နေပြည်တော်၊ သြဂုတ်(၁)ရက်

မြန်မာဖွံ့ဖြိုးမှုအဖွဲ့အစည်း (MDI) သည် စီမံကိန်းနှင့်ဘဏ္ဍာရေးဝန်ကြီးဌာန၊ ဗဟိုစာရင်းအင်း အဖွဲ့(CSO)နှင့်ပူးပေါင်း၍ မြန်မာနိုင်ငံ၏ လူမှုစီးပွားဖွံ့ဖြိုးမှုနယ်ပယ်များတွင် သုတေသန ပြုလုပ်နိုင်ရန် အတွက် နားလည်မှုစာချွန်လွှာ (MOU) လက်မှတ်ရေးထိုးပွဲအခမ်းအနားကို ၂၀၁၇ ခုနှစ်၊ သြဂုတ်လ ၁ ရက်၊ အင်္ဂါနေ့၊ နံနက် ၉:၀၀ နာရီတွင် စီမံကိန်းနှင့်ဘဏ္ဍာရေးဝန်ကြီးဌာန၊  ရုံးအမှတ် (၁)၊ အစည်း အဝေးခန်းမ(၂) နေပြည်တော်၌ ကျင်းပသည်။ အခမ်းအနားတွင် စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်း၊ သက်ဆိုင်ရာဝန်ကြီးဌာနများမှ ညွှန်ကြားရေးမှူးချုပ်များနှင့် ဒုတိယ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ မြန်မာဖွံ့ဖြိုးမှုအဖွဲ့အစည်း(MDI)ဥက္ကဋ္ဌ၊ အလုပ် အမှုဆောင်ဒါရိုက်တာနှင့်အဖွဲ့ဝင်များ၊ တာဝန်ရှိသူများ တက်ရောက်ကြသည်။
အခမ်းအနားတွင် မြန်မာနိုင်ငံ၏ လူမှုစီးပွားဖွံ့ဖြိုးမှုနယ်ပယ်များတွင် သုတေသန ပြုလုပ်နိုင်ရန် အတွက် နားလည်မှုစာချွန်လွှာ(MOU)ကို ပြည်ထောင်စုသမ္မတ မြန်မာနိုင်ငံတော်အစိုးရ၊ စီမံကိန်းနှင့် ဘဏ္ဍာရေးဝန်ကြီးဌာန၊ ဗဟိုစာရင်းအင်းအဖွဲ့၊ ညွှန်ကြားရေးမှူးချုပ် ဒေါက်တာဝါဝါမောင်နှင့် မြန်မာဖွံ့ဖြိုးမှုအဖွဲ့အစည်း(MDI) အလုပ်အမှုဆောင်ဒါရိုက်တာ ဒေါက်တာမင်းရဲပိုင်ဟိန်းတို့ကလက်မှတ် ရေးထိုး လဲလှယ်ခဲ့ကြသည်။
အဆိုပါ နားလည်မှုစာချွန်လွှာ(MOU)သည် လက်မှတ်ရေးထိုးပြီးသည်နှင့့် တပြိုင်နက် အသက် ဝင်မှာဖြစ်ပြီး စာချွန်လွှာသက်တမ်းသည်(၅)နှစ် ဖြစ်ပါသည်။ နားလည်မှုစာချွန်လွှာ(MOU)လက်မှတ် ရေးထိုးခြင်းဖြင့် မြန်မာနိုင်ငံ၏ လူမှုစီးပွားဖွံ့ဖြိုးတိုးတက်မှုအတွက်  သုတေသနလုပ်ငန်းများ ပူးတွဲ လုပ်ဆောင်နိုင်လာခြင်းအားဖြင့် နိုင်ငံတော်၏ လူမှုစီးပွားဖွံ့ဖြိုးမှုကို ပံ့ပိုးပေးနိုင်သည့် မူဝါဒများ ပံ့ပိုး ပေးနိုင်ရန် ဖြစ်ပါသည်။ 
ဗဟိုစာရင်းအင်းအဖွဲ့အနေဖြင့်လည်း သုတေသနလုပ်ငန်းများ ပြုလုပ်ရာတွင် လိုအပ်သော စာရင်းအင်းအချက်အလက်များကို မျှဝေပေးခြင်း၊ ပူးပေါင်းပါဝင်ဆောင်ရွက်ခြင်းနှင့် နည်းပညာပိုင်း ဆိုင်ရာ သင်တန်းများပေးနိုင်ရန်အတွက် လိုအပ်သော သင်တန်းခန်းမနေရာ ကူညီပေးခြင်းတို့ဖြင့်  ပူးပေါင်းပါဝင်ဆောင်ရွက်သွားမည် ဖြစ်ပါသည်။
မြန်မာဖွံ့ဖြိုးမှုအဖွဲ့အစည်း(MDI) အနေဖြင့်လည်း ဗဟိုစာရင်းအင်းအဖွဲ့၏ စာရင်းအင်းဆိုင်ရာ ဖွံ့ဖြိုးမှု အမျိုးသားအဆင့်မဟာဗျူဟာကို အကောင်အထည်ဖော်ရာတွင်လည်းကောင်း၊ စဉ်ဆက်မပြတ် ဖွံ့ဖြိုးမှုပန်းတိုင်များ အကောင်အထည်ဖော်ရန် ရည်မှန်းချက်များကို အကဲဖြတ်ခြင်းနှင့် ညွှန်ကိန်းများကို တွက်ထုတ်ရာတွင်လည်းကောင်း ကူညီပံ့ပိုးပေးမည့် နည်းပညာပိုင်းဆိုင်ရာ လိုအပ်သောသင်တန်း များကို အကူအညီအထောက်အပံ့ပေးခြင်းဖြင့် သုတေသနလုပ်ငန်းများကို အတူတကွ ပူးပေါင်းပါဝင် ဆောင်ရွက်သွားမည် ဖြစ်ပါသည်။ 
နှစ်ဖက်အဖွဲ့အစည်းသည် လိုအပ်သော သတင်းအချက်အလက်များကို မျှဝေခြင်း၊ နည်းပညာ ပိုင်းဆိုင်ရာ ကူညီထောက်ပံ့ပေးခြင်း၊ သင်တန်းများပေးခြင်းနှင့် လိုအပ်သည်များကို ပူးပေါင်းဆောင်ရွက် ကြခြင်းဖြင့် မြန်မာနိုင်ငံ၏ လူမှုစီးပွားဖွံ့ဖြိုးတိုးတက်မှုအတွက် အလွန်အရေးကြီးသည့် သုတေသန လုပ်ငန်းများကို ထိရောက်စွာ ပူးပေါင်းဆောင်ရွက်နိုင်ရန် ရည်ရွယ်ဆောင်ရွက်ခြင်း ဖြစ်ပါကြောင်း သတင်းရရှိပါသည်။