ (၁:၃၀) နာရီ တွင် အခမ်းအနားကို အောင်မြင်စွာ ကျင်းပပြီးစီးခဲ့ပါသည်။

ရန်ကုန်မြို့၊ ၂၀၁၇ ခုနှစ် နိုဝင်ဘာလ(၁)ရက်